Du Tingz Fi Elp Out Yu Kanggrigieshan

A uol iip a piipl de aal uova di worl iina wol iip a difrant difrant kanggrigieshan we api fi a worship Jeuova tugeda. Dem riili api se Jeuova a mek dem nuo wa fi du an a shuo dem di bes wie fi liv dem laif, an kaaz a dat dem du uol iip a tingz fi elp out dem kanggrigieshan. A so yu fiil tu?

1. Wa a som a di sitn dem we yu kyan du fi elp out iina yu kanggrigieshan?

Aal a wi kyan du tingz fi elp out iina wi kanggrigieshan. Tingk bout it, yu av nobadi iina yu kanggrigieshan we op iina iej ar dem sik? Yu tingk yu kyan elp dem fi kom a di miitn dem? Ar yu tingk yu kyan du som ada tingz fi elp dem out? Laik, yu kyan elp dem fi go bai tingz we dem niid, ar yu kyan elp dem fi kliin op dem ous ar dem yaad? (Riid Jiemz 1:27.) Wan neda ting we wi kyan du a dat wi kyan go elp out fi kliin an fiks op wi Kindom Aal. Nobadi naa fuos wi fi du dem sitn ya, bot wen wi lov Gad an wi lov wi breda an sista dem, dat a-go mek wi “wel waahn” fi du dem sitn ya.​—Saam 110:3.

Di wan dem we baptaiz kyan du nof ada tingz fi elp out. Laik di breda dem we a du wa di Baibl se dem fi du kyan get fi ton ministiiriyal sorvant an afta dat, dem kyan get fi ton elda. Plos di breda an sista dem kyan get fi ton paiyanier, an dis wi mek dem kyan get fi du muo iina di wok we wi du fi priich tu piipl an tiich dem. Som a di breda an sista dem kyan go elp fi bil Kindom Aal an dem ting de, ar dem kyan muuv go elp out iina wan neda kanggrigieshan we niid muo piipl fi elp dem.

2. Ou wi kyan yuuz wi moni an di ting dem we wi av fi elp di kanggrigieshan?

Wi kyan yuuz ‘eniting we wi av we gud an we wot nof tu wi fi big op Jeuova.’ (Pravorbz 3:9) It riili nais se wi get fi gi wi moni an ada tingz fi elp wi kanggrigieshan an fi elp out wid di wok we a gwaan fi priich tu piipl aal uova di worl. (Riid 2 Korintiyan 9:7.) Pan tap a dat, di moni an dem ting de we wi gi elp out wi breda an sista dem wen orikien an dem ting de gwaan. Nof piipl “pudong paat a di moni” we dem av so dat dem kyan av sitn fi gi tu Jeuova. (Riid 1 Korintiyan 16:2.) Wi kyan put moni iina di baks dem we de a wi Kindom Aal dem an we de a wi kanvenshan an dem ting de, ar wi kyan go pan donate.jw.org. It riili nais se Jeuova gi aal a wi di chaans fi shuo im se wi lov im wen wi gi moni an dem ting de fi elp out.

LORN SOM MUO

3. Wi kyan gi moni an ada tingz we wi av

Jeuova an Jiizas lov piipl we api fi gi tingz tu ada piipl. Jiizas did big op wan uman uufa ozban did ded fi di moni we shi gi tu Jeuova iivn duo a likl bit a moni shi did gi. Riid Luuk 21:1-4, an den wi a-go taak bout dem kwestiyan ya:

• Wi afi gi nof moni fi Jeuova api wid wa wi gi?

• Ou Jeuova an Jiizas fiil bout di moni an ada tingz we wi gi fram wi aat?

Fi si som a di tingz we dem yuuz di moni we wi gi fi du, plie di VIDIYO. Den wi a-go taak bout di neks kwestiyan.

VIDIYO: Sitn We Wi Kyan Gi Jeuova (4:47)

• Ou di moni we wi gi a elp di breda an sista dem aal uova di worl?

4. Wi fi redi fi elp out

Iina di taim wen di Baibl did a rait, Jeuova piipl dem did wok aad fi fiks op di plies dem we dem worship im an a neehn jos moni dem did gi fi elp out. Riid 2 Kranikl 34:9-11, an den wi a-go taak bout da kwestiyan ya:

• Ou di Izrelait dem did elp fi fiks op bak Gad ous?

Fi si ou di Jeuova Witnis dem du laik we dem yuus tu du iina Baibl taim, plie di VIDIYO. Den wi a-go taak bout di neks kwestiyan dem.

VIDIYO: Tingz We Wi Du Fi Kliin Wi Kindom Aal Dem An Fiks Dem Op (3:31)

• Wa mek it gud fi wi mek shuor se wi Kindom Aal dem eva luk nais an kliin?

• Wa a som sitn we yu kyan du fi elp out?

5. Di breda dem kyan chrai fi du muo tingz iina di kanggrigieshan

Di Baibl mek wi nuo se di breda dem iina di kanggrigieshan fi chrai fi du evriting we dem kyan du fi elp out. Fi si sumadi we a wok fi du dis, plie di VIDIYO. Den ansa di neks kwestiyan.

VIDIYO: Di Breda Dem Fi Chrai Fi Elp Out Muor (5:19)

• Iina di vidiyo, wa a som a di sitn dem we Ryan did du so dat im kuda elp out muor iina im kanggrigieshan?

Di Baibl mek wi nuo ou di breda dem we a elda an ministiiriyal sorvant fi liv dem laif. Riid 1 Timoti 3:1-13, an den wi a-go taak bout dem kwestiyan ya:

• Ef wan breda waahn fi ton elda ar ministiiriyal sorvant, ou im fi a liv im laif?

• A ou im waif an pikni dem fi a biyiev?​—Luk pan vors 4 an 11.

• Wen di breda dem wok aad fi du dem sitn ya, wa gud dat kyan du fi di ada breda an sista dem iina di kanggrigieshan??

DIS A WA YU FI MEMBA

Jeuova riili api wen im si ou wi a yuuz wi moni an di sitn dem we wi av fi du evriting we wi kyan du fi elp out di kanggrigieshan.

Wa yu did lorn iina da lesn ya?

• Wa a som a di sitn dem we wi kyan du fi elp out iina wi kanggrigieshan?

• Ou wi kyan yuuz wi moni an di ada ting dem we wi av fi elp out di kanggrigieshan?

• Wa a som a di sitn dem we yu wuda laik fi du fi elp di kanggrigieshan?

CHEK OUT SOM MUO SITN

Luk pan wa mek Gad naa aks di piipl dem we a sorv im tide fi pie taid.

“Di Sitn We Piipl Gi We Niem Taid, A Wa Di Baibl Se Bout Dat?” (Sitn we yu kyan get pan di websait)

Di Baibl mek wi nou se a man we baptaiz fi du sortn an sortn tingz. Bot sopuoz wan uman we baptaiz afi du som a dem tingz ya?

“Iina Di Kanggrigieshan, Andastan Uu A Yu Ed?” (Di Wachtowa, Febiweri 2021)

Luk pan som breda we neehn fried fi kya di buk an pamplet dem we di breda an sista dem niid go gi dem.

Tingz We Dem Du Iina Kanggo Fi Mek Shuor Se Di Breda An Sista Dem Get Di Buk An Pamplet Dem (4:25)

Fain out ou di wie ou di Jeuova Witnis dem get moni fi du di wok we dem a du difrant fram ou di ada choch dem dwi’it.

“Ou Di Jeuova Witnis Dem Get Moni Fi Du Di Wok We Dem A Du?” (Sitn we yu kyan get pan di websait)