Wen di spai dem fram Izrel kech a Jeriko, dem did tan a wan uman yaad. Da uman de did niem Rieyab. Wen di king fi Jeriko fain out bout it, im sen som suoja ga’a Rieyab yaad. So shi mek di tuu spai dem aid pan ar ous tap an sen we di suoja dem wan neda wie. Shi tel di spai dem se: ‘Mi a-go elp unu kaa mi nuo se Jeuova a bak unu an unu a-go tek uova dem plies ya. Bot du, pramis mi se unu a-go mek shuor se mi fambili aarait.’

Di spai dem tel ar se: ‘Notn naa go apm tu nobadi we de iina yu ous.’ Dem se: ‘Ier wa yu du, tai wan red kaad a yu winda an notn naa go apm tu yu fambili.’

Rieyab mek di spai dem go chuu ar winda an klaim dong pan wan ruop. Dem go op iina di mountn dem go aid fi chrii die bifuo dem gu bak tu Jashwa. Den di Izrelait dem go kraas di Jaadn Riva fi go tek uova di plies dem. Di fos plies we dem tek uova a Jeriko. Jeuova tel dem se fi siks die chriet dem fi maach roun di siti wan taim a die. Pan die nomba sevn, a sevn taim dem maach roun di siti. Den di priis dem bluo dem chompit an di suoja dem shout out loud loud. Sed taim di waal dem roun di siti jrap flat a grong! Rieyab ous did bil aan pan di waal, bot it neehn mash op at aal. Kaa shi did chos iina Jeuova, notn neehn apm tu Rieyab an ar fambili.

Wol iip a piipl fram aal bout iina Kienan did ier bout wa did gwaan a Jeriko. So dem king dem mek op dem main fi jain op wid dem wan aneda fi fait aaf di Izrelait dem. Bot di Gibiyanait dem mek op dem main fi du sitn els. Dem put aan som uol kluoz an go tu Jashwa an tel im se: ‘Wi kom fram wan plies we de faar fram ya-so. Wi ier bout Jeuova an evriting we im du fi unu iina Iijip an Mowab. Wi a beg unu du, no kom kom rosh wi an wi wi ton unu sorvant.’

Jashwa biliiv dem an im tel dem se di Izrelait dem wudn du dem notn. Bot chrii die afta dat im fain out se dem neehn kom fram no faar plies. A rait de-so a Kienan dem kom fram. Jashwa aks di Gibiyanait dem se: ‘Wa mek unu kom tel wi lai?’ Dem se: ‘A kaa wi did fried man! Wi nuo se unu Gad Jeuova a fait fu’unu. Du, no kil wi.’ So Jashwa du wa im did pramis dem an no kil dem.

Likl afta dat, faiv a di king dem fram Kienan an dem aami dem kom fi kom rosh di Gibiyanait dem. Bot Jashwa an im suoja dem waak di wol nait fi go go siev dem. Orli di neks maanin di waar staat. Di Kienanait dem staat fi ron an skyata aal bout di plies. Evriwe dem ron go, Jeuova mek som big uol ielstuon jrap dong pan dem. Den Jashwa aks Jeuova fi mek di son tan iina di skai an no go dong. Wa mek im wuda aks Jeuova fi du dat an nobadi neva si dat apm yet? A kaa Jashwa did chos iina Jeuova. Di son neehn go dong fi wan wol die til di Izrelait dem win di waar gens di Kienanait king dem  an dem aami.