Surasak Suwanmake/Moment via Getty Images
KIP WACH!
Da Soma Ya Iina 2023 At Laka Faiya Aal Uova Di Worl—Wa Di Baibl Av Fi Se Bout Dis?
Aal uova di worl piipl a se dem neva si di taim at so yet an wan bag a tingz a gwaan wid di weda. Luk pan wa dem av fi se bout dis:
“Aal uova di worl, da Juun ya a di atis Juun iina 174 ier.”—National Oceanic and Atmospheric Administration, U.S. Department of Commerce, Julai 13, 2023.
“Iina Itali, Spien, Frans, Jormani an Puolan, dem plies de ata dan naamal an dem se di ailan dem we niem Sisili an Saadiiniya a-go ata dan dem plies de. So dis mait-a bi di atis taim dem eva si iina Yuurop.”—European Space Agency, Julai 13, 2023.
“Kaa di ort a get ata an ata, dis mait-a kaaz muo an muo rien fi faal an uol iip muo plies a-go flod out.”—Stefan Uhlenbrook, wan tap sumadi iina di World Meteorological Organization we diil wid aijralaji, waata an kraiyosfier, Julai 17, 2023.
Wen yu ier bout dem sitn ya, it mek yu staat fi fret an wori-wori op yuself? Luk pan wa di Baibl av fi se bout dis.
Yu tingk di Baibl did mek wi nuo se di weda wudaana get wosa an wosara?
Ye man. Dem iit ya we wi a fiil an ou di weda a gwaan wid bie tingz aal uova di worl, di Baibl did mek wi nuo se dem tingz ya wuda gwaan iina fi wi taim. Jiizas did mek wi nuo se iina dem taim ya ‘som torbl sitn a-go kom an piipl a-go fried.’ (Luuk 21:11) So kaa di taim a get ata an ata aal uova di worl, wol iip a piipl staat fret se di taim a-go kom wen di ort a-go mash op an nobadi naa go kyan liv pan it.
Yu tingk di taim a-go kom wen nobadi naa go kyan liv pan di ort?
Nuo sa. Gad did mek di ort fi piipl liv pan it fi eva; im naa go lou nobadi fi mash op di ort. (Saam 115:16; Iikliiziyastiiz 1:4) Pan tap a dat, im se im a-go “mash op di piipl dem we a mash op di ort.”—Revilieshan 11:18.
Di Baibl mek wi nuo se Gad a-go mek shuor se nobadi no mash op di ort.
“[Gad] mek di powaful staam kaam dong, an di wiev dem iina di sii sekl dong tu.” (Saam 107:29) Gad av di powa fi kanchuol di rien an di briiz an dem ting de. So wi nuo se aal a di ting dem we a gwaan wid di weda we a mek piipl sofa ya nou, im kyan fiks dat bak tu.
“A yu a tek kier a di ort, an kaaz a dat di grong kyan gruo nof tingz we a bier uol iip a fuud.” (Saam 65:9) So wi si se Gad a-go ton di ort iina wan paradais.
Fi fain out muor bout wa di Baibl se bout wen evriting pan di ort staat wok ou it fi wok an di ort get bak nais an gud agen, riid dis: “Who Will Save the Earth?”