A 6 Miliyan Piipl Ded Fram KUOVID—Wa Di Baibl Av Fi Se Bout Dis?

Fram KUOVID staat tu Mie 23, 2022, di Worl Elt Aaganaizieshan se a 6.27 miliyan piipl ded fram KUOVID. Bot iina wan nyuuz ripuot we kom out pan Mie 5, 2022, di Worl Elt Aaganaizieshan se dem fiil se a nof nof muor piipl dan dat ded fram KUOVID. Dem se iina 2020 an 2021, “di mount a piipl we ded fram KUOVID ar siek-a ada tingz we av fi du wid KUOVID . . . a bout 14.9 miliyan.” So dem torbl sitn ya we a apm tu piipl, wa di Baibl av fi se bout it?

Di Baibl did mek wi nuo se siknis a-go pred bout di plies an kil aaf uol iip a piipl

•  Jiizas did mek wi nuo se iina di taim we di Baibl kaal di “laas die dem,” aal kain-a “siknis a-go kil aaf piipl.”​—Luuk 21:11; 2 Timoti 3:1.

Wa Jiizas did se wuda apm a dat a apm rait ya nou. Fi lorn muor bout dis, riid dis: “What Is the Sign of ‘the Last Days,’ or ‘End Times’?”

Di tingz we wi lorn fram di Baibl kyan elp wi fi fiil beta

•  “Di Gad we elp piipl wen dem niid it an we osh dem wen dem sad . . . elp wi an push wi fi gwaan tan chrang.”​—2 Korintiyan 1:3, 4.

Wol iip a piipl we sumadi fi dem ded fain se di sitn dem we dem lorn fram di Baibl elp dem fi diil wid it. Fi fain out muor bout dis, riid dem ya: “Coping With Grief—What You Can Do Today” an “The Best Help for Those Who Grieve.”

Di Baibl mek wi nuo ou dem prablem ya a-go don we wid

•  “Mek di taim kom wen yu ruul iina evri wie. Mek we yu waahn apm pan ort apm, jos laik ou a wa yu waahn fi apm iina evn apm.”—Matyu 6:10.

Suun suun Gad Kindom a-go mek shuor se “nobadi we liv de naa go se: ‘Mi sik.’” (Maak 1:14, 15; Aizaiya 33:24) Wach di vidiyo we niem Di Kindom A Gad—A Wa? fi fain out bout Gad govament we de a evn an wa it a-go du fi piipl.

Wi wel waahn yu fi lorn muor bout wa di Baibl se so dat di gud sitn dem we iin de kyan elp yu an yu fambili an unu kyan get fi nuo muor bout aal a di nais sitn dem we Gad a-go du fi aal a wi.