LESN 19

Di Jeuova Witnis Dem A Kristiyan?

Di Wan We Print

Ye, di Jeuova Witnis dem a Kristiyan. Wa mek wi se so? Iina da lesn ya, wi a-go fain out wa mek wi se so. Wi a-go luk pan wa mek wi biliiv di sitn dem we wi biliiv, ou wi niem mek wi difrant fram di ada choch piipl dem, an yu a-go si umoch wi lov wi wan aneda.

1. Wa mek di Jeuova Witnis dem biliiv di ting dem we dem biliiv?

Jiizas se: “[Gad] mesij a di chuut.” (Jan 17:17) So jos laik ou evriting we Jiizas biliiv iina kom fram Gad Wod, a siem wie so wa di Jeuova Witnis dem biliiv kom fram Gad Wod tu. Yu si wen di Jeuova Witnis dem staat op iina di 1870’z, dem staat fi stodi di Baibl aad aad. Di ting dem we dem biliiv iina kom fram di Baibl. An it neehn mata ef wa dem biliiv iina did difrant fram wa di ada choch dem did biliiv iina. An dem staat fi tel di ada piipl dem bout di sitn dem we dem a lorn fram di Baibl.a

2. Wa mek wi kaal wiself Jeuova Witnis?

Jeuova se a di piipl dem we a sorv im a im witnis kaa dem taak di chuut bout im. An dat a wa im did se bout di Izrelait dem we did a sorv im. Im se tu dem se: “Unu a mi witnis.” (Riid Aizaiya 43:10.) Di Baibl tel wi se Jiizas taak di chuut bout Gad. So yu si, aal Jiizas a wan witnis tu kaa im “taak di chuut bout Gad.” (Revilieshan 1:5) So iina 1931, wi staat fi kaal wiself Jeuova Witnis an wi proud a wi niem.

3. Ou di Jeuova Witnis dem shuo se dem lov dem wan aneda laik ou Jiizas did lov im falara dem?

Jiizas did lov im falara dem so moch dat dem komiin laik im uona fambili. (Riid Maak 3:35.) A siem so, no mata wich paat di Jeuova Witnis dem de, aal uova di worl, dem komiin laik wan fambili. An a dat mek wi kaal wi wan aneda breda an sista. (Failiiman 1, 2) Wi a du wa di Baibl se wi fi du. It se: “Unu fi lov di ada piipl dem we biliiv iina Gad tu.” (1 Piita 2:17) Di Jeuova Witnis dem mek dem breda an sista dem si se dem lov dem. So eni wich paat di breda an sista dem de aal uova di worl we niid elp, dem go elp dem.

LORN SOM MUO

Luk pan som muor sitn bout di Jeuova Witnis dem, an si som ada riizn we mek wi se wi a Kristiyan.

Som picha: Som Jeuova Witnis a priich. 1. Wan sista a riid wan skripcha an a taak bout it wid wan uman. 2. Wan breda a tan op a di kyaat an a priich tu wan man. — Evriting we chuu Kristiyan biliiv kom fram di Baibl, an dem tel ada piipl bout wa dem biliiv

4. Di ting dem we wi biliiv iina kom fram di Baibl

Jeuova se im wuda mek piipl nuo di chuut we de iina im Wod. Riid Daniyel 12:4, an den wi a-go taak bout da kwestiyan ya:

Wen Gad piipl gwaan stodi di Baibl, wa ‘uol iip a dem wuda get fi nuo’?

Luk pan ou som piipl fram wie bak wen, an wan a dem we did niem Charles Russell, did stodi Gad Wod. Plie di VIDIYO, an den wi a-go taak bout di neks kwestiyan.

VIDIYO: Ou Dem Did Fain Di Chuut We De Iina Di Baibl Agen (7:45)

Iina da vidiyo ya, wen Charles Russell an di ada wan dem did a stodi di Baibl tugeda, wa dem did du?

Yu did nuo se?

Som a di taim dem, wi afi chienj op som a di ting dem we wi did biliiv iina. Wa mek wi afi dwi’it? Wen maanin dis a lait, yu naa go si evriting pan lan siem taim. Bot wen di son staat kom op, likl bai likl, yu a-go si evriting. A siem so, Gad no mek wi nuo evriting wan taim. Im mek wi get wa im Wod a se likl bai likl. (Riid Pravorbz 4:18.) So di Baibl no chienj. Bot wen wi get fi andastan wa it a se, wi chienj op di sitn dem we wi yuus tu biliiv iina so dat it lain op wid wa di Baibl a se.

5. Wi a witnis fi Jeuova, jos laik wa wi niem se

Wa mek wi kaal wiself Jeuova Witnis? Plie di VIDIYO, an den wi a-go taak bout di neks kwestiyan.

VIDIYO: Wan Niem We Tel Yu Uu Wi Bi (2:40)

Wa mek it mek sens se wi kaal wiself Jeuova Witnis?

Wa mek Jeuova pik piipl fi bi im witnis? Im du dat kaa dem piipl de wuda mek piipl nuo se a im a di chuu Gad, kaa a wol iip a lai piipl tel pan im. Si tuu a di lai we dem tel pan im ya.

Som choch tiich piipl se Gad waahn piipl fi yuuz sitn we piipl mek, wen dem a worship Gad. Bot riid wa Livitikos 26:1 se, an den wi a-go taak bout dem kwestiyan ya:

A wa di Baibl riili tiich se? Ou Jeuova fiil bout di sitn dem we piipl mek an ton iina gad?

Som a di choch liida dem tiich se Jiizas a Gad. Bot riid Jan 20:17, an den wi a-go taak bout dem kwestiyan ya:

A wa di Baibl riili tiich se? It tiich se Jiizas an Gad a di siem sumadi?
So ou yu fiil fi nuo se Jeuova av im piipl dem we a im witnis, we a tiich di chuut bout im an im Son?

6. Wi lov wi wan aneda

Di Baibl se di Kristiyan dem komiin laik di difrant difrant paat dem we de iina di badi. Riid 1 Korintiyan 12:25, 26, an den wi a-go taak bout dem kwestiyan ya:

Wa di chuu Kristiyan dem fi du wen dem si dem breda an sista dem a sofa?
Wa yu si di Jeuova Witnis dem a du we mek yu si se dem lov dem wan aneda?

No mata wich paat iina di worl di Jeuova Witnis dem de, ef sitn apm an dem en op a sofa, dem breda an sista dem we de aal uova di worl, a-go kwik fi elp dem. Plie di VIDIYO fi si wa did apm iina Haiti, an den wi a-go taak bout da kwestiyan ya:

VIDIYO: Haiti Mek It Chuu Orikien Matyu (5:29)

Ou di ting dem we di Jeuova Witnis dem du fi elp out dem breda an sista dem, we go chuu orikien an dem tingz de, shuo se dem lov dem wan aneda?

Tuu Jeuova Witnis a elp wan uman an ar pikni we jos go chuu wan orikien ar sitn laik dat. Dem rap dem op iina sitn an gi dem waata fi jringk. — Chuu Kristiyan elp out di wan dem we niid elp, an dis shuo se dem lov dem

SUMADI MAIT-A SE: “Di Jeuova Witnis dem choch dis kom bout.”

A fram wen Jeuova a kaal di piipl dem we a sorv im im witnis?

DIS A WA YU FI MEMBA

Ye man, di Jeuova Witnis dem a Kristiyan. Wi de aal uova di worl, an wi kluos bad. Wi komiin laik fambili. An evriting we wi biliiv iina kom fram di Baibl, an wi tiich piipl di chuut bout Jeuova.