Gad Mek Di Fos Man An Uman

Yu did av wan plies niem Iidn an Jeuova mek wan gyaadn de. Im put wol iip a flowaz, chrii, an animal iina it. Afta dat Jeuova yuuz som dot an mek di fos man an im bluo bret iina im nuoz, an a so kom da man de staat fi liv. Da man de did niem Adam. Jeuova tel im fi tek kier a aal a di sitn dem iina di gyaadn a Iidn, an Im tel im fi niem di animal dem tu.

Jeuova did tel Adam sitn we im no fi du. Im tel im se: ‘Yu kyan iit fram aafa aal a di chrii dem iina di gyaadn. Bot mi av wan speshal chrii we mi no waahn yu fi nyam notn aafa. Ef yu nyam no fruut fram da chrii de, yu a-go ded.’

Afta dat Jeuova se: ‘Mi a-go mek sumadi fi elp Adam.’ So im mek Adam jrap asliip, an im yuuz wan a im ribz dem fi mek wan waif fi im. Shi did niem Iiv, an shi an Adam a did di fos fambili. Adam did api so til! So im se: ‘Luk wa Jeuova yuuz mi ribz fi mek! Mi did wel waahn fi si sumadi laik mi.’

Jeuova tel Adam an Iiv se dem fi av nof pikni. Im did waahn di wol a dem fi wok tugeda so dat di wol ort wuda ton iina wan paradais, jos laik di gyaadn a Iidn. Bot a neehn so tingz go at aal. Wa mek? Wi a-go lorn bout dat iina di neda lesn.