Wa Apm Tu Wi Wen Wi Ded?

Sumadi fi yu eva ded yet? It at, no chuu? Yu mait-a a wanda: ‘Wa apm tu wi wen wi ded? Yu tingk wi kyan go si wi piipl dem we ded agen?’ Iina da lesn ya an di neda wan, luk pan di ansa dem we di Baibl gi wi we kyan mek yu fiil gud.

1. Wa apm tu wi wen wi ded?

Jiizas se wen wi ded, it komiin laik a sliip wi a sliip. Sumadi we sliip ded, no nuo a ting we a gwaan roun im wen im a sliip. Ou wen sumadi ded, it komiin laik a sliip dem a sliip? Wen sumadi ded, dem naa fiil no pien. An no mata umoch im did lov im fren an fambili dem, im kyaahn mis dem. Di Baibl tel wi se: “Di ded no nuo notn at aal.”​—Riid Iikliiziyastiiz 9:5.

2. Wen wi riili nuo wa apm wen sumadi ded, ou dat kyan elp wi?

Nof piipl fried fi ded, an nof piipl fried a ded. Bot wa di Baibl tel wi se apm wen sumadi ded kyan mek yu fiil beta. Jiizas did se: “Di chuut gweehn frii unu.” (Jan 8:32) Som a di choch dem tiich se di suol kyaahn ded, bot a no dat di Baibl tiich. So wen sumadi ded, dem naa sofa. Bot a no onggl dat. Sins dem no nuo wa a gwaan, dem kyaahn ort nobadi. So wi na’afi worship di ded ar du notn bikaa wi fried a dem. An wi na’afi prie fi dem niida.

Som piipl se dem kyan chat tu sumadi we ded. Bot notn no go so, kaa wi don lorn se di ded “no nuo notn at aal.” So di wan dem we tingk se a sumadi we ded dem a chat tu, a no riili dem dem a chat tu. A di diiman dem dem a chat tu. So a di diiman dem a gwaan laik di sumadi we ded. A dat mek wen wi nuo wa di Baibl se bout di ded, it kip wi sief fram di diiman dem. Jeuova tel wi se wi no fi chrai an taak tu ded piipl, kaa im nuo se a riili di diiman dem wi a taak tu an dem kyan ort wi.​—Riid Dyuutaranami 18:10-12.

3. Fain out bout wa riili apm tu piipl wen dem ded

Aal uova di worl, piipl biliiv aal kain-a difrant sitn bout wa apm tu piipl wen dem ded. Bot wi nuo se evriting we dem biliiv iina kyaahn chuu.

• Iina di ieriya we yu liv, wa a som a di sitn dem we dem biliiv se apm tu sumadi wen dem ded?

VIDIYO: Wan Paat Fram Di Vidiyo We Niem, Wa Apm Tu Piipl Wen Dem Ded? (1:19)

Riid Iikliiziyastiiz 3:20, an den wi a-go taak bout dem kwestiyan ya:

• Azkaadn tu da vors ya, wa apm tu sumadi wen dem ded?

• Yu tingk se paat a dem stil a liv aal wen dem ded?

Di Baibl tel wi bout Jiizas fren Lazaros we did ded. Wen yu a riid Jan 11:11-14, yu a-go si wa Jiizas did se did apm tu Lazaros. Den wi a-go taak bout dem kwestiyan ya:

• Wen sumadi ded, wa Jiizas se it komiin laik?

• Jiizas se wen sumadi ded, it komiin laik dem a sliip, so wa dat a tel wi se apm wen sumadi ded?

• Wa di Baibl se apm tu sumadi wen dem ded, it mek sens tu yu?

4. It wi du yu gud wen yu nuo wa riili apm tu sumadi wen dem ded

Wen yu nuo wa riili apm tu piipl wen dem ded, yu na’afi fried a sumadi we ded. Riid Iikliiziyastiiz 9:10, an den wi a-go taak bout da kwestiyan ya:

• Yu tingk ded piipl kyan du wi notn?

Wen wi nuo wa di Baibl riili tiich, it mek wi na’afi biliiv se wi afi worship di ded ar du notn kaa wi fried a dem. Riid Aizaiya 8:19 an Revilieshan 4:11, an den wi a-go taak bout da kwestiyan ya:

• Ou yu tingk Jeuova fiil wen sumadi worship sumadi we ded ar chrai fi get elp fram dem?

5. Wen yu nuo wa riili apm tu sumadi wen dem ded, dat a-go mek yu fiil gud

Dem tiich uol iip a piipl se wen sumadi ded, dem a-go sofa kaaz a wa dem did du. Bot it riili mek wi fiil gud fi nuo se nobadi naa go sofa wen dem ded, aal ef dem did du som wol iip a wikid sitn. Riid Ruoman 6:7, an den wi a-go taak bout da kwestiyan ya:

• Azkaadn tu wa da skripcha ya a se, wen sumadi ded dem frii. Sin kyaahn kanchuol dem no muo. So yu tingk sumadi we ded a sofa kaaz a di bad sitn dem we dem yuus tu du?

Di muor yu get fi nuo Jeuova, a di muor yu a-go si se im wuda neva mek piipl we ded sofa. Riid Dyuutaranami 32:4 an 1 Jan 4:8, an den wi a-go taak bout dem kwestiyan ya:

• Wen yu tingk bout di wiez dem we dem Baibl vors ya se Gad av, yu tingk im wuda aarait wid piipl jos a sofa so wen dem ded?

• Nou dat yu lorn bout wa riili apm tu sumadi wen dem ded, ou it mek yu fiil?

DIS A WA YU FI MEMBA

Wen sumadi ded, im ded. Im naa sofa, an im kyaahn du nobadi notn.

Wa yu did lorn iina da lesn ya?

• Wa apm tu wi wen wi ded?

• Wen wi riili nuo wa apm wen sumadi ded, ou dat kyan elp wi?

• Nou dat wi nuo wa riili apm tu sumadi wen dem ded, ou dat kyan mek wi fiil gud?

CHEK OUT SOM MUO SITN

Luk pan wa di Baibl se “suol” miin.

“A Wa A Di Suol?” (Sitn we yu kyan get pan di websait)

Fain out ef Gad a-go bon wikid piipl iina el faiya.

Yu Tingk El A Somwe We Piipl A-Go Sofa? (3:07)

Yu tingk wi afi fried a sumadi we ded?

Yu Tingk Wen Sumadi Ded Dem Spirit De Bout, An It Kyan Elp Yu Ar Ort Yu? (pamplet)

Fain out ou wan man did fiil gud wen im lorn wa riili apm tu sumadi wen dem ded.

“Mi Did Fraitn Fi Si Ou Di Baibl Mek Tingz Iizi Fi Andastan, An Di Ansa Dem We It Gi Mi Mek Wol Iip A Sens” (Di Wachtowa, Febiweri 1, 2015)