LESN 52
Wa Mek Wi Afi Tingk Bout Di Wie Ou Wi Jres An Ou Wi Fiks Op Wiself?
Aal a wi av tingz we wi laik wen it kom aan tu ou wi jres an ou wi fiks op wiself. Ef wi du wa di Baibl se wi fi du, wi kyan stil get fi wier tingz we wi laik, bot di mien ting a dat wa wi wier a-go mek Jeuova api. Mek wi luk pan som tingz we wi lorn fram di Baibl we wi kyan riizn pan we kyan elp wi.
1. Wa a som a di tingz we wi lorn fram di Baibl we elp wi fi nuo wa fi du an wa wi no fi du wen it kom aan tu ou wi jres an fiks op wiself?
Wi fi “jres prapa,” an wi fi mek shuor se di wie ou wi luk shuo se wi a piipl “we a fala Gad.” (1 Timoti 2:9, 10) Si fuor tingz ya we kyan elp wi fi nuo ef wi a jres prapa: (1) Wen yu ga’a di miitn dem, yu wuda si se di piipl dem we a sorv Jeuova jres iina aal kain-a difrant difrant wie, bot di kluoz dem we wi wier an di ier stail dem we wi av shuo se wi av nof rispek fi wi Gad. (2) Wan neda ting a dat wen wi a put aan wi kluoz, wi no waahn wier notn we tuu tait ar shaat op shaat op, an wi no waahn wier tingz fi mek it luk laik se wi waahn piipl fi a luk pan wi. (3) Plos wi shuo se wi a tingk iina wan waiz wie wen wi no ron go fala aal kain-a difrant difrant ier stail ar fashan jos kaaz wol iip a piipl a dwi’it. (4) Wen piipl si wi, di wie ou wi luk fi shuo se wi a “fala Gad” so dem wi si se a di chuu Gad wi a sorv.—1 Korintiyan 10:31.
2. Wen wi a mek op wi main bout wa wi a-go put aan, wa mek wi fi tingk bout wi breda an sista dem?
Evribadi frii fi mek op dem uona main bout wa dem waahn fi wier, bot wi fi tingk bout wa di sitn dem we wi wier kyan du tu wi breda an sista dem. So wen wi a fiks op wiself an a pik tingz fi wier, wi waahn mek shuor se wi naa mek nobadi fiil a wie. Insted-a dat, wi waahn fi “du di sitn dem we gud fi dem an wa wi elp fi bil dem op.”—Riid Ruoman 15:1, 2.
3. Ou di sitn dem we wi wier kyan mek ada piipl waahn lorn muor bout Jeuova?
Wi waahn mek shuor se wi aalwiez jres prapa no mata wich paat wi de. Bot yu si wen wi a ga’a wi miitn dem, an wen wi a du fiil sorvis, wi fi riili tek di taim fi tingk bout wa wi a-go wier. Wi no waahn di wie ou wi luk kaaz piipl fi tingk bad tingz bout di gud nyuuz we wi a priich tu dem. Insted-a dat, wi waahn di wie ou wi luk fi mek piipl waahn kom lorn bout di Gad we wi a sorv so dat dem kyan ‘rispek wa wi tiich bout wi Sievya.’—Taitos 2:10.
LORN SOM MUO
Wi a-go luk pan wa wi fi du fi mek shuor se di wie ou wi jres an ou wi luk wi mek ada piipl si se wi a Kristiyan.
Di wie ou wi jres an fiks op wiself wi shuo ef wi rispek di piipl dem we inchaaj a tingz. Iivn duo Jeuova kyan si wa de iina wi aat, wi fi stil shuo se wi rispek im bies pan di sitn dem we wi wier an ou wi fiks op wiself
4. Wen wi fiks op wiself gud, dat shuo se wi av nof rispek fi Jeuova
Wa a di bigis riizn wa mek wi no fi jos put aan eni an eniting an wi fi kier bout ou wi luk? Riid Revilieshan 4:11, an den wi a-go taak bout dem kwestiyan ya:
Kaa piipl nuo se wi a worship Jeuova, wa dat fi mek wi tingk bout wen it kom aan tu di kain-a kluoz we wi wier?
Yu tingk wi afi bizniz bout ou wi luk wen wi a go a miitn an fiil sorvis? Wa mek yu se so?
5. Wa kyan elp wi fi nuo ou fi jres an fiks op wiself?
It no mata ef a niem-bran kluoz wi a wier ar wi bai dem chiip chiip, wi fi mek shuor se it kliin. An eniwe wi a go, wi fi mek shuor se di kain-a kluoz we wi a wier luk aarait fi wier go da plies de. Riid 1 Korintiyan 10:24 an 1 Timoti 2:9, 10. Den wi a-go taak bout wa mek wi no waahn wier no kluoz we . . .
chaka-chaka ar luk laik eng-pan-niel, ar luk laik sitn we wi onggl fi wier roun wi yaad
tait, ar a shuo op shuo op wi badi, ar we mek piipl tingk bout seks
Iivn duo Jeuova no ekspek di Kristiyan dem tide fi a fala Muoziz Laa, it kyan stil elp wi fi si ou im tingk bout sortn tingz. Riid Dyuutaranami 22:5, an den wi a-go taak bout da kwestiyan ya:
Wen it kom aan tu wi kluoz, wi ier stail, an di ada sitn dem we wi du fi fiks op wiself, wa mek wi fi kip we fram di sitn dem we mek man luk laik uman, ar uman luk laik man?
Riid 1 Korintiyan 10:32, 33 an 1 Jan 2:15, 16, an den wi a-go taak bout dem kwestiyan ya:
Wa mek wi fi bizniz ef di wie ou wi jres an fiks op wiself mek di piipl dem iina wi ieriya ar iina wi kanggrigieshan fiil a wie?
Iina di ieriya we yu liv, ou di piipl dem naamali jres an fiks op demself?
Yu tingk aal a dem stail de wuda aarait fi wan Kristiyan fala? Wa mek yu se so?
A nof difrant difrant wie wi kyan jres an fiks op wiself an stil mek Jeuova api
SUMADI MAIT-A SE: “Mi kyan wier eniting we mi waahn fi wier an nobadi kyaahn tel mi notn.”
Yu tingk wa dem se mek sens? Wa mek yu se so?
DIS A WA YU FI MEMBA
Wen wi du wi bes fi fiks op wiself an jres prapa, wi shuo se wi rispek Jeuova an ada piipl tu.
Wa yu did lorn iina da lesn ya?
Wa mek di wie ou wi jres an fiks op wiself a wan big ting tu Jeuova?
Wen it kom aan tu di kain-a kluoz we wi wier an ou wi fiks op wiself, wa a som a di tingz we wi lorn fram di Baibl we wi fi tingk bout?
Wen it kom aan tu ou wi jres an fiks op wiself, ou dat kyan mek piipl fiil bout di kain-a worship we gud an kliin iina Gad yai?
CHEK OUT SOM MUO SITN
Wa yu tingk piipl mait-a tingk bout yu wen dem luk pan di kain-a kluoz we yu wier? Chek dis out an si.
Lorn wa mek yu fi tingk bout it bifuo yu put tatuu pan yu badi.
“Wa Di Baibl Se Bout Tatuu?” (Sitn we yu kyan get pan di websait)
Si som ada tingz ya we kyan elp yu fi nuo ou fi jres prapa.
Lorn bout ou wan uman we did wel waahn sorv Gad did get fi si se shi did afi chienj di wie ou shi tingk bout ou piipl fi jres an fiks op demself.
“Di Wie Ou Dem Did Jres An Fiks Op Demself A Did Wan Big Prablem Fi Mi” (Wiek Op!, Disemba 22, 2003)