Gad did av wan neda mesij fi Fiero. So im sen Muoziz an Ieran fi tel im se: ‘Ef yu no sen we mi piipl dem, mi a-go sen som big flai we bait an sok blod fi swaam di plies.’ Afta dat aal a di Ijipshan dem yaad ful op a dem flai de, no mata ef dem did rich ar puor. Bot iina Guoshen we di Izrelait dem did liv, nat wan a dem flai de neehn de de. Yu si di fos chrii sitn dem we Gad lik Iijip wid, it did kaaz prablem fi ada piipl tu. Bot da wan ya an di wan dem afta it, a onggl di Ijipshan dem did fiil it. So Fiero se tu Muoziz an Ieran se: ‘Du, mi a beg unu, aks Jeuova fi get rid a dem flai ya an mi wi sen we unu piipl dem.’ Bot wen Jeuova get rid a di flai dem, Fiero neehn sen dem we. Fiero aad fi lorn iihn!

Jeuova se: ‘Yu si ef Fiero no sen we mi piipl dem, di animal dem we di Ijipshan dem av a-go get sik an ded.’ So di neks die, di animal dem staat ded aaf. Bot di Izrel piipl animal dem neehn ded. Bot Fiero did stoban bad, an im stil wudn sen we di piipl dem.

Den Jeuova tel Muoziz fi go bak tu Fiero an tek likl ashiz an chuo it op iina di ier. Da ashiz de ton iina so uol iip a dos we go aal bout di plies an jrap pan di Ijipshan dem. So aal a di Ijipshan dem an dem animal dem brok out iina suor. Bot Fiero stil neehn sen we di Izrelait dem.

Jeuova sen Muoziz fi go gi Fiero da mesij ya: ‘Yu stil de de a uol aad-en an naa sen we mi piipl dem? Tumaro mi a-go mek ielstuon jrap fram di skai.’ Di neks die, Jeuova mek ais, tonda, an faiya kom dong pan di Ijipshan dem. Dis a did di wos staam we eva lik Iijip. Di staam lik dong di wol a dem chrii dem an di tingz we dem plaant. Bot notn neehn du di sitn dem we did plaant iina Guoshen. Nou Fiero se: ‘Du, beg Jeuova fi tap da staam ya! Den mi wi sen unu we.’ Bot yu si wen di staam don, Fiero neehn du a ting.

Afta dat Muoziz se: ‘Yu si di res a di sitn dem we plaant op iina di fiil we di staam neehn mash dong, som big graasapa a-go kom kom nyam dem aaf.’ So wol iip a graasapa kom kom nyam op evriting we did de pan di chrii dem an we did plaant op iina dem fiil. Fiero se: ‘Du, beg Jeuova fi sen we dem graasapa ya.’ Bot aal wen Jeuova sen dem we, Fiero did stil aad-iez.

Jeuova tel Muoziz se: ‘Chrech out yu an iina di ier.’ Wen im du dat, di skai ton daak laka midnait. Di Ijipshan dem kudn si a ting fi wol a chrii die. A onggl di Izrelait dem did av lait iina dem ous.

Fiero se tu Muoziz se: ‘Aarait den, yu an yu piipl dem kyan gwaan. Bot unu kyaahn kya unu animal dem.’ Bot Muoziz se: ‘Wi afi kya dem kaa wi a-go yuuz dem fi gi sakrifais tu wi Gad.’ Fiero did beks bad, so im shout aafa Muoziz an se: ‘Muuv fram infronta mi! Yu si ef yu kom bak ya, a ded yu ded.’

Muoziz tel Fiero se im neehn a-go kom bak kom taak tu im agen. Bot bifuo im go we, im tel Fiero se: ‘Yu si twelv aklak tinait, di fos bwai pikni fi evribadi iina Iijip a-go ded. It no mata ef a Fiero pikni ar di sliev dem pikni, aal a dem a-go ded.’

Jeuova tel di Izrelait dem fi kuk som fuud we wuda miin sitn speshal fi dem. Im tel dem se: ‘Unu fi kil wan ram guot ar shiip we a wan ier uol an unu fi put som a di blod pan unu duor jam. Ruos di miit an nyam it wid bred we na’av no yiis iina it. Put aan unu kluoz an unu slipaz an mek shuor se unu redi fi lef faas, kaaz a tinait mi a-go frii unu.’ Di Izrelait dem glad-bag mos did bos wen dem ier dis, no chuu?

Twelv aklak iina di nait, Jeuova ienjel ga’a evri ous we iina Iijip. Di fambili dem we neehn put no blod pan dem duor jam, fi dem fos bwai pikni ded. Bot di ienjel neehn du notn tu nobadi iina di ous dem wid di blod pan di duor jam. So non a di Izrelait pikni dem neehn ded. Bot fi aal a di Ijipshan dem, it no mata ef dem did rich ar puor, sumadi iina dem fambili ded.

Aal Fiero uona bwai pikni did ded tu, an dis did lik im fi siks. Sed taim im sen fi Muoziz an Ieran an tel dem se: ‘Unu kum out. Kum outa mi konchri. Galang go worship unu Gad. Tek unu animal dem an galang we unu a go!’

Da nait de di muun did ful an di Izrelait dem get fi kom outa Iijip. Dem did gruup dem op azkaadn tu dem fambili an di chraib we dem kom fram. Yu did av 600,000 man, plos uman an pikni. An wol iip a ada piipl we did waahn fi go worship Jeuova tu did de de wid dem. Di Izrelait dem a neehn sliev no muo kaa Jeuova did frii dem!

Evri ier, dem wuda nyam da sed kain-a fuud de we dem did kuk pan da speshal nait de. Dem du dis fi memba wa Jeuova did du fi dem. Dem did kaal dat di Paasuova alidie.