7. Di laa dem we Gad govament av beta dan evri ada laa

Di laa dem we di govament dem av tide supuoz fi elp di piipl dem we liv iina dem konchri. A siem so, Gad govament av laa tu we di piipl dem fi fala. Riid 1 Korintiyan 6:9-11, an den wi a-go taak bout dem kwestiyan ya:

• Wa yu tingk di worl wuda komiin laik ef evribadi a du wa Gad waahn dem fi du?a

• Yu tingk it fier fi Jeuova ekspek se di wan dem we a liv wen im govament a ruul fi du wa im se? Wa mek yu se so?

• Wa mek wi nuo se piipl we naa du wa Jeuova waahn dem fi du kyan chienj an staat fi dwi’it?​—Luk pan vors 11.

Wol iip a piipl fiil a wie fi taak bout seks. Bot yu nuo se di Baibl taak bout seks duo? Bot wen di Baibl taak bout seks, it taak bout it iina wan gud wie, an wa it se kyan du wi gud. An it mek sens se wa di Baibl se bout seks a-go gud fi wi, kaaz a Jeuova mek wi an im nuo di bes ting fi wi. Im mek wi nuo wa wi kyan du fi mek im api, an wa fi du ef wi waahn fi api nou an fi eva.

1. Wa Jeuova av fi se bout seks?

Seks a wan prezent fram Jeuova. Im waahn wan man an wan uman we marid tu dem wan aneda fi enjai it. Im no onggl mek it so dem kyan av pikni, bot im mek it so dem kyan shuo ou dem lov dem wan aneda an enjai it di wie ou Gad waahn dem fi enjai it. A dat mek di Baibl tel wi se: “Yu fi fiil gud wid di waif we yu av fram yu yong.” (Pravorbz 5:18, 19) Jeuova waahn di Kristiyan dem we marid fi stik tu dem wan aneda, so dem wudn sliip wid sumadi we dem no marid tu.​—Riid Iibruu 13:4.

2. A wa a seks sin?

Di Baibl mek wi nuo se “di piipl dem we tek paat iina aal kain-a seks sin . . . naa go tek paat iina Gad Kindom.” (1 Korintiyan 6:9, 10) Di man dem we rait di Baibl iina di Griik langwij, dem yuuz di wod por·neiʹa fi taak bout seks sin. Da wod de av fi du wid (1) piipl we sliipa wid piipl we dem no marid tu, (2) man we sliip wid man, an uman we sliip wid uman, an (3) piipl we av seks wid animal. Wi a du wa Jeuova waahn wi fi du an it a du wi gud wen wi “kip we fram aal kain-a seks sin.”​—1 Tesaluoniyan 4:3.

LORN SOM MUO

3. Ron we fram aal kain-a seks sin

Wan man we chos iina Gad we niem Juozif did afi ron we fram wan uman we did waahn av seks wid im so dat im kuda du tingz Jeuova wie. Riid Jenisiz 39:1-12, an den wi a-go taak bout dem kwestiyan ya:

• Wa mek Juozif did ron we fram Patifa waif? ​—Luk pan vors 9.

• Yu tingk Juozif did du di rait ting? An wa mek yu se so?

VIDIYO: Ron We Fram Seks Sin (5:06)

Jeuova waahn wi kip we fram seks sin. Riid 1 Korintiyan 6:18, an den wi a-go taak bout dem kwestiyan ya:

• Som piipl we en op iina seks sin, wa a som sitn we kuda kaaz dem fi dwi’it?

• Wa kyan elp yu fi kip we fram seks sin?

4. Yu kyan kip we fram eniting we wi kaaz yu fi sin

VIDIYO: Wen Yu Riid Di Baibl, It Kyan Elp Yu Fi Tan We Fram Eniting We Wi Kaaz Yu Fi Sin (3:02)

• Wen di breda iina da vidiyo ya si se di sitn dem we im did a tingk bout kuda mek im go gi im waif bon, wa dat did mek im du?

Wen it kom aan tu seks, aal wan Kristiyan we a sorv Jeuova di rait wie mait-a fain it aad fi tek im main aafa tingz we im nuo se no rait. Wa kyan elp yu fi tap tingk bout tingz we yu nuo se no rait? Riid Filipiyan 4:8, an den wi a-go taak bout dem kwestiyan ya:

• Wa kain-a tingz wi fi a tingk bout?

• Wen wi riid di Baibl an kip wiself bizi wid Jeuova bizniz, ou dem sitn ya kyan elp wi fi kip we fram seks sin?

5. Di wie ou Jeuova waahn wi fi liv a fi wi uona gud

VIDIYO: Sumadi We No Av Moch Sens (9:31)

• Ou di yong bwai en op wich paat im did de we mek im kuda get iina chobl?​—Luk pan Pravorbz 7:8, 9.

• Azkaadn tu Pravorbz 7:23, 26, seks sin kaaz wol iip a prablem. Ef wi kip we fram seks sin, wa a som prablem we wi naa go av?

• Wen wi kip we fram seks sin, ou it kyan mek wi api nou an fi eva?

Som piipl tingk se Gad wikid kaaz a ou di Baibl tel wi se im fiil bout wen man sliip wid man an uman sliip wid uman. Bot Jeuova Gad lov wi an im waahn evribadi fi api nou an fi eva. Fi get da laif de, wi afi liv ou Jeuova waahn wi fi liv. Riid 1 Korintiyan 6:9-11, an den wi a-go taak bout da kwestiyan ya:

• Bies pan ou Jeuova luk pan tingz, ef wan man fiil fi sliip wid wan man ar wan uman fiil fi sliip wid wan uman, a onggl dem fiilinz de rang?

Yu tingk it mek sens fi wi chienj op wi laif fi mek Gad api? Riid Saam 19:8, 11, an den wi a-go taak bout dem kwestiyan ya:

• Wen it kom aan tu seks sin an dem ting de, yu tingk wa Jeuova se bout it fier? Wa mek yu se so?

DIS A WA YU FI MEMBA

Seks a wan nais sitn we Jeuova gi wan man an wan uman we marid so dat dem kyan enjai it.

Wa yu did lorn iina da lesn ya?

• Wa an wa di Baibl se a seks sin?

• Wa a-go elp wi fi kip faar fram seks sin?

• Ou wi a-go betaraaf wen wi du wa Jeuova se wi fi du an kip we fram aal kain-a seks sin?

CHEK OUT SOM MUO SITN

Lorn wa mek Gad waahn wan man an wan uman we liv tugeda fi marid.

“Wa Di Baibl Av Fi Se Bout Wan Man An Wan Uman We De Wid Dem Wan Aneda Bot Dem No Marid?” (Sitn we yu kyan get pan di websait)

Lorn wa mek wen di Baibl se man no fi sliip wid man an uman no fi sliip wid uman it no miin se wi fi iet di piipl dem we du dat.

“It Rang Fi Man Sliip Wid Man An Uman Sliip Wid Uman?” (Sitn we yu kyan get pan di websait)

Luk pan ou wa Gad se bout seks protek wi.

“Wen Sumadi Yuuz Dem Mout Fi Av Seks, A Seks Dat?” (Sitn we yu kyan get pan di websait)

Luk pan wa elp wan man we yuus tu sliip wid man fi chienj op im wiez fi mek Gad api iina im tuori we niem “Dem Chriit Mi Gud.”

“Di Baibl Chienj Piipl Laif Fi Di Beta” (Di Wachtowa, Iepril 1, 2011)

Iivn duo yu lov Jeuova wid aal a yu aat an yu riili chrai aad fi no du notn we yu nuo a-go ort im, som a di taim yu stil a go du som tingz we rang. Bot som tingz wos dan som. (1 Korintiyan 6:9, 10) Ef yu fain se yu du sitn we riili bad, memba se Jeuova stil lov yu an im wel waahn fi figiv yu an elp yu fi du wa rait.

1. Ef wi waahn Jeuova fi paadn wi, wa wi fi du?

Di piipl dem we lov Jeuova, wen dem si se dem du sitn we Jeuova iet, dat mek dem sad bad. Bot wen dem tingk bout wa Jeuova se tu im piipl dem iina Aizaiya 1:18, it mek dem fiil beta. Im se: “Iivn duo unu sin dem red laka blod, dem gweehn get wait laka sunuo.” Ef wi shuo se wi riili sari fi di bad sitn dem we wi du an wi tap dwi’it, Jeuova a-go paadn wi. Bot wa a-go shuo se wi riili riili sari? Wi afi tap du di bad sitn we wi a du an beg Jeuova fi paadn wi. Den wi afi wok riili aad fi tap tingk di wie ou wi did a tingk, an tap du di sitn dem we wi aalwiez a du we did kaaz wi fi sin iina di fos plies. An wi afi du wi bes fi liv di wie ou Jeuova waahn wi fi liv.​—Riid Aizaiya 55:6, 7.

2. Wen wi sin, a ou Jeuova yuuz di elda dem fi elp wi?

Ef wi fain se wi du sitn we riili bad, Jeuova tel wi se wi fi “aks di choch liida dem”​—dat a di elda dem, fi kom elp wi. (Riid Jiemz 5:14, 15.) Dem man ya we Gad pik fi tek kier a wi, dem lov Jeuova an dem lov di piipl dem we a sorv im tu. Dem kyan elp wi so dat wi an Jeuova kyan bi gud gud fren agen kaaz Jeuova chrien dem fi mek wi nuo wa fi du.​—Gyalieshan 6:1.

So ef wi du sitn we riili bad, a ou di elda dem kyan elp wi? Ier wa dem a-go du: Tuu ar chrii elda a-go miit wid wi, an dem a-go yuuz di Baibl fi karek wi an shuo wi ou fi liv rait fi elp wi fi no sin agen. Enibadi we du sitn we rang an no shuo se dem sari bout di wikid sitn we dem du, di elda dem a-go put dem outa di kanggrigieshan. Di elda dem afi du dis fi kip di ada breda an sista dem sief, so dat dem no staat du dem bad sitn de tu.

LORN SOM MUO

3. Wen wi tel Jeuova an di elda dem bout sitn riili bad we wi du, dat kyan elp wi fi du wa rait agen

Enitaim wi sin wi ort Jeuova, so a im wi fi tel bout di bad sitn dem we wi du. Riid Saam 32:1-5, an den wi a-go taak bout da kwestiyan ya:

• Wa mek it gud fi tel Jeuova bout di bad sitn dem we wi du an no bada chrai aid dem fram im?

VIDIYO: “Jeuova Ponish Uu Im Lov” (3:01)

• Iina di vidiyo, wa di elda dem did du fi elp Canon fi kom bak kom sorv Jeuova agen?

Wen wi a taak tu di elda dem, wi fi mek dem nuo wa riili a gwaan an wi no fi aid notn kaaz dem de de fi elp wi. Riid Jiemz 5:16, an den wi a-go taak bout da kwestiyan ya:

• Wen wi mek di elda dem nuo wa riili a gwaan wid wi, ou dat mek it iiziya fi dem elp wi?

4. Jeuova shuo se im gud an kain tu di wan dem we sin bad

Sumadi a-go get put outa di kanggrigieshan ef dem du sitn wikid an dem a shuo se dem no waahn fi du wa Jeuova se dem fi du. An wi naa go a chat op chat op tu dem ar a spen taim wid dem niida. Riid 1 Korintiyan 5:6, 11, an den wi a-go taak bout da kwestiyan ya:

• Wen sumadi a mek bred, a jos likl bit a yiis dem niid fi mek di uol duo swel op. So ef wi spen taim wid sumadi we du sitn wikid an naa shuo se dem sari bout it, wa dat kyan du tu di res a wi we iina di kanggrigieshan?

• Wen wi luk pan ou Jeuova diil wid di wan dem we sin bad, ou dat mek wi si se im lov piipl, im fier an im gud an kain tu dem?

5. Wen wi shuo se wi riili sari fi di bad sitn we wi du, Jeuova wi paadn wi

Jiizas did yuuz wan tuori we elp wi fi nuo ou Jeuova fiil wen sumadi du sitn bad an shuo se dem riili sari bout it. Riid Luuk 15:1-7, an den wi a-go taak bout da kwestiyan ya:

• Wa dis tiich yu se bout Jeuova?

Riid Iziikel 33:11, an den wi a-go taak bout da kwestiyan ya:

• Wa sumadi afi du fi shuo se dem riili sari fi di bad sitn we dem did du?

DIS A WA YU FI MEMBA

Ef wi du wan bad sitn we Jeuova iet an wi shuo se wi riili sari bout it an wi mek op wi main fi tap dwi’it, Jeuova wi paadn wi.

Wa yu did lorn iina da lesn ya?

• Wa mek it gud fi wi tel Jeuova bout di bad sitn dem we wi du?

• Ef wi waahn Jeuova fi paadn wi, wa wi afi du?

• Ef wi du sitn we riili bad we Jeuova iet, wa mek wi fi go tu di elda dem fi dem elp wi?

CHEK OUT SOM MUO SITN

Luk pan ou wan man get fi si se Jeuova gud an kain iina di wie ou im paadn wi sin dem laik wa wi si a Aizaiya 1:18.

Aalwiez Memba Se Jeuova Gud An Kain (5:02)

Ou di elda dem chrai fi elp di wan dem we sin bad?

“Ou Di Elda Dem Kyan Shuo Se Dem Lov Di Wan Dem We Sin Bad An Chriit Dem Iina Wan Kain Wie?” (Di Wachtowa, Aagos 2024)

Luk pan ou wi chriit di wan dem we sin bad an naa shuo se dem sari fi di bad sitn we dem du iina wan kain wie an shuo dem se wi stil lov dem.

“Ou Di Elda Dem Kyan Elp Di Wan Dem We Get Put Outa Di Kanggrigieshan?” (Di Wachtowa, Aagos 2024)

Luk pan da tuori ya we niem “Mi Did Afi Kom Bak Kom Sorv Jeuova” fi si wa mek wan man we did lef di chuut se a Jeuova elp im fi kom bak.

“Di Baibl Chienj Piipl Laif Fi Di Beta” (Di Wachtowa, Iepril 1, 2012)