Di Baibl mek wi nuo se piipl a-go ‘liv fi likl bit, an dem laif a-go ful op a bier prablem.’ (Juob 14:1) Bot yu tingk a dis Gad did waahn fi wi? Ef a no dis im did waahn fi wi, den a wa Gad waahn fi wi? Yu a-go fiil gud bout di ansa dem we di Baibl gi wi.

1. Wa kain-a laif Jeuova did waahn fi wi?

Jeuova waahn wi fi av di bes laif eva. Wen im mek di fos man an uman we niem Adam an Iiv, im put dem iina wan priti priti plies niem di gyaadn a Iidn. “Den Gad bles dem an se tu dem se: ‘Unu fi av nof pikni an ful op di ort wid uol iip a piipl; unu fi kanchuol di uol ort an tek kier a it.’” (Jenisiz 1:28) Jeuova did waahn dem fi av nof pikni an fi dem ton di wol ort iina wan paradais laik di gyaadn a Iidn. An im did waahn dem fi tek kier a di animal dem we de pan it tu. Im neehn waahn piipl fi siki-siki. Im waahn dem fi aati so dem kyan api an liv fi eva.

Aalduo a no dis a gwaan nou,a wa Gad waahn fi wi no chienj. (Aizaiya 46:10, 11) Im stil waahn di piipl dem we a du wa im tel dem fi du fi enjai laif an liv fi eva.​—Riid Revilieshan 21:3, 4.

2. Ef wi waahn fi api wid wi laif nou, wa wi fi du?

Jeuova Gad mek wi iina wan wie we mek wi nuo se wi “niid Gad iina evri wie.” Wa shuo se wi niid Gad iina evri wie a dat wi waahn fi nuo bout im so wi kyan worship im. (Riid Matyu 5:3-6.) Im waahn wi an im fi ton gud gud fren. An im waahn yu fi “lov im, an fi yu du aal a wa im se yu fi du.” An wen yu a sorv im, Jeuova waahn yu fi dwi’it “wid aal a yu aat.” (Dyuutaranami 10:12; Saam 25:14) Aalduo wi stil a-go av prablem iina wi laif, wen wi sorv Jeuova an du wa im waahn wi fi du, it mek wi si wa wi a liv fa an it mek wi api wid di wie ou wi a liv wi laif nou.

3. Jeuova waahn wi fi av wan api laif an im a-go mek shuor se wi get it

Plie di VIDIYO, an den wi a-go taak bout di neks kwestiyan.

VIDIYO: Wan Paat Fram Di Vidiyo We Niem, Wa Mek Gad Mek Di Ort? (1:41)

• Wa mek Gad mek da nais nais ort ya?

Riid Iikliiziyastiiz 3:11, an den wi a-go taak bout da kwestiyan ya:

• Wa aal a dis a tel wi se bout Jeuova?

4. Wa Jeuova waahn fi wi, a it a-go apm

Riid Saam 37:11, 29 an Aizaiya 55:11, an den wi a-go taak bout da kwestiyan ya:

• Ou wi nuo se wa Jeuova waahn fi wi, a dat a-go apm?

5. Wen wi a sorv Jeuova, it gi wi sitn fi liv fa

VIDIYO: Mi Get Fi Fain Out Wa Mek Mi De Ya (5:03)

• Wen Terumi fain out wa mek wi de ya, ou it did elp ar?

Riid Iikliiziyastiiz 12:13, an den wi a-go taak bout da kwestiyan ya:

• Kaa Jeuova du so moch fi wi, wa it mek wi waahn fi du fi im?

DIS A WA YU FI MEMBA

Jeuova waahn wi fi enjai laif, an im waahn wi fi liv fi eva rait ya-so pan di ort. Wen wi sorv Jeuova an du wa im waahn wi fi du wid aal a wi aat, wi a-go si wa wi a liv fa rait ya nou.

Wa yu did lorn iina da lesn ya?

• Wen Jeuova did mek Adam an Iiv, wa Im did waahn fi dem?

• Ou wi nuo se Gad stil waahn dat fi wi?

• Ef yu waahn fi api an si wa yu a liv fa, wa yu fi du?

CHEK OUT SOM MUO SITN

Luk pan wa mek wi nuo se di gyaadn a Iidn did riili de fi chuu.

“Di Gyaadn A Iidn​—A Anansi Tuori Ar A Riil Sitn?” (Di Wachtowa, Janiweri 1, 2011)

Luk pan wa mek wi nuo se di ort a-go de ya fi eva; it naa go bon op.

“Yu Tingk Di Ort A-Go Bon Op Ar Mash Op?” (Sitn we yu kyan get pan di websait)

Chek out wa di Baibl se yu fi du ef yu waahn si wa yu a liv fa an api wid yu laif.

“Wa Mek Gad Mek Wi?” (Sitn we yu kyan get pan di websait)

Fain out ou da man ya we did tingk se im laif did set get fi fain out se im neehn av evriting.

Nou Mi Av Sitn Fi Liv Fa (3:55)

2. A uu a-go ruul wid Jiizas?

A no Jiizas wan a-go ruul. Di wan dem we a-go ruul wid im kom fram “evri chraib an langwij an piipl an konchri.” An dem a-go ruul uova di piipl dem we de pan di ort. (Revilieshan 5:9, 10) A umoch piipl a-go ruul wid Jiizas Krais? Fram di taim Jiizas did kom a ort, a wol iip a miliyan a piipl ton im falara. Bot a onggl 144,000 a dem a-go ruul wid Jiizas iina evn. (Riid Revilieshan 14:1-4.) So aal a di ada falara dem we Jiizas av a-go liv pan di ort wen di Kindom a ruul.​—Saam 37:29.

Gad govament a ruul aredi. An likl bit afta dis, it a-go chienj op nof tingz pan di ort. Mek wi luk pan som a di sitn dem we Gad govament suun mek apm.

1. Wa Gad Kindom a-go du fi mek shuor se evribadi get jostis an liv iina piis?

Iina di waar we di Baibl kaal Aamagedan, Jiizas, di King fi Gad govament, a-go get rid a aal a di wikid piipl dem an dem govament ya. (Revilieshan 16:14, 16) Dem taim de, wa da skripcha ya a tel wi se a-go apm, a-go apm fi chuu. It se: “Likl fram dis, no muo wikid piipl naa go de bout agen.” (Saam 37:10) Jiizas a-go yuuz im govament fi mek shuor se evribadi get jostis, an im a-go mek shuor se evribadi a liv iina piis.​—Riid Aizaiya 11:4.

2. Wa laif a-go komiin laik wen Gad mek wa im waahn fi apm pan ort apm?

Wen Gad govament a ruul, “di piipl dem we du wa Gad se rait, a dem a-go de pan di ort, an liv pan it fi eva.” (Saam 37:29) Jos tingk se ya’a liv iina wan worl we evribadi lov Jeuova an dem wan aneda, an dem a du wa im waahn dem fi du! Nobadi naa go sik agen, an evribadi a-go a liv fi eva.

3. Afta Jiizas get rid a aal a di wikid piipl dem, wa els im a-go du?

Afta Jiizas get rid a aal a di wikid piipl dem, im a-go ruul fi 1,000 ier. Iina dem taim de, im an di 144,000 we a ruul wid im a-go elp di piipl dem we de pan di ort fi ton porfek. Bai dem taim de fi don, di ort a-go ton iina wan priti paradais, an it a-go ful op a bier api piipl kaa dem a du wa Jeuova se dem fi du. An den Jiizas a-go gi bak im Faada, Jeuova, di Kindom. An dem taim de, piipl a-go “av nof rispek” fi Jeuova niem. (Matyu 6:9, 10) Dem taim de, evribadi wuda si se Jeuova a di bes Ruula we kier bout im piipl dem. Den Jeuova a-go get rid a Sietan an im diiman dem, an enibadi els we ton gens Jeuova tu. (Revilieshan 20:7-10) Aal a di gud sitn dem we Gad govament mek apm a-go di de fi eva.

LORN SOM MUO

4. Gad Kindom a-go get rid a evri ada govament

“Piipl onggl a chrai fi kanchuol ada piipl an en op a du som wikid sitn tu dem.” (Iikliiziyastiiz 8:9) Jeuova a-go yuuz im Kindom govament fi get rid a aal a di prablem dem we piipl kaaz fi a gwaan.

Riid Daniyel 2:44 an 2 Tesaluoniyan 1:6-8, an den wi a-go taak bout dem kwestiyan ya:

• Wa Jeuova an Jiizas a-go du tu dem govament ya an di piipl dem we a bak dem?

• Di ting dem we yu lorn bout Jeuova an Jiizas, ou dem mek yu shuor se dem a-go chriit piipl fier an mek shuor se evribadi get jostis?

5. Jiizas a di bes King fi ruul wi

Wen Jiizas a ruul, im gweehn du tingz fi elp piipl. Plie di VIDIYO fi si ou Jiizas don shuo wi se im no onggl waahn fi elp piipl, bot Gad gi im di powa fi dwi’it tu.

VIDIYO: Jiizas Mek Wi Si Wa Di Kindom Gweehn Du (1:13)

Wen Jiizas did de pan di ort, im gi wi wan likl prips a wa di Kindom gweehn du. Wich wan a dem sitn ya we Jiizas a-go du fi wi yu wel waahn fi si apm? Riid dem skripcha ya fi si som a di sitn dem we Jiizas a-go du fi wi.

6. Gad govament a-go gi wi wan nais nais fyuucha

VIDIYO: Wan Likl Prips A Wa A-Go Apm Iina Di Fyuucha (4:38)

Riid Saam 145:16, an den wi a-go taak bout da kwestiyan ya:

• Ou it mek yu fiil fi nuo se Jeuova a-go “gi evriting we a liv wa dem waahn”?

DIS A WA YU FI MEMBA

Gad govament a-go du wa im waahn fi du. It a-go ton di ort iina wan priti paradais we ful op a piipl we naa go eva tap worship Jeuova.

Wa yu did lorn iina da lesn ya?

• Wa Gad govament a-go du fi mek piipl av nof rispek fi Jeuova niem?

• Wa mek wi kyan biliiv se Gad govament a-go du evriting we im pramis wi?

• Wich wan a di sitn dem we Gad govament a-go du fi wi yu wel waahn fi si apm?

CHEK OUT SOM MUO SITN

Fain out wa a Aamagedan.

“Di Aamagedan Waar​—A Wa Dat?” (Sitn we yu kyan get pan di websait)

Fain out bout wa a-go gwaan iina di wos “sofarieshan” we Jiizas did taak bout.​—Matyu 24:21.

“Di Wos Sofarieshan​—A Wa Dat?” (Sitn we yu kyan get pan di websait

Luk pan ou di fambili dem kyan sidong an tingk bout di blesn dem we wi gweehn get fram Gad govament.

Tingk Bout Wa Yu A-Go Du Iina Paradais (1:50)

Chek out di tuori we niem “Mi Did Av Uol Iip A Kwestiyan We Mi Waahn Di Ansa Fa.” Luk pan ou wan man we did a fait gens di govament fain sitn gud fi luk faawod tu.

“Di Baibl Chienj Piipl Laif Fi Di Beta” (Di Wachtowa, Janiweri 1, 2012)