LESN 59
Yu Kyan Tan Op Chrang Wen Piipl A Fait Gens Yu
Aal a wi we a Kristiyan a-go fain se piipl gweehn fait gens wi an chrai tap wi fram sorv Jeuova. So yu tingk dis a sitn we wi fi a fret an a wori wori op wiself bout?
1. Wa mek wi nuo se piipl a-go fait gens wi?
Di Baibl tel wi se: “Enibadi we se dem a Gad piipl an a fala Gad, afi go chogl chuu nof sitn tu.” (2 Timoti 3:12) Kaa Jiizas neehn komiin laik di piipl dem iina di worl, dem fait gens im. A siem so wi no komiin laik di piipl dem iina di worl, so wi no shak wen wi si se di govament dem an di choch dem a fait gens wi.—Jan 15:18, 19.
2. Ou wi kyan redi op wiself fi wen piipl a fait gens wi?
Wi afi du tingz nou we a-go elp wi fi chos iina Jeuova muor an muor. Wi afi mek shuor se evridie wi a riid di Baibl an a prie tu Jeuova, an wi waahn mek shuor se wi eva a ga’a wi miitn dem tu. Wen wi du dem sitn ya, it wi elp wi fi tan op chrang wen piipl a fait gens wi, aal ef a wi uona fambili dem. Paal a wan a di sumadi dem iina di Baibl we piipl eva did a fait gens, an im did se: “Di Laad a di wan we elp mi an mi naa go fried a notn.”—Iibruu 13:6.
Wan neda ting we kyan elp wi fi no fried wen piipl a fait gens wi a wen wi aalwiez a priich tu piipl. Dis wi elp wi fi chos iina Jeuova an fi no fried a piipl. (Pravorbz 29:25) Wen yu du yu bes fi priich tu piipl nou an no fried, dat wi elp yu fi gwaan priich aal ef di govament lak dong di wok we wi a du.—1 Tesaluoniyan 2:2.
3. Wen wi eng aan an tan op chrang wen piipl a fait gens wi, ou dat kyan elp wi?
Non a wi no laik wen piipl a fait gens wi. Bot wen wi eng aan an tan op chrang, it elp wi fi chos iina Gad muor. Kaa wen wi fiil laik wi kyaahn go no muor, an wi luk an si ou Jeuova elp wi fi tan op chrang, wi an im get kluos kluos. (Riid Jiemz 1:2-4.) It pien Jeuova aat fi si wen wi a sofa, bot it mek im api wen im si se wi a eng aan an tan op chrang no mata wa wi a go chuu. Di Baibl se: “Ef unu sofa siek-a sopm gud wa unu du, an unu bier di sofarieshan, nou a dat Gad a-go bles.” (1 Piita 2:20) Ef wi eng aan an no tap sorv Jeuova, im a-go mek wi kyan liv fi eva iina di nyuu worl. Dem taim de evribadi a-go a sorv Jeuova an nobadi naa go de de a fait gens dem.—Matyu 24:13.
LORN SOM MUO
Wi a-go luk pan ou wi kyan tan op chrang an no tap sorv Jeuova wen piipl a fait gens wi, an wi a-go si ou im a-go bles wi wen wi du dat.
4. Yu kyan eng aan an tan op chrang wen yu fambili a fait gens yu
Jiizas did don tel wi se som a wi fambili wuda fait gens wi wen wi mek op wi main fi sorv Jeuova. Riid Matyu 10:34-36, an den wi a-go taak bout da kwestiyan ya:
Wa dem fambili mait-a du wen sumadi mek op dem main fi staat sorv Jeuova?
Fi si wa did gwaan wid sumadi wen dem mek op dem main fi staat sorv Jeuova, plie di VIDIYO, an den wi a-go taak bout di neks kwestiyan.
Wa yu wuda du ef wan a yu fren dem ar yu fambili chrai fi tap yu fram sorv Jeuova?
Riid Saam 27:10 an Maak 10:29, 30. Afta evri skripcha, wi a-go taak bout da kwestiyan ya:
Wen yu tingk bout dis, ou it kyan elp yu ef yu fambili ar yu fren dem a fait gens yu?
5. Aal wen dem a fait gens yu, no tap sorv Jeuova
Wen piipl a fait gens wi fi mek wi tap sorv Jeuova, wi afi tan op chrang fi no tap sorv im. Plie di VIDIYO, an den wi a-go taak bout di neks kwestiyan.
Wen yu luk pan wa dem breda an sista ya a go chuu, ou it elp yu fi tan op chrang an no gi op?
Riid Aks 5:27-29 an Iibruu 10:24, 25. Afta evri skripcha, wi a-go taak bout da kwestiyan ya:
Aal ef di govament se wi no fi priich ar go a wi miitn dem, wa mek wi fi gwaan worship Jeuova an no du wa dem se wi fi du?
6. Jeuova a-go elp yu fi eng aan an tan op chrang
No mata wich paat dem kom fram ar ou uol dem bi, yu av wol iip a Jeuova Witnis we a eng aan an tan op chrang, aal wen piipl a fait gens dem. Fi si som tingz we elp dem fi du dat, plie di VIDIYO. Den wi a-go taak bout di neks kwestiyan.
Iina di vidiyo, wa did elp di Jeuova Witnis dem fi eng aan an tan op chrang?
Riid Ruoman 8:35, 37-39 an Filipiyan 4:13. Afta evri skripcha, wi a-go taak bout da kwestiyan ya:
Ou da skripcha ya elp yu fi si se yu kyan eng aan an tan op chrang no mata wa yu mait-a go chuu?
Riid Matyu 5:10-12, an den wi a-go taak bout da kwestiyan ya:
Wa mek yu kyan api aal ef piipl a fait gens yu?
Wol iip a piipl we a sorv Jeuova eng aan an tan op chrang wen piipl a fait gens dem. Yu kyan dwi’it tu!
SUMADI MAIT-A SE: “Ef piipl a fait gens mi, mi no tingk mi kyan go manij dat at aal.”
Wa a som skripcha we dem kuda yuuz fi elp dem fi no fried wen piipl a fait gens dem?
DIS A WA YU FI MEMBA
Wen Jeuova si se wi a du wi bes fi sorv im iivn duo piipl a fait gens wi, it mek im api. Kaaz im a elp wi, dat wi mek wi eng aan an tan op chrang!
Wa yu did lorn iina da lesn ya?
Wa mek di wan dem we a fala Jiizas no shak wen piipl a fait gens dem?
Wa yu kyan du fi redi op yuself so dat yu no fried wen piipl staat fait gens yu?
Wa kyan elp yu fi nuo fi shuor se yu kyan tan op chrang an no tap sorv Jeuova no mata wa yu a go chuu?
CHEK OUT SOM MUO SITN
Da breda ya did get lak op iina prizn kaaz im neehn waahn miks op iina palitiks. Wach da vidiyo ya an si wa did elp im fi tan op chrang.
Luk pan wa elp da ozban an waif ya fi sorv Jeuova fi wol iip a ier iivn duo piipl a fait gens dem.
Dem A Gwaan Sorv Jeuova, Iivn Duo Tingz An Taimz Chienj (7:11)
Lorn ou yu kyan tan op chrang an no fried wen piipl a fait gens yu.
Wen wi fambili dem a fait gens wi kaaz wi a sorv Jeuova, a ou wi fi fiil bout dat, an wa kyan elp wi fi diil wid it?
“Wen Wi Lorn Di Chuut Fram Di Baibl, ‘It No Bring Piis, It Bring Waar’” (Di Wachtowa, Aktuoba 2017)