Jeuova An Jiizas A-Go Mek Wi Riili Frii Iina Di Fyuucha

Wa a som a di sitn dem we yu a chogl wid evri die? Yu av wan fambili we yu a chogl fi tek kier a? Yu a fain it aad fi bi mada an faada fi yu pikni dem? Yu a wan pikni we a go a skuul an som ada pikni aalwiez a tek set pan yu? Yu sik bad, ar yu a get oul? Evribadi av prablem we dem a diil wid. Nof a uu a sorv Jeuova afi a diil wid uol iip a prablem siem taim. Bot wi nuo se suun suun, Jeuova a-go get rid a aal a wi prablem dem.​—2Kor 4:16-18.

Til dem taim de kom, wi fiil gud fi nuo se Jeuova si an nuo wa wi a go chuu. Im api se wi a stik tu im an naa gi op, an im av uol iip a blesn we im a-go gi wi. (Jer 29:11, 12) Jiizas kier bout wa wi a go chuu tu. Az wi gwaan du wa wi supuos tu du az wan Kristiyan, wi kyan memba se Jiizas pramis wi se: “Mi de wich paat unu de.” (Mt 28:20) Wen wi tap an tingk bout ou Gad Kindom a-go frii wi fram aal a wi prablem dem, it kyan mek wi shuor bout di sitn dem we wi a-go get an elp wi fi eng aan iivn wid aal a wa wi a go chuu.​—Ruo 8:19-21.

WACH DI VIDIYO AZ LAIF GET AADA, KIP YU YAI PAN JIIZAS!​—DI BLESN DEM WE GAD KINDOM A-GO GI WI, AN DEN ANSA DEM KWESTIYAN YA:

• Ou piipl pan di ort did en op no av no lat an paat wid Gad, an wa dat kaaz?

• Di wan dem we du wa Jeuova se dem fi du, wa im a-go du fi dem iina di fyuucha?

• A ou wi a-go get di nais fyuucha we im pramis fi gi wi?

• Wa kain-a blesn yu a luk faawod fi get iina Paradais?