Afta Adam an Iiv get put outa di gyaadn a Iidn, dem av nof pikni. Di fos pikni we dem get did niem Kien an im a did wan faama, an dem sekan pikni we niem Iebl did tek kier a shiip.

Wan die Kien an Iebl did gi op aafrin tu Jeuova. Yu nuo wa dem kaal aafrin? Aafrin a wan speshal prezent we yu gi tu Gad. Jeuova did api wid di aafrin we Iebl did gi im, bot im neehn api wid fi Kien uon. Kaaz a dat Kien did beks bad. So Jeuova tel Kien se ef im no wach imself, im a go en op du sitn bad. Bot Kien neehn lisn tu Jeuova.

Insted-a dat, Kien se tu Iebl se: ‘Kom mek mi an yu go uova iina di bush.’ An wen dem kech uova de, Kien no du a ting muo dan kil im breda. So wa Jeuova did du? Jeuova ponish Kien. Im sen im we faar faar fram im fambili an tel im se im kudn eva kom bak.

Wa wi kyan lorn fram dis? Wen tingz no wok out di wie wi waahn it fi go, wi mait-a get beks bad. Bot ef wi fain se wi a get beks so til wi kyaahn iivn kanchuol wiself, ar ef ada piipl tel wi se wi fi wach wiself, wi no fi ich fi du sitn bout it.

Kaa Iebl did lov Jeuova an did du wa rait, Jeuova a-go aalwiez memba im. An im a-go mek Iebl kom bak alaiv wen im ton di ort iina wan paradais.

Di taim did kom wen uol iip a piipl did de pan di ort. Bot muos a dem did a du bad tingz. Aal som a di ienjel dem iina evn did a du bad tingz tu. Dem tek aan di siem kain-a badi we man av an kom liv dong a ort ya. Yu nuo wa mek dem did du dat? A kaa dem did waahn kom marid tu di uman dem.

Di ienjel dem an di uman dem did av som bwai pikni tugeda. Dem bwai de did gruo big an chrang an staat tek set pan piipl an ort dem. Jeuova did afi du sopm bout dat. So im se im wuda mek wan flod kom an get rid a aal a di wikid piipl dem.

Bot yu did av wan man we did difrant fram dem piipl de. Im did niem Nowa an im did lov Jeuova bad. Nowa did av wan waif an chrii bwai we niem Shem, Am an Jafet, an dem did marid tu. Jeuova did tel Nowa fi bil wan big big aak. Di aak did luk laik wan baks we mek outa wud. An it kuda fluot pan tap a di waata laik wan buot. Jeuova did tel Nowa fi bil di aak so dat im an im fambili wuda aarait wen di flod a gwaan. An im tel im fi kya wol iip a animal go iin de so dem wuda aarait tu.

Nowa neehn ich fi staat bil di aak. A bout 50 ier it tek im an im fambili fi bil it. Dem mek it jos laik ou Jeuova did tel dem fi mek it. Wen taim dem did a bil di aak, Nowa did a waan di piipl dem bout di Flod. Bot non a dem neehn lisn tu im.

Den di taim kom fi dem go iina di aak. Kom mek wi fain out wa did apm afta dat.