A 40 ier Muoziz did liv a Midiyan fa, an im did marid an get pikni. Wan die im did de nier Mount Sainai a luk aafa im shiip dem an im si sitn we mek im shak. Im si wan makabush we did de pan faiya, bot di faiya neehn a bon it op. So Muoziz go nier fi si wa riili a gwaan. Den im ier wan vais iina di bush we se: ‘Muoziz! Tan rait de-so we yu de. Tek aaf yu slipaz kaa di grong we yu a tan op pan uoli.’ A Jeuova did a yuuz wan ienjel fi taak tu im.

Muoziz did fried bad, so im yuuz sitn fi aid im fies. Den di vais se tu im se: ‘Mi luk an si ou di Izrel piipl dem a sofa. Bot mi a-go frii dem fram dong a Iijip an kya dem go a wan gud lan fi dem liv pan. An a yu mi pik fi liid mi piipl dem outa Iijip.’ Yu tingk Muoziz did shak wen im ier dis ya?

So ier wa Muoziz aks se: ‘Wen di piipl dem aks a uu sen mi kom, a wa mi fi tel dem se?’ Gad ansa se: ‘Tel dem se a Jeuova sen yu kom, di Gad fi Iebriyam, Aizak, an Jiekob.’ Den Muoziz aks im: ‘Wa mi fi du ef dem no lisn tu mi?’ So Jeuova du som tingz fi shuo Muoziz se im wuda elp im. Im tel Muoziz fi chuo dong im tik a grong. An ges wa apm? It no ton iina wan siniek! An wen Muoziz uol aan pan di siniek tiel, it ton bak iina wan tik. Den Jeuova se: ‘Wen yu du dis, dem a-go si se a mi sen yu.’

Den Muoziz se: ‘Afta mi no nuo ou fi taak gud.’ Bot Jeuova tel im se: ‘Mi a-go mek yu nuo wa fi se, an mi a-go sen yu breda Ieran fi elp yu.’ So Muoziz tek im waif an im pikni dem an go bak dong a Iijip kaa im did nuo se Jeuova wuda de de wid im.

Di Ijipshan dem did tek di Izrelait dem an ton dem iina sliev. So Jeuova sen Muoziz an Ieran fi go frii im piipl dem an a dis im tel dem fi tel Fiero: ‘Mek mi piipl dem gwaan so dem kyan go worship mi iina di wildanes.’ Bot ier wa di wan Fiero se no: ‘Mi no bizniz bout wa Jeuova se. Mi naa mek di Izrelait dem go no we.’ An aal Fiero du a kil di Izrelait dem wid muo wok. So Jeuova did afi put Fiero iina im plies. Yu nuo wa im du? Im lik Iijip wid ten sitn fi ponish dem. Jeuova tel Muoziz se: ‘Fiero naa du wa mi se im fi du. A maanin im a-go go a di Nail Riva. Go tel im se kaa im aad-iez an im no sen we mi piipl dem, di wol a di waata iina da riva de a-go ton iina blod.’ Muoziz du wa Jeuova se an go tu Fiero. Ieran did de de tu an Fiero did a wach wen im lik di riva wid im tik an di waata ton iina blod. Di waata get stingk bad, an di fish dem ded aaf, an nobadi kudn jringk no waata fram da riva de. Bot Fiero did stil a uol aad en an im neehn waahn sen we di Izrelait dem.

Sevn die afta dat, Jeuova sen bak Muoziz tu Fiero an gi’im da mesij ya fi gi’im: ‘Ef yu no sen we mi piipl dem, mi a-go mek uol iip a bulfrag ful op di plies.’ So Ieran uol op im tik an Iijip staat ful op a bie bulfrag. Bulfrag did de iina piipl ous, iina dem bed, an aal iina dem pliet tu. Fiero aks Muoziz ef im kuda beg Jeuova fi get rid a di bulfrag dem an den im wuda sen we di Izrelait dem. So a dat Jeuova du an di bulfrag dem ded aaf, an di Ijipshan dem iip op uol iip an uol iip a bulfrag. Kaaz a dat, di plies did staat fi sumel stingk. Bot Fiero did stil aad-iez an im wudn sen we di Izrelait dem.

Afta dat Jeuova tel Muoziz dis: ‘Ieran fi lik di grong wid im tik an di dos a-go ton iina som likl flai laik san flai we bait at.’ Sed taim dem likl flai de swaam di plies. Aal som a Fiero piipl dem tel im se: ‘Yu no si se a Gad a du dis?’ Bot im stil neehn waahn sen we di Izrelait dem.