Wa It Miin Fi No Tek Said Wen It Kom Aan Tu Palitiks An Dem Ting De?

Jiizas did mek im falara dem nuo se dem no fi “komiin laka di piipl dem iina di worl.” (Jan 15:19) Dat miin se im falara dem no tek said wen it kom aan tu palitiks an waar. Bot dis no aalwiez iizi fi du. Kaaz piipl no andastan wa mek wi du dis, dem mait-a mek tingz aad fi wi. Wa kyan elp wi fi no tek no said an stik tu Jeuova no mata wa?

1. Di Kristiyan dem we a worship Gad di rait wie, ou dem fiil bout di govament dem we a ruul?

Di Kristiyan dem we a sorv Gad di rait wie rispek di govament dem. Wi du laik wa Jiizas se an “gi Siiza wa a fi’im.” Dat miin se, wi du wa di laa dem iina wi konchri se wi fi du, laik fi pie wi taks an dem ting de. (Maak 12:17) Di Baibl mek wi nuo se di govament dem we a ruul nou a ruul kaaz Jeuova lou dem fi ruul. (Ruoman 13:1) So wi si se di govament dem we a ruul ya nou no av di powa fi du evriting we dem wuda waahn fi du. A dat mek a Gad wi a chos iina, kaaz fi’im govament we de iina evn av di powa fi get rid a aal a di prablem dem we wi av.

2. Wa wi kyan du fi shuo se wi naa tek said iina palitiks an dem ting de?

Jos laik Jiizas, wi no miks op iina palitiks. Wen di piipl dem did si wan a di mirikl dem we Jiizas did du, dem did waahn fi mek im ton dem king bot im neehn mek dem dwi’it. (Jan 6:15) Wi nuo se dat neehn apm kaaz a wa im did se afta dat. Im se: “Mi no ruul laka di king dem we de iina di worl.” (Jan 18:36) Kaaz wi a fala Jiizas, wi du tingz fi shuo se wi no tek said wen it kom aan tu palitiks an dem ting de iina som difrant difrant wie. So wan a di ting dem we wi no du a dat wi no go a waar. (Riid Maika 4:3.) Wi rispek di flag an dem ting de fi wi konchri, bot wi no worship dem. (1 Jan 5:21) An wi no tek no said wen it kom aan tu di difrant difrant paati dem we a ron iina wi konchri. So wen it kom aan tu dem sitn ya, di ting dem we wi du shuo se a Gad Kindom govament wi se.

LORN SOM MUO

3. Di Kristiyan dem we a worship Gad di rait wie no tek said wen it kom aan tu palitiks an dem ting de

Jiizas an im falara dem mek wi nuo wa fi du wen it kom aan tu palitiks an dem ting de. Riid Ruoman 13:1, 5-7 an 1 Piita 2:13, 14. Den, plie di VIDIYO an den wi a-go taak bout di neks kwestiyan dem.

VIDIYO: Di Kristiyan Dem We A Worship Gad Di Rait Wie, No Tek Said Wen It Kom Aan Tu Palitiks An Dem Ting De​—Paat 1 (4:28)

• Wa mek wi fi rispek di wan dem we a ruul uova wi?

• Wa a som sitn we wi kyan du fi shuo se wi a du wa di govament se wi fi du?

Wen som konchri a fait gens dem wan aneda, som ada konchri mait-a se dem naa tek no said, bot dem stil a du tingz fi elp dem. Bot wa it riili miin fi shuo se wi naa tek no said? Riid Jan 17:16. Den, plie di VIDIYO an den wi a-go taak bout di neks kwestiyan.

VIDIYO: Di Kristiyan Dem We A Worship Gad Di Rait Wie, No Tek Said Wen It Kom Aan Tu Palitiks An Dem Ting De​—Paat 2 (3:11)

• Wa it miin fi no tek said wen it kom aan tu palitiks an dem ting de?

Wa yu fi du ef di wan dem we a ruul tel yu fi du sitn we Gad se yu no fi du? Riid Aks 5:28, 29. Den, plie di VIDIYO an den wi a-go taak bout di neks kwestiyan dem.

VIDIYO: Di Kristiyan Dem We A Worship Gad Di Rait Wie, No Tek Said Wen It Kom Aan Tu Palitiks An Dem Ting De​—Paat 3 (1:18)

• Ef wi av wan laa iina wi konchri we tel wi fi du sitn we Gad laa se wi no fi du, wa wi fi du?

• Yu kyan tingk bout no taim wen wan Kristiyan naa go du wa di wan dem we a ruul uova dem se dem fi du?

4. Shuo se yu naa tek said wen it kom aan tu palitiks an dem ting de iina di wie ou yu tingk an di ting dem we yu du

Riid 1 Jan 5:21. Den, plie di VIDIYO an den wi a-go taak bout di neks kwestiyan dem.

VIDIYO: Wa Mek Riil Kristiyan Afi Briev​—Fi No Tek No Said Iina Palitiks (2:49)

• Bies pan wa yu si iina di vidiyo, wa mek Ayenge neva get miks op miks op iina palitiks ar saluut di flag an dem ting de?

• Yu tingk im did du di rait ting?

Wa a som ada sitn we kyan mek it aad fi no tek said iina palitiks an dem ting de? Plie di VIDIYO, an den wi a-go taak bout di neks kwestiyan dem.

VIDIYO: Som Tingz We Wi Lorn Fram Di Wachtowa​—Ou Wi Kyan Shuo Se Wi Naa Tek No Said Iina Da Worl Ya? (5:16)

• Wa wi kyan du fi shuo se wi naa tek no said wen it kom aan tu di giem dem we piipl fram difrant difrant konchri plie gens dem wan aneda?

• Ou wi kyan shou se wi naa tek no said wen it kom aan tu palitiks, aal ef wa di palitishan dem du mek tingz beta ar wos fi wi?

• Ou di nyuuz an di piipl dem we wi kip kompni wid kyan mek it aad fi wi no tek said wen it kom aan tu palitiks?

DIS A WA YU FI MEMBA

Di Kristiyan dem we a worship Gad di rait wie wok aad fi no tek said wen it kom aan tu palitiks iina di wie ou dem tingk, di ting dem we dem taak bout, an wa dem du.

Wa yu did lorn iina da lesn ya?

• Wa wi fi gi di govament dem we a ruul uova wi?

• Wa mek wi no miks op iina palitiks an dem ting de?

• Wa a som a di taim dem wen it mait-a aad fi no tek said wen it kom aan tu palitiks an dem ting de?

CHEK OUT SOM MUO SITN

Wa a som a di sitn dem we wi mait-a afi gi op so dat wi no tek said wen it kom aan tu palitiks an dem ting de?

Jeuova Neehn Lef Wi (3:14)

Bifuo sitn apm we kyan mek it aad fi wi no tek said wen it kom aan tu palitiks an dem ting de, wa wi an wi fambili dem kyan du so dat wi nuo wa fi du?

Wen Wi De Somwe An Dem Waahn Wi Fi Sing Di Nashinal Antem An Dem Ting De, Wi No Fi Dwi’it (4:25)

Wa mek wen sumadi fait fi dem konchri, dat a no di bigis ting dem kyan du?

“Gad Kyan Du Evriting” (5:19)

Shuo se yu no komiin laka di piipl dem iina di worl wen it kom aan tu di kain-a wok we yu tek fi du.

“Evribadi Mos Kyari Dem Uona Luod” (Di Wachtowa, Maach 15, 2006)