Wen yu gwaan stodi di Baibl no mata wa, it a-go wok out gud fi yu. Bot it naa go aalwiez iizi fi yu dwi’it. Som a di taim dem yu mait-a wanda ef yu a-go kyan gwaan stodi di Baibl. Bot wa mek yu no fi mek notn tap yu fram dwi’it, no mata wa a gwaan?

1. Wa mek it a-go gud fi yu ef yu stodi di Baibl?

“Kaaz wen Gad taak, a laik se di sitn dem we im se alaiv, av powa an kyan du tingz!” (Iibruu 4:12) It a-go gud fi yu fi stodi di Baibl kaa it a-go mek yu nuo ou Gad fiil bout tingz, an ou im fiil bout yu. It a-go mek yu nuo nof tingz. Bot no onggl dat, it a-go mek yu nuo wa’a di rait ting fi du, an it a-go mek yu av sopm gud fi luk faawod tu. Bot beta dan dat, it a-go mek yu an Jeuova ton gud gud fren. Wen yu stodi di Baibl, yu laif a-go betaraaf.

2. Wa mek a wan gud sitn fi wi si se di Baibl av wol iip a gud tingz iina it?

Di sitn dem we de iina di Baibl wot nof, dem komiin laik wan chrezha. Das wai di Baibl tel wi se: “Go afta chuut an bai it, an no eva eva sel it.” (Pravorbz 23:23) Wen yu aalwiez memba se it gud fi yu stodi di Baibl, yu naa go mek notn mek yu no du yu stodi.​—Riid Pravorbz 2:4, 5.

3. A ou Jeuova kyan elp yu fi gwaan du yu stodi?

Jeuova a di muos powaful Sumadi eva. A im mek yu, an im a yu fren. An a im mek yu waahn fi du di sitn dem we im waahn yu fi du, ‘an a im gi yu di chrent fi du dem tu.’ (Riid Filipiyan 2:13.) Wen taim yu fiil laik se yu kyaahn bada wid yu stodi ar yu no iebl fi du di sitn dem we ya’a lorn, Jeuova kyan elp yu fi du dem. Eni kain-a elp we yu niid, im kyan gi yu it. So no tap prie tu Jeuova an aks im fi elp yu.​—1 Tesaluoniyan 5:17.

LORN SOM MUO

4. No mek notn tap yu fram du yu Baibl stodi

Wen yu fiil laik se yu av wol iip a sitn fi du an yu na’av no taim fi du yu Baibl stodi, ou yu kyan go nuo wa fi du? Riid Filipiyan 1:10, an den wi a-go taak bout dem kwestiyan ya:

• Wa’a som a ‘di rait sitn dem’ we wi fi a du?

• Ou yu kyan mek shuor se notn no tap yu fram du yu Baibl stodi?

1. Ef yu put san iina sitn fos an den yu chrai fi put som rakstuon iina it, evriting naa go uol iina it gud

2. Bot ef yu put di rakstuon dem iina it fos, yu a-go av spies fi uol muor a di san. A siem so, “di sitn dem we rait” wen yu du dem fos, yu a-go av taim fi du di big ting dem iina yu laif we rait an den yu a-go av taim lef fi du som ada sitn

Wen wi stodi di Baibl, it a-go shuo se wi nuo se wi niid Gad iina evri wie. Riid Matyu 5:3, an den wi a-go taak bout da kwestiyan ya:

• Ou it a-go elp wi wen wi no mek notn tap wi fram du wi Baibl stodi?

5. Gwaan du yu Baibl stodi aal wen piipl a chrai tap yu

VIDIYO: Di Blesn Dem We Yu Get Wen Yu No Mek Notn Tap Yu Fram Lorn Bout Jeuova (5:22)

• Iina di vidiyo, wen Francesco did tel im fren dem an im fambili dem bout di sitn dem we im did a lorn, a ou dem did gwaan?

• Kaa im neehn tap im stodi, ou it did wok out fi im?

Riid 2 Timoti 2:24, 25, an den wi a-go taak bout dem kwestiyan ya:

• Ou yu fambili an yu fren dem fiil bout di sitn dem we ya’a lorn?

• Azkaadn tu dem vors ya, a wa yu fi du wen sumadi no laik se ya’a stodi di Baibl an waahn yu fi tap? An wa mek yu fi du dat?

6. Mek Jeuova bi di wan fi elp yu

VIDIYO: Jeuova Elp Wi Fi Chienj Wi Laif Fi Di Beta (3:56)

• Iina da vidiyo ya, so dat im kuda du di sitn dem we Jeuova waahn im fi du, wa an wa Jim did du?

• Wa yu lov di muos bout wa Jim did du?

Riid Iibruu 11:6, an den wi a-go taak bout dem kwestiyan ya:

• Wa Jeuova a-go du “fi di wan dem we a luk fi im aad aad” an we waahn fi mek im api?

• Ou yu tingk Jeuova fiil wen im si yu a du evriting we yu kyan du fi stodi di Baibl?

DIS A WA YU FI MEMBA

Wen ya’a stodi di Baibl, it naa go aalwiez iizi fi yu dwi’it. Bot wen yu dwi’it, it a-go kyan mek yu liv fi eva. Jos gwaan chos iina Jeuova an im wi bles yu.

Wa yu did lorn iina da lesn ya?

• Wa mek di sitn dem we ya’a lorn iina di Baibl wot nof tu yu?

• Ou yu kyan mek shuor se yu a du ‘di rait sitn dem’?

• Wa mek yu fi aks Jeuova fi elp yu fi gwaan stodi di Baibl?

CHEK OUT SOM MUO SITN

Fain out bout fuor sitn we som piipl du fi mek yuus a dem taim.

“Ou Yu Kyan Yuuz Yu Taim Di Rait Wie” (Wiek Op!, Febiweri 2014)

Luk pan ou Jeuova elp wan uman uufa ozban kudn andastan wa mek shi a du so moch fi sorv Gad.

Jeuova Gi Wi Di Chrent We Wi Niid Fi Kyari Wi Uona Luod (5:05)

Luk pan ou wan man get fi sorv Jeuova kaa im waif neehn tap lorn bout Jeuova.

Mi Did Afi Tes Fi Si Ef Dis A Did Riili Di Chuut (6:30)

Som piipl se Jeuova Witnis mash op piipl fambili. Notn go so fi chuu?

“Di Jeuova Witnis Dem Mash Op Piipl Fambili Ar Dem Mek Dem Betaraaf?” (Sitn we yu kyan get pan di websait)

Aal a wi afi mek op wi main bout wa wi a-go du. An bies pan wa wi du, it kyan mek wi an Jeuova mash op ar mek wi an im ton buonifai fren. Som a di sitn dem we wi afi mek op wi main bout a laik wich paat wi a-go liv, ou wi a-go mek a livin, ar ef wi a-go marid ar wi naa go marid. Wen wi du di rait ting dem, wi a-go api an Jeuova a-go api wid wi tu.

1. Ou yu kyan yuuz di Baibl fi elp yu mek op yu main fi du di rait ting dem?

Bifuo yu mek op yu main fi du notn, yu fi prie tu Jeuova fi im elp yu an yu fi luk iina di Baibl fi si ou im fiil bout it. (Riid Pravorbz 2:3-6.) Som a di taim Jeuova mek wi si klier klier wa im waahn wi fi du. An ef wi du wa im waahn wi fi du, a di bes ting dat.

Bot, wa ef it no so klier iina di Baibl wa im waahn yu fi du? Jeuova a-go stil “shuo yu di rait wie fi go.” (Aizaiya 48:17) Ou im a-go du dat? Yu av tingz we iina di Baibl we yu kyan riizn pan we mek wi si ou Jeuova fiil bout tingz an wa im tingk bout dem. Muos a di taim a wen wi riid bout sitn iina di Baibl wi get fi nuo ou Jeuova fiil bout it. Wen wi get fi nuo ou im fiil bout it, den wi kyan du di ting dem we a-go mek im api.

2. Wa an wa yu fi tingk bout bifuo yu mek op yu main fi du sitn?

Di Baibl tel wi se: “Di wan we av sens tingk bout wa dem a-go du bifuo dem dwi’it.” (Pravorbz 14:15) Dis a-go miin se bifuo wi mek op wi main fi du notn, wi fi tingk bout it fos. Aks yuself dem kwestiyan ya wen yu a mek op yu main fi du sitn: ‘Wa a som a di ting dem we iina di Baibl we mi kyan riizn pan fi si ou Jeuova fiil bout it? Ef mi mek op mi main fi du sitn insted-a sitn els, mi a-go fiil aarait wid di wan we mi pik? Ef mi du dis, it a-go mek tingz aad fi nobadi els?’ An di bigis kwestiyan wi fi aks wiself a dis: ‘It a-go mek Jeuova api?’​—Dyuutaranami 32:29.

Jeuova av di rait fi tel wi wa gud an wa bad. Wen wi get fi nuo im laa dem an ou im fiil bout tingz, an wi mek op wi main fi du wa im waahn wi fi du no mata wa, den wi a-go av wan gud kanchens. Di kanchens a wan fiilin we wi av we mek wi nuo ef sitn rait ar rang. (Ruoman 2:14, 15) Wen wi yuuz wi kanchens, it a-go elp wi fi du wa rait.

LORN SOM MUO

3. Yuuz di Baibl fi nuo wa fi du

VIDIYO: Riizn Pan Di Sitn Dem We Yu Lorn Iina Di Baibl Fi Nuo Wa Fi Du (5:54)

• Wa a wan nais prezent we Jeuova gi wi?

• Wa mek Jeuova gi wi da prezent ya?

• Wa Jeuova gi wi fi elp wi fi yuuz da prezent ya iina di bes wie?

Fi si sopm we wi kyan riizn pan iina di Baibl, riid Ifiijan 5:15, 16. Den taak bout ou yu kyan ‘yuuz evri chaans yu get fi du sopm gud’ fi . . .

• riid di Baibl aafn.

• ton wan beta ozban ar waif, wan beta mada ar faada, ar wan beta son ar daata.

• go a wi kanggrigieshan miitn dem.

4. Yuuz yu kanchens fi du di rait ting dem

VIDIYO: “Mek Shuor Se Wa Yu A Du Naa Bada Yu Kanchens” (5:13)

• Iina di vidiyo, wa di sista did du fi mek shuor se wa shi plan fi du wuda mek Jeuova api?

Wen wi afi mek op wi main bout sitn we wi afi du, wa mek wi no fi aks ada piipl fi tel wi wa fi du? Riid Iibruu 5:14, an den wi a-go taak bout dem kwestiyan ya:

• Aalduo it mait-a iizi fi aks ada piipl fi tel wi wa fi du, wa wi fi kyan du fi wiself?

• Wa de de we kyan elp yu fi yuuz yu kanchens fi du wa rait?

5. No du tingz fi bada ada piipl kanchens

A no evribadi a-go mek op dem main fi du di siem ting dem. Ou wi kyan shuo se wi rispek we ada piipl kanchens lou dem fi du? Luk pan tuu tingz we mait-a apm:

Di fos wan: Wan sista mait-a laik fi wier miekop bot shi muuv ga’a wan kanggrigieshan we nof a di sista dem we di de no laik wen yu wier miekop.

Riid Ruoman 15:1 an 1 Korintiyan 10:23, 24, an den wi a-go taak bout dem kwestiyan ya:

• Bies pan wa dem vors ya se, wa di sista mait-a mek op ar main fi du? An wa yu wuda du ef yu de roun sumadi we fi dem kanchens no lou dem fi du sitn we fi yu kanchens lou yu fi du?

Di sekan wan: Bies pan wa di Baibl se, wan breda mait-a nuo se notn no rang fi jringk likl lika, bot im mait-a stil mek op im main fi no jringk it. Som breda invait im fi go a wan likl paati an im si dem a jringk lika.

Riid Iikliiziyastiiz 7:16 an Ruoman 14:1, 10, an den wi a-go taak bout dem kwestiyan ya:

• Bies pan dem vors ya, wa wan breda mait-a mek op im main fi du? Wa yu wuda du ef yu si sumadi a du sitn we fi yu kanchens no lou yu fi du?

Si som sitn ya we kyan elp yu fi mek op yu main fi du di rait ting dem

1. Aks Jeuova fi elp yu fi nuo wa fi du.​—Jiemz 1:5.

2. Sorch aad iina di Baibl an iina di buk an pamplet dem fi fain tingz we mek wi si ou Jeuova fiil bout tingz an wa im tingk bout dem. Ar yu kyan go taak tu som breda ar sista we go chuu sitn laik wa yu a diil wid.

3. Tingk bout wa yu mek op yu main fi du an ef it a-go bada fi yu kanchens ar sumadi els kanchens.

DIS A WA YU FI MEMBA

Tingz a-go wok out gud wen wi tingk bout ou Jeuova fiil bout wa wi mek op wi main fi du bifuo wi dwi’it an ef it a-go elp ar bada ada piipl.

Wa yu did lorn iina da lesn ya?

• Ou yu kyan mek shuor se wa yu mek op yu main fi du a-go mek Jeuova api?

• Wa yu kyan du fi mek shuor se yu av wan gud kanchens wen yu du sitn?

• Wa yu kyan du fi shuo se yu kier bout ou ada piipl fiil bout sopm?

CHEK OUT SOM MUO SITN

Wa kyan elp yu fi du di rait ting dem so dat yu an Jeuova kyan ton buonifai fren?

“Du Tingz We A-Go Mek Gad Get Di Big Op” (Di Wachtowa, Iepril 15, 2011)

Fain out muor bout di ting dem we Jeuova tel wi fi du.

Jeuova Mek Im Piipl Dem Nuo Wa Fi Du (9:50)

Luk pan som sitn we elp wan man fi mek op im main bout wa fi du duo it did aad.

Jeuova Mek Wi Shuor Se Wi A-Go Get Evriting We Gud (5:46)

Fain out muor bout ou wi kyan du tingz fi mek Jeuova api, iivn wen im no tel yu klier klier wa fi du.

“Yu Aalwiez A-Go Waahn Wan Laa Iina Di Baibl Fi Tel Yu Wa Fi Du?” (Di Wachtowa, Disemba 1, 2003)