LESN 20

Ou Tingz Ron Iina Di Kanggrigieshan Dem?

Di Wan We Print

Jeuova a wan Gad we no lov kanfyuuzhan. (1 Korintiyan 14:33) Im waahn tingz ron sortn an sortn wie. So wi nuo se im wuda waahn tingz fi ron sortn an sortn wie iina di kanggrigieshan tu. So ou tingz ron iina di kanggrigieshan dem? An wa wi kyan du fi mek it gwaan ron gud?

1. A uu a di ed a di kanggrigieshan dem?

“Krais Jiizas a di ed fi di choch.” (Ifiijan 5:23) Jiizas de a evn a ron tingz fi Jeuova piipl we de aal uova di worl. Jiizas pik di “waiz sorvant.” Da waiz sorvant de a wan gruup a elda. A no wol iip a dem iina da gruup de, an a dem dem kaal di Govanin Badi tu. (Riid Matyu 24:45-47.) Di apasl dem an di elda dem iina Jeruusilem we did de bout wen di Baibl did a rait, did a tel di piipl dem ou fi du tingz iina di kanggrigieshan. A siem so tide, di Govanin Badi a tel di piipl dem we de iina di kanggrigieshan dem ou dem fi du tingz iina dem. (Aks 15:2) Bot yu si dem man ya, a no dem a ron tingz iina di aaganaizieshan. Eniting we dem man ya a du, dem riid di Baibl an fain out wa Jeuova waahn dem fi du, an den dem dwi’it. An dem wilin fi du wa Jiizas waahn dem fi du.

2. Wa a di wok we di elda dem du iina di kanggrigieshan?

Di elda dem a som man we a Kristiyan, we a du tingz di wie ou Krais waahn dem fi dwi’it. So dem yuuz di Baibl fi tiich Jeuova piipl, an dem du tingz fi tek kier a dem. An dem push di breda an sista dem fi gwaan du wa rait. Dem no get no moni fi di wok we dem a du. Bot wen dem a du dem wok, ‘dem no du it kaaz nobadi a fuos dem fi du it bot kaaz dem waahn fi du it. A so Gad waahn it fi go. Dem no du it kaaz dem waahn moni niida bot dem du it kaaz dem riili waahn fi elp [piipl].’ (1 Piita 5:1, 2) Yu av som breda we elp di elda dem we wi kaal ministiiriyal sorvant. A som a dem siem breda de, afta a taim, ton elda tu.

Di Govanin Badi pik som elda fi ton sorkit uovasiya. Dem sorkit uovasiya ya go a di difrant difrant kanggrigieshan dem fi elp di breda an sista dem fi si ou dem kyan du tingz di rait wie, an fi gwaan push dem so dat dem no gi op. Wen di sorkit uovasiya dem go a di kanggrigieshan dem, a dem pik di breda dem we a du wa di skripcha dem se dem fi du fi ton elda an ministiiriyal sorvant.—1 Timoti 3:1-10, 12; Taitos 1:5-9.

3. Wa kain-a wok aal a di Witnis dem fi a du?

Evribadi we de iina di kanggrigieshan “big op Jeuova niem” wen dem tek paat iina wa a gwaan iina di miitn dem, an wen dem du evriting we dem kyan du fi go a fiil sorvis an priich tu piipl.—Riid Saam 148:12, 13.

LORN SOM MUO

Fain out bout ou Jiizas a liid di kanggrigieshan, an si ou di elda dem kyan chrai fi du laik im. An wi a-go fain out ou wi kyan du we Jiizas an di elda dem se wi fi du.

4. Jiizas a wan liida we gud an kain

Jiizas se wi fi kom tu im mek im du sitn gud fi wi. Riid Matyu 11:28-30, an den wi a-go taak bout da kwestiyan ya:

Ou Jiizas waahn wi fi fiil bout di sitn dem we im aks wi fi du, an im a wa kain-a liida?

Ou di elda dem fala Jiizas an du di sitn dem laik wa Jiizas a du? Plie di VIDIYO.

VIDIYO: Wen Di Ortkwiek Did Gwaan Iina Nepal, Dis A Wa Di Elda Dem Did Du (4:56)

Di Baibl tel wi klier klier ou di elda dem fi du di wok we dem a du iina di kanggrigieshan.

Riid Aizaiya 32:2 an 1 Piita 5:1-3, an den wi a-go taak bout dem kwestiyan ya:

Ou it mek yu fiil fi nuo se di siem ting we Jiizas du, a dat di elda dem a du fi tek kier a unu an mek unu fiil gud?
Wa a som ada sitn di elda dem a du we shuo se dem a fala Jiizas?

5. Wi lorn wa fi du fram di sitn dem we di elda dem a du

A ou Jiizas waahn di elda dem fi fiil bout di wok we dem a du? Plie di VIDIYO.

VIDIYO: Di Elda Dem Du Di Wok Fos! (7:39)

A Jiizas mek di elda dem nuo wa dem fi du iina di kanggrigieshan. Riid Matyu 23:8-12, an den wi a-go taak bout da kwestiyan ya:

Wa yu laik bout wa di Baibl se di elda dem fi a du, an ou dat difrant fram wa yu si di choch liida dem a du?

A. Som picha: Wan elda a mek shuor se im an im fambili a stodi Gad Wod an a du wa it se dem fi du. 1. Im a prie bifuo im stodi Gad Wod. 2. Im an im waif a tiich dem daata bout di Baibl.

B. Da siem elda de an im waif a luk fi wan sista we de iina dem kanggrigieshan we sik an de a aspital.

Di elda dem mek shuor se dem an dem fambili a stodi Gad Wod an a du wa it se dem fi du
Di elda dem tek kier a evribadi we de iina di kanggrigieshan
Di elda dem go out iina fiil sorvis aafn
Di elda dem a tiich wi wa fi du, an dem elp fi kliin an du ada tingz tu

6. Wi fi du wa di elda dem tel wi fi du

Di Baibl tel wi wa mek wi fi du wa di elda dem tel wi fi du. Riid Iibruu 13:17, an den wi a-go taak bout dem kwestiyan ya:

Yu tingk it fier se di Baibl tel wi se wi fi lisn tu di elda dem an du wa dem tel wi fi du, an se wi no fi fait gens dem? Wa mek yu se so?

Riid Luuk 16:10, an den wi a-go taak bout da kwestiyan ya:

Wa mek wi fi du wa di elda dem se wi fi du iivn ef a no wan big sitn dem tel wi fi du?

SUMADI MAIT-A SE: “Yu no afi jain wan choch fi sorv Gad.”

Wa a som gud sitn yu tingk kyan apm tu sumadi wen dem worship Gad wid ada piipl iina wan kanggrigieshan?

DIS A WA YU FI MEMBA

Jiizas a di ed a di kanggrigieshan, an di elda dem a du wa im tel dem fi du. So wi api fi du wa di elda dem tel wi fi du, kaa dem chriit wi gud an dem kain tu wi. An wa dem tel wi fi du a di bes ting fi wi, an a it dem a du tu.