Yu did av wan man niem Juob we worship Jeuova, an im did liv iina wan plies niem Oz. Im did riich bad an im fambili did big. Im did eva a du tingz fi elp piipl. Laik im wuda elp puor piipl, di pikni dem we neehn av no mada an faada, an di uman dem uufa ozban did ded. Bot yu tingk se kaa Juob did eva a chrai fi du di rait ting, dat miin tu se im wudn av no prablem at aal?

Sietan did a tek iin Juob, iivn duo Juob neehn nuo dat. Jeuova se tu Sietan se: ‘Yu mos si di wan we a sorv mi we niem Juob. Nobadi no de pan di ort we tan laik im. Kaa im eva a du wa mi se im fi du.’ Sietan ansa im an se: ‘Den Juob no mos du wa yu se im fi du. Kaa yu tek kier a im an mek shuor se notn no du im. An yu gi im wol iip a lan an nof nof animal tu. Tek we aal a dat no, an si ef im no ton im bak pan yu.’ Jeuova se: ‘Aarait, gwaan go du wa yu waahn fi du tu Juob. Bot wan ting mi a tel yu, no kil im.’ Wa mek Jeuova lou Sietan fi du dis? A kaa im did nuo fi shuor se Juob wuda du wa rait.

So Sietan staat fi lik Juob wid wan bag a chraiyal an prablem. Di fos ting im du a sen som Sabiyan piipl fi go tiif Juob kou dem an im dangki dem. Den faiya bon op aal a Juob shiip dem. An afta dat, som a di Kaldiyan piipl dem kom kom tiif im kyamil dem. Wen aal a dat did a gwaan, Juob sorvant dem we did a luk aafa aal a dem animal de en op ded tu. An pan tap a dat, aal a im pikni dem did de a wan a dem ous a kip big nyaminz an di wol a dem ded aaf. Da laas wan de did lik Juob fi siks, bot im neehn ton im bak pan Jeuova.

Bot Sietan neehn don wid Juob, so im mek di wol a im badi brok out iina suor. Pien did a lik Juob an im neehn nuo wa mek im did afi go chuu aal a dem sitn de. Bot Juob neehn tap sorv Jeuova. An Jeuova did api wid wa im a du.

Afta dat, Sietan sen chrii man fi mek Juob fiil wos. Ier wa dem tel Juob se: ‘A mos sin yu sin an a chrai fi aid it man. Yu no si se a Gad a ponish yu.’ Bot Juob se tu dem se: ‘Afta mi neva du notn rang.’ Den im did staat fi tingk se a Jeuova mek aal a dem sitn ya apm tu im, an im did se it neva fier.

Wan yuut we niem Ilaiyuu did a lisn wen dem man ya a taak tu Juob. Wen im kudn tek we dem a se no muor, im se: ‘Yu nuo se unu rang duo. Non a wi kyaahn andastan ou big an powaful Jeuova bi. Im wuda neva eva du notn wikid. Im nuo evriting we a gwaan an im elp piipl wid dem prablem dem.’

Afta dat, Jeuova taak tu Juob an tel im se: ‘A we yu did de wen mi did a mek di evn an di ort? Wa mek yu se mi no fier? Yu a taak, bot a wol iip a tingz yu no andastan.’ Juob did si se im did rang fi fiil da wie de an im se: ‘Mi nuo se mi did rang. A onggl ier mi did ier bout yu ino, bot nou mi riili nuo yu fi chuu. Notn no de we yu kyaahn du. Mi sari bout wa mi did se.’

Afta Juob go chuu dem sitn de, Jeuova mek im get beta an im gi im nof muor blesn dan we im yuus tu av. Juob did liv lang afta dat an im did wel api. Kaa im did du wa Jeuova se im fi du, aal wen it did aad, Jeuova bles im. No chuu se yu wuda waahn fi bi laik Juob an no tap sorv Jeuova, no mata wa apm tu yu?

Wen Jiekob fambili dem did dong a Iijip, piipl staat fi kaal dem Izrelait. Wan nyuu Fiero did staat fi ruul afta Jiekob an Juozif ded. Bot im did fried se di Izrelait dem wuda get so nof dat dem wuda kom tek uova di Ijipshan dem. So da Fiero de ton di Izrelait dem iina sliev. Im mek dem wok aad iina di fiil an im fuos dem fi mek brik tu. Bot iivn duo di Iijip piipl dem did a mek dem wok so aad, di Izrelait dem did stil a get nofa an nofa. Fiero neehn laik dat at aal so im sen out aada fi dem kil aal a di Izrelait bwai biebi dem we jos baan. Tingk bout ou di Izrel piipl dem mos did fried dem taim de!

Yu did av wan Izrelait uman we niem Jakobed we did av wan swiit likl bwai biebi. Kaa shi neehn waahn dem fi kil im, shi put im iina wan baaskit an aid im iina som taal graas we did iina di Nail Riva. Bot ar likl daata we niem Miriyam did aid nier wich paat shi put di biebi an a wach fi si wa wuda gwaan.

Wen Fiero daata kom fi bied iina di riva, shi si di baaskit. Wen shi luk iina it, shi si wan likl biebi a baal an shi did sari fi im. Miriyam aks ar se: ‘Yu waahn mi go fain wan a di uman dem we kyan gi’im bres milk fi yu?’ Fiero daata tel ar yes. So ges uu Miriyam go fa? No ar uona mada, Jakobed! Fiero daata tel Jakobed se: ‘Mi waahn yu tek da biebi ya an fiid im an tek kier a im fi mi, an mi wi pie yu.’

Wen di pikni get biga, Jakobed kya im go gi Fiero daata an shi kaal im Muoziz an riez im laik ar uona pikni. Muoziz a did wan prins an eniting im waahn, im kuda did get. Bot im neva figet Jeuova. Im did nuo se im a neehn no Ijipshan, im a did wan Izrelait. An kaaz a dat, im mek shuor se a Jeuova im worship.

Wen Muoziz a did 40 ier uol, im mek op im main fi du sopm fi elp im piipl dem. Wan die im si wan Ijipshan a biit op biit op wan Izrelait we did a sliev an Muoziz gi di Ijipshan wan big lik we kil im. Afta dat, Muoziz beri di badi iina di san so dat nobadi kudn fain it. Bot wen Fiero fain out wa Muoziz du, im chrai fi kil im. Bot Muoziz ron we go a wan plies niem Midiyan an wen im did de de, Jeuova tek kier a im.