LESN 57
Wa Kyan Elp Yu Ef Yu Du Sitn Riili Bad We Jeuova Iet?
Iivn duo yu lov Jeuova wid aal a yu aat an yu riili chrai aad fi no du notn we yu nuo a-go ort im, som a di taim yu stil a go du som tingz we rang. Bot som tingz wos dan som. (1 Korintiyan 6:9, 10) Ef yu fain se yu du sitn we riili bad, memba se Jeuova stil lov yu an im wel waahn fi figiv yu an elp yu fi du wa rait.
1. Ef wi waahn Jeuova fi paadn wi, wa wi fi du?
Di piipl dem we lov Jeuova, wen dem si se dem du sitn we Jeuova iet, dat mek dem sad bad. Bot wen dem tingk bout wa Jeuova se tu im piipl dem iina Aizaiya 1:18, it mek dem fiil beta. Im se: “Iivn duo unu sin dem red laka blod, dem gweehn get wait laka sunuo.” Ef wi shuo se wi riili sari fi di bad sitn dem we wi du an wi tap dwi’it, Jeuova a-go paadn wi. Bot wa a-go shuo se wi riili riili sari? Wi afi tap du di bad sitn we wi a du an beg Jeuova fi paadn wi. Den wi afi wok riili aad fi tap tingk di wie ou wi did a tingk, an tap du di sitn dem we wi aalwiez a du we did kaaz wi fi sin iina di fos plies. An wi afi du wi bes fi liv di wie ou Jeuova waahn wi fi liv.—Riid Aizaiya 55:6, 7.
2. Wen wi sin, a ou Jeuova yuuz di elda dem fi elp wi?
Ef wi fain se wi du sitn we riili bad, Jeuova tel wi se wi fi “aks di choch liida dem”—dat a di elda dem, fi kom elp wi. (Riid Jiemz 5:14, 15.) Dem man ya we Gad pik fi tek kier a wi, dem lov Jeuova an dem lov di piipl dem we a sorv im tu. Dem kyan elp wi so dat wi an Jeuova kyan bi gud gud fren agen kaaz Jeuova chrien dem fi mek wi nuo wa fi du.—Gyalieshan 6:1.
So ef wi du sitn we riili bad, a ou di elda dem kyan elp wi? Ier wa dem a-go du: Tuu ar chrii elda a-go miit wid wi, an dem a-go yuuz di Baibl fi karek wi an shuo wi ou fi liv rait fi elp wi fi no sin agen. Enibadi we du sitn we rang an no shuo se dem sari bout di wikid sitn we dem du, di elda dem a-go put dem outa di kanggrigieshan. Di elda dem afi du dis fi kip di ada breda an sista dem sief, so dat dem no staat du dem bad sitn de tu.
LORN SOM MUO
Yu a-go get fi andastan beta ou Jeuova elp wi ef wi du sitn riili bad an ou wi kyan shuo im se wi riili tangk im fi dat.
3. Wen wi tel Jeuova an di elda dem bout sitn riili bad we wi du, dat kyan elp wi fi du wa rait agen
Enitaim wi sin wi ort Jeuova, so a im wi fi tel bout di bad sitn dem we wi du. Riid Saam 32:1-5, an den wi a-go taak bout da kwestiyan ya:
Wa mek it gud fi tel Jeuova bout di bad sitn dem we wi du an no bada chrai aid dem fram im?
Afta wi tel Jeuova bout di bad sitn dem we wi du, it gud fi tel di elda dem tu so dat dem kyan elp wi. Plie di VIDIYO, an den wi a-go taak bout di neks kwestiyan.
Iina di vidiyo, wa di elda dem did du fi elp Canon fi kom bak kom sorv Jeuova agen?
Wen wi a taak tu di elda dem, wi fi mek dem nuo wa riili a gwaan an wi no fi aid notn kaaz dem de de fi elp wi. Riid Jiemz 5:16, an den wi a-go taak bout da kwestiyan ya:
Wen wi mek di elda dem nuo wa riili a gwaan wid wi, ou dat mek it iiziya fi dem elp wi?
Mek Jeuova an di elda dem nuo bout di bad sitn dem we yu du. Tel di elda dem di chuut an tek di elp we Jeuova a gi yu
4. Jeuova shuo se im gud an kain tu di wan dem we sin bad
Sumadi a-go get put outa di kanggrigieshan ef dem du sitn wikid an dem a shuo se dem no waahn fi du wa Jeuova se dem fi du. An wi naa go a chat op chat op tu dem ar a spen taim wid dem niida. Riid 1 Korintiyan 5:6, 11, an den wi a-go taak bout da kwestiyan ya:
Wen sumadi a mek bred, a jos likl bit a yiis dem niid fi mek di uol duo swel op. So ef wi spen taim wid sumadi we du sitn wikid an naa shuo se dem sari bout it, wa dat kyan du tu di res a wi we iina di kanggrigieshan?
Jos laik Jeuova, di elda dem shuo se dem gud an kain tu di wan dem we sin bad. So dem chrai fi elp di wan dem we get put outa di kanggrigieshan. An nof a dem kom bak kom sorv Jeuova kaaz iivn duo wen dem did get ponish it did at, it elp dem fi si di bad sitn dem we dem did a du an it elp dem fi tap du dem. Saam 141:5.
Wen wi luk pan ou Jeuova diil wid di wan dem we sin bad, ou dat mek wi si se im lov piipl, im fier an im gud an kain tu dem?
5. Wen wi shuo se wi riili sari fi di bad sitn we wi du, Jeuova wi paadn wi
Jiizas did yuuz wan tuori we elp wi fi nuo ou Jeuova fiil wen sumadi du sitn bad an shuo se dem riili sari bout it. Riid Luuk 15:1-7, an den wi a-go taak bout da kwestiyan ya:
Wa dis tiich yu se bout Jeuova?
Riid Iziikel 33:11, an den wi a-go taak bout da kwestiyan ya:
Wa sumadi afi du fi shuo se dem riili sari fi di bad sitn we dem did du?
Jos laik ou wan shepad tek kier a im shiip dem, Jeuova lov di wan dem we a sorv im
SUMADI MAIT-A SE: “Mi fried fi go tel di elda dem bout di bad sitn we mi du kaaz mi mait-a get put outa di kanggrigieshan.”
Wa yu wuda se tu da sumadi de?
DIS A WA YU FI MEMBA
Ef wi du wan bad sitn we Jeuova iet an wi shuo se wi riili sari bout it an wi mek op wi main fi tap dwi’it, Jeuova wi paadn wi.
Wa yu did lorn iina da lesn ya?
Wa mek it gud fi wi tel Jeuova bout di bad sitn dem we wi du?
Ef wi waahn Jeuova fi paadn wi, wa wi afi du?
Ef wi du sitn we riili bad we Jeuova iet, wa mek wi fi go tu di elda dem fi dem elp wi?
CHEK OUT SOM MUO SITN
Luk pan ou wan man get fi si se Jeuova gud an kain iina di wie ou im paadn wi sin dem laik wa wi si a Aizaiya 1:18.
Ou di elda dem chrai fi elp di wan dem we sin bad?
Luk pan ou wi chriit di wan dem we sin bad an naa shuo se dem sari fi di bad sitn we dem du iina wan kain wie an shuo dem se wi stil lov dem.
“Ou Di Elda Dem Kyan Elp Di Wan Dem We Get Put Outa Di Kanggrigieshan?” (Di Wachtowa, Aagos 2024)
Luk pan da tuori ya we niem “Mi Did Afi Kom Bak Kom Sorv Jeuova” fi si wa mek wan man we did lef di chuut se a Jeuova elp im fi kom bak.
“Di Baibl Chienj Piipl Laif Fi Di Beta” (Di Wachtowa, Iepril 1, 2012)