DI LESN FI STODI 46
A Ou Jeuova Mek Wi Nuo Se Im A-Go Gi Wi Di Paradais Fi Chuu?
“Enibadi we waahn fi get nof blesn, di Gad we aalwiez du wa im se im a-go du, a im a-go bles dem.”—AIZ. 65:16.
SANG 3 Jeuova A Wi Schrent An Wi Uop
DIS A WA WI A-GO LUK PANa
1. Wa di prafit Aizaiya did waahn di Izrelait piipl dem fi nuo?
DI PRAFIT we niem Aizaiya tel wi se Jeuova a “di Gad we aalwiez du wa im se im a-go du.” Di wod iina di Iibruu langwij we miin se Jeuova “aalwiez a-go du wa im se im a-go du” riili miin “iemen.” (Aiz. 65:16) “Iemen” miin “a so it go.” So wen wi a riid di Baibl an it a taak bout Jeuova ar Jiizas an it yuuz di wod “iemen”, it a mek wi nuo se wa it se a-go apm a-go apm fi chuu. So wa Aizaiya did a se tu di Izrelait dem a dat wa Jeuova se a-go apm a-go apm fi chuu. An wi nuo dat kaa evriting we im pramis se im wuda du aredi, im dwi’it.
2. Wa mek wi nuo fi shuor se Jeuova a-go du di sitn dem we im pramis wi se im a-go du, an wa wi a-go luk pan iina da lesn ya?
2 Yu tingk se wi kyan biliiv se Jeuova a-go du wa im se im a-go du jos laik ou di Izrelait dem did biliiv se im a-go du wa im se im a-go du? Ye man! Wi nuo dat kaa bout 800 ier afta Aizaiya did se dem tingz de, di apasl we niem Paal mek wi nuo wa mek wi kyan chos di ting dem we Jeuova se. Im se: “Gad kyaahn lai.” (Iib. 6:18) Jos laik ou yu kyaahn get fresh waata an saalt waata outa di siem riva, a siem so Jeuova kyaahn tel lai kaa a im mek wi nuo di chuut. So wi kyan nuo fi shuor se im a-go du evriting we im se im a-go du iina di fyuucha. Iina da lesn ya, wi a-go luk pan di sitn dem we Jeuova pramis wi se im a-go gi wi iina di fyuucha, an ou wi kyan nuo fi shuor se im a-go gi wi evriting we im se im a-go gi wi.
WA JEUOVA PRAMIS WI SE IM A-GO DU?
3. (a) Wa a som a di sitn dem we Jeuova pramis wi we wi wel waahn fi si? (Revilieshan 21:3, 4) (b) A wa som piipl se wen wi tel dem bout dem sitn ya?
3 Di ting dem we Jeuova pramis wi we wi a-go luk pan iina da lesn ya a som sitn we im piipl dem we de aal uova di worl wel waahn fi si apm. (Riid Revilieshan 21:3, 4.) Im pramis wi se wan taim a-go kom wen “nobadi naa go ded agen, so nobadi naa go ala ar baal. An nobadi naa go fiil no pien.” A nof taim wen wi iina sorvis wi yuuz da skripcha ya fi mek piipl nuo wa a-go gwaan iina di fyuucha. Bot som a dem mait-a luk pan wi an se, “Notn kyaahn go so.”
4. (a) Wa Jeuova nuo se wuda apm? (b) Afta Jeuova pramis wi dem sitn ya, wa els im du?
4 Wen Jeuova did mek di apasl Jan rait dem sitn ya bout wa im se wuda apm iina di nyuu worl, Jeuova did nuo se wen wi tel piipl bout wa im Kindom Govament a-go du fi wi, nof a dem wuda fain it aad fi biliiv. (Aiz. 42:9; 60:2; 2 Kor. 4:3, 4) Bot a ou wi kyan elp dem an wiself fi si se aal a di gud sitn dem we Revilieshan 21:3, 4 taak bout a-go apm fi chuu? Jeuova no onggl pramis wi se dem sitn ya a-go apm bot im mek wi nuo wa mek wi kyan biliiv se dem a-go apm fi chuu. Bot a ou Jeuova mek wi nuo se dem sitn ya a-go apm fi chuu?
JEUOVA MEK WI NUO FI SHUOR SE IM A-GO DU WA IM SE IM A-GO DU
5. Wa mek wi nuo fi shuor se wi a-go get di nyuu worl we Jeuova pramis se im a-go gi wi, an wich skripcha mek wi nuo se it a-go apm fi chuu?
5 Wi nuo se di sitn dem we Jeuova pramis wi se a-go apm a-go apm fi chuu wen wi riid se: “Gad we did sidong pan di chuon se, ‘Mi a mek evriting nyuu!’ Den im se, ‘Rait dis dong kaa wa mi a se a chuu an evribadi kyan biliiv it.’ Im se tu mi se, ‘Evriting don nou. Mi a di Fos an mi a di Laas. Evriting staat wid mi an evriting don wid mi.’”—Rev. 21:5, 6a.
6. Wa mek wa rait dong iina Revilieshan 21:5, 6 mek wi nuo se wa Jeuova pramis wi a-go apm fi chuu?
6 A ou dem vors ya mek wi si se wi kyan riili biliiv se Jeuova a-go du di sitn dem we im pramis wi se im a-go du? Di buk we niem Revelation Climax tel wi dem sitn ya bout dem vors ya, it se: “It komiin laik se Jeuova a sain wan piis a piepa fi se ye, unu a-go get dem blesn ya iina di fyuucha.”b Iina Revilieshan 21:3, 4 Jeuova mek wi nuo wa im pramis wi se a-go apm iina di fyuucha. Bot iina vors 5 an 6 im a mek wi nuo wa mek wi kyan biliiv wa im se. An dat komiin laik a sain im sain im niem saida wa im pramis wi. Mek wi luk pan di ting dem we Jeuova se iina dem vors ya we mek wi nuo se im a-go du wa im se im a-go du.
7. A uu a taak iina vors 5, an wa mek dis a wan big ting?
7 Di fos paat a vors 5 se: “Gad we did sidong pan di chuon se.” (Rev. 21:5a) A onggl chrii taim iina di buk a Revilieshan Jeuova eva taak iina vijan, an a so da wan ya staat. So dis mek wi si se a Jeuova imself mek da pramis ya, a no no ienjel ar iivn Jiizas. An dis mek wi si se wi kyan riili biliiv wa di Baibl a se ya-so kaa Jeuova “no lai.” (Taitos 1:2) An dis mek wi kyan chos wa Revilieshan 21:5, 6 se.
“MI A MEK EVRITING NYUU!”
8. A ou Jeuova mek wi nuo se im a-go du wa im se im a-go du? (Aizaiya 46:10)
8 Mek wi luk pan wa Jeuova se iina Revilieshan 21:5. Iina di Griik langwij we da vors ya did fos rait iina, wen im did staat it im se “luk de!” ar “lisn”. An wi kyan fain dis wa im se iina difrant difrant paat a di buk a Revilieshan. Sitn we tel wi bout wa som a di wod dem iina di Baibl miin tel wi se dem wod ya mek di sumadi we a riid di Baibl nuo se dem fi luk out fi wa di sumadi a-go se neks. An den ier wa Gad se: “Mi a mek evriting nyuu!” Ye, Gad did a taak bout wa a-go gwaan iina di fyuucha. Bot im taak laik se it a apm rait ya nou, an im kuda du dat kaaz im nuo se wa im pramis se a-go apm a-go apm fi chuu.—Riid Aizaiya 46:10.
9. (a) Wen di Baibl se Jeuova “a mek evriting nyuu,” wa a di tuu ting dem we Jeuova a-go du we it a taak bout? (b) Wa a-go apm tu di “evn” an di “ort” we de bout ya nou?
9 Di neks ting we Revilieshan 21:5 se a dat: “Mi a mek evriting nyuu!” Dis mek wi si se a tuu tingz Jeuova a-go du. Fos im a-go muuv sopm an put sitn els de, an den im a-go mek bak sopm gud agen. Revilieshan 21:1 tel wi ou im a-go muuv sitn an put bak sitn els de. It se: “Di fos evn an di fos ort did disapier.” Di “fos evn” a di govament dem we Sietan an im diiman dem a kanchuol. So a dem Jeuova a-go muuv an put wan difrant govament de. (Mat. 4:8, 9; 1 Jan 5:19) An somtaim wen di Baibl taak bout ort, it a taak bout di piipl dem we liv pan it. (Jen. 11:1; Sa. 96:1) So wen di Baibl se “di fos ort did disapier”, it a taak bout di wikid piipl dem we de pan di ort. A dem a-go disapier. So Jeuova naa go jos fiks op bak di evn an di ort we de bout ya nou, bot im a-go get rid a dem an gi wi wan nyuu evn an wan nyuu ort. So yu a-go av wan nyuu govament we a ruul uova piipl we a du wa Jeuova waahn dem fi du.
10. A wa Jeuova a-go mek nyuu agen?
10 Iina Revilieshan 21:5 wi si se Jeuova neva se: “Mi a mek nyuu tingz.” Bot im se: “Mi a mek evriting nyuu.” So Jeuova a-go mek di ort an di piipl dem we a liv pan it nyuu wen im mek dem ton porfek. Jos laik wa Aizaiya se wuda apm, di wol a di ort a-go ton wan priti plies laik di Gyaadn a Iidn. An wi a-go nyuu agen kaa Jeuova a-go fiks wi bak. Di wan dem we kyaahn muuv roun gud an di wan dem we blain an di wan dem we def naa sik agen, an di wan dem we ded a-go kom bak alaiv.—Aiz. 25:8; 35:1-7.
“WA MI A SE A CHUU AN EVRIBADI KYAN BILIIV IT. . . . EVRITING DON NOU.”
11. A wa Jeuova did tel Jan fi du an wa mek?
11 Wa els Gad se we mek wi nuo se im a-go du wa im se im a-go du fi chuu? Jeuova tel Jan se: “Rait dis dong, kaaz wa mi a se a chuu an evribadi kyan biliiv it.” (Rev. 21:5) Bot a no onggl rait Jeuova tel im fi rait it dong, im tel im wa mek im fi rait it dong. Im se: “Kaaz wa mi a se a chuu an evribadi kyan biliiv it.” Wi glad se Jan did lisn tu Jeuova an rait dong wa im se im fi rait dong. An kaa im did dwi’it, a dat mek wi kyan nuo bout an tingk bout di nais sitn dem we Jeuova a-go gi wi iina di nyuu worl.
12. Wa mek Jeuova kuda se: “Evriting don nou”?
12 Di neks ting Jeuova se a dat, “evriting don nou.” (Rev. 21:6) So Jeuova taak bout di sitn dem we a-go apm iina di nyuu worl laik se dem apm aredi. An im kyan taak da wie de kaa notn kyaahn tap im fram du wa im se im a-go du. Mek wi luk pan wan neda riizn we Jeuova gi wi we mek wi nuo se im a-go du wa im se im a-go du.
“MI A DI FOS AN MI A DI LAAS”
13. Wa mek Jeuova se im “a di fos” an im “a di laas”?
13 Jos laik wa wi se aredi, a chrii taim Jeuova taak tu Jan iina wan vijan. (Rev. 1:8; 21:5, 6; 22:13) An dem chrii taim de Jeuova tel im se: “Mi a di fos an mi a di laas.” So wen Jeuova se dis, im did a tel Jan se eniting we im staat fi du, im naa go don til it don.
Wen Jeuova staat sitn im naa go don til it don (Luk iina paragraaf 14, 17)
14. (a) Tel wi wan a di taim dem wen it komiin laik Jeuova se im “a di fos”, an tel wi wen im a-go se im “a di laas”. (b) Wa Jenisiz 2:1-3 mek wi nuo se a-go apm fi chuu?
14 Afta Gad mek Adam an Iiv, im mek wi nuo wa im did waahn fi apm fi piipl an fi di ort. Di Baibl se: “Gad bles dem, an se tu dem se: ‘Unu fi av nof pikni an ful op di ort wid uol iip a piipl; unu fi kanchuol di ort an tek kier a it.’” (Jen. 1:28) Da taim de it wuda komiin laik se Jeuova a se, “Mi a di fos” kaa im mek it klier klier se im waahn Adam an Iiv an dem pikni pikni dem we wuda porfek fi ful op di ort an ton it iina wan Paradais. An iina di fyuucha wen dat apm, it wuda komiin laik se Jeuova a se, “Mi a di laas.” Afta Jeuova did don mek evriting, wa im se mek wi si se im a-go mek shuor se wa im did waahn fi apm stil a-go apm. (Riid Jenisiz 2:1-3) Wen Jeuova don mek evriting im se di sevn die speshal tu im, kaa dat wuda miin se notn kyaahn go tap im fram du wa im waahn fi du fi piipl an fi di ort. Bai di taim di sevn die don, evriting we im waahn fi apm a-go apm.
15. Wa mek Sietan kuda tingk se im kuda mek Jeuova no get fi du wa im did waahn fi du?
15 Afta Adam an Iiv neehn du wa Gad tel dem fi du, dem ton sina an mek di wol a dem pikni pikni dem ton sina tu an en op a ded. (Ruo. 5:12) Afta dem du dat, it mait-a mek it luk laik se Sietan naa go mek Gad get fi du wa im did waahn fi du, dat a fi ful op di ort wid piipl we porfek we a du wa Im waahn dem fi du. It wuda mek it luk laik se Sietan mek Jeuova kyaahn go se ‘Im a di laas.’ Sietan mait-a did fiil se Jeuova kudn du wa im se im a-go du kaa wan ting Jeuova mait-a du a kil aaf Adam an Iiv an mek wan difrant man an uman we porfek fi ful op di ort wid fi dem pikni dem. Bot ef Jeuova did du dat Sietan wuda se Gad a laiyad, kaaz iina Jenisiz 1:28 Jeuova did tel Adam an Iiv se a fi dem pikni dem wuda ful op di ort.
16. Wa mek Sietan mait-a tingk se im kuda se Jeuova kyaahn du a ting?
16 Wan neda ting we Sietan mait-a tingk Gad wuda du a fi lou Adam an Iiv fi av pikni we wuda neva get porfek agen. (Iik. 7:20; Ruo. 3:23) An ef dat did apm, Sietan wuda se Jeuova kyaahn du a ting. Kaa wa Jeuova did waahn fi du a fi mek di ort ton iina wan Paradais we wuda ful op a Adam an Iiv pikni dem we porfek an a du wa im waahn dem fi du.
17. Afta Sietan an Adam an Iiv did ton gens Jeuova, wa Jeuova did du fi fiks tingz, an wa did apm kaaz a dat? (Luk pan di picha tu.)
17 Afta Sietan an Adam an Iiv ton gens im, Jeuova fiks tingz iina wan wie we mek Sietan kudn se a ting. (Sa. 92:5) So Jeuova mek piipl si se wa Sietan did a se a lai. An dem si se dem kyan chos Im kaa im sen im bwai pikni we kuda siev Adam an Iiv pikni dem we a du wa Jeuova waahn dem fi du. (Jen. 3:15; 22:18) Wen Jeuova du dat, it mos did mek Sietan fraitn kaa Jeuova sen im pikni kom gi op im laif fi piipl. An dis a sitn we no naamal. (Mat. 20:28; Jan 3:16) Dis a sitn we no iina Sietan fi du. So kaa Jiizas kom ded fi wi, wen di Touzn Ier don di ort a-go ton iina wan Paradais. An Adam an Iiv pikni dem we a liv de a-go porfek an a du wa Jeuova waahn dem fi du jos laik wa im did waahn fi apm iina di fos plies. Wen dat apm, Jeuova kyan go se, “Mi a di laas.”
A WA WI FI DU FI SHUO SE WI RIILI BILIIV SE JEUOVA A-GO GI WI DI PARADAIS?
18. Wa a di chrii sitn dem we Jeuova se we mek wi nuo se im a-go du wa im se im a-go du? (Luk pan di paat we niem “Chrii Riizn We Mek Wi Kyan Biliiv Se Jeuova A-Go Du Wa Im Se Im A-Go Du.”)
18 Bies pan aal a wa wi luk pan aredi, ou wi kyan elp sumadi we no biliiv se Gad a-go ton da worl ya iina wan Paradais fi chuu? Di fos ting wi kyan mek dem nuo se, a dat a Jeuova pramis wi se im a-go dwi’it. Di buk a Revilieshan tel wi se: “Gad we did sidong pan di chuon se: ‘Mi a mek evriting nyuu!’” An Jeuova nuo ou fi dwi’it, an im av di powa fi dwi’it, an im wel waahn fi dwi’it tu. An di sekan ting a dat, kaa Jeuova nuo se im a-go du wa im se im a-go du im taak bout it laik se im dwi’it aredi. Im se: “Wa mi a se a chuu an evribadi kyan biliiv it. . . . Evriting don nou.” Di tord ting a dat, wen Jeuova staat sitn im no don til it don. An wi nuo dis kaaz im se: “Mi a di fos an mi a di laas.” So Jeuova a-go mek evribadi si se Sietan a wan big oul laiyad an im kyaahn du wa im waahn fi du.
19. Wa yu kuda se tu sumadi ef dem no riili biliiv se Jeuova a-go ton da ort ya iina wan Paradais?
19 Memba se evritaim yu tel sumadi bout di sitn dem we Jeuova pramis wi, it a elp yu fi chos iina im muor tu. So di neks taim yu riid sitn bout wa Jeuova a-go du fi wi iina Paradais laik wa de iina Revilieshan 21:4, an sumadi se, “Sitn kyan go so fi chuu?” wa yu kyan du a riid vors 5 an 6 fi dem tu. An dat wi shuo dem se it wuda komiin laik se Jeuova sain im niem iina dem vors ya se im a-go du wa im pramis se im a-go du.—Aiz. 65:16.
SANG 145 Paradais We Gad Pramis Wi
a Iina da lesn ya, wi a-go luk pan ou Jeuova mek wi nuo se im a-go gi wi di Paradais fi chuu. Evritaim wi tel sumadi bout dis it mek wi si se wi kyan riili chos Jeuova se im a-go gi wi di nyuu worl fi chuu.
b Luk iina di buk we niem Revelation—Its Grand Climax At Hand! pp. 303-304, pars. 8-9.