sinceLF/E+ via Getty Images
KIP WACH!
A Uu A-Go Siev Di Piipl Dem We Naa Fait Iina Di Waar Dem?—Wa Di Baibl Av Fi Se Bout Dis?
Di Yuunaitid Nieshan mek wi nuo se:
Fram Aktuoba 7 tu Aktuoba 23, 2023, a 6,400 piipl ded an a 15,200 a dem get ort iina di waar we a gwaan wid Gaaza an Izrel. An nof a di piipl dem we a ded aaf a no piipl we a fait iina di waar. An pan tap a dat, uol iip a piipl afi ron we lef dem yaad tu.
Op tu Septemba 24, 2023 a 9,701 piipl we neehn a fait iina di waar we a gwaan bitwiin Rosha an Yuukrien en op ded. An a 17,748 a dem get ort iina Yuukrien.
Fi di wan dem we a sofa kaaz a di waar dem we a gwaan, wa a som a di gud sitn dem we dem kyan luk faawod fi get iina di fyuucha?
Sitn gud we yu kyan luk faawod tu
Di Baibl mek wi nuo se Gad “a-go tap di waar dem we a gwaan aal uova di ort.” (Saam 46:9) Im a-go yuuz fi’im govament we de a evn fi get rid a aal a di ada govament dem we a ruul pan di ort. (Daniyel 2:44) An a da govament de a-go get rid a aal a di prablem dem we piipl av.
Jiizas a di King we a ruul iina Gad govament, an a dis im a-go du:
“Di puor piipl we a baal out fi elp im a-go siev dem, an im a-go du sopm fi elp di ombl wan dem uu nobadi neehn bizniz wid. Im a-go fiil it fi puor piipl an fi di wan dem we a sofa, an im a-go siev dem laif. Im a-go siev dem fram wikid piipl uu a mek dem sofa an uu a chrai fi ort dem.”—Saam 72:12-14.
Gad a-go yuuz fi’im govament fi get rid a aal a di pien an sofarin we piipl a go chuu kaaz a waar an kraim an vailens.
“Gad a-go waip dem fies an jrai op aal a dem yai-waata. Nobadi naa go ded agen, so nobadi naa go ala ar baal. An nobadi naa go fiil no pien, kaaz dem uol taim sitn de don we wid.”—Revilieshan 21:4.
Suun suun, Gad govament a-go saat out di prablem dem we a gwaan iina da worl ya. Di Baibl did mek wi nuo se iina fi wi taim ‘waar a-go gwaan a woi woi an waar a-go gwaan anda wi nuoz.’ (Matyu 24:6) So aal a dem waar de we wi si a gwaan an som ada tingz we a gwaan mek wi nuo se wi a liv iina “di laas die dem” an se Gad govament suun get rid a aal a di ada govament dem.—2 Timoti 3:1.