King Dievid Sin Bad

Afta Saal ded, Dievid ton king wen im a 30 ier uol. Afta kopl ier, im go pan di tap a im palis wan nait, an si wan priti priti uman. Dievid fain out se shi niem Baatshiiba an shi did marid tu wan suoja we niem Yuuraiya. Im sen kaal ar fi kom a im palis. Im sliip wid ar, an get ar pregnant. Dievid did a chrai fi aid we im du. So im tel di suoja we inchaaj a im aami se wen dem a fait dem fi put Yuuraiya a di front. Den im fi mek di suoja dem muuv fram baka Yuuraiya. So Yuuraiya ded iina di waar, an afta dat Dievid go marid Baatshiiba.

Jeuova did si evriting we apm. Wa yu tingk im wuda du? Jeuova sen wan prafit we niem Nietan fi go taak tu Dievid. Nietan se tu im se: ‘Wan rich man av wol iip a shiip, an wan puor man av wan likl biebi shiip we im lov bad. Bot di rich man go tek we di puor man wan likl biebi shiip.’ Wen Dievid ier dis, im beks bad an se: ‘A ded da rich man de fi ded!’ Den Nietan se: ‘A yu a da rich man de!’ Dievid aat did a tier op insaida im, an im tel Nietan se: ‘Mi sin gens Jeuova.’ Wa Dievid du did bring dong nof prablem pan im an im fambili. Jeuova did ponish Dievid, bot im neehn kil im kaa im did ombl an im tel di chuut.

Dievid did waahn fi bil wan plies fi worship Jeuova, bot a im son Salaman Jeuova pik fi bil it. Dievid did saat out som tingz we Salaman wuda niid fi bil Gad ous. An im se: ‘Gad ous afi big an priti an wel nais tu. Salaman yong, so mi a-go du wa mi kyan du fi elp im.’ Dievid gi nof a im moni fi elp out wid di wok. An im fain piipl we kuda du di wok gud. Plos im gyada op wol iip a guol an silva, an im kya iin nof siida wud fram Taiya an Saidan. Wen Dievid did bout fi ded, im gi Salaman di bildin plan fi Gad ous. Im se: ‘Jeuova mek mi rait dong dis fi yu. Im a-go elp yu. So no fried. Briev op yuself an gwaan go du di wok.’