Big Op Jeuova An Gi’im Di Rispek We Im Fi Get

1. A wa wi nuotis wid nof a di piipl dem we de roun wi?

WAN ting we wi nuotis wid di piipl dem roun wi a dat dem onggl bizniz wid demself an dem no bizniz wid nobadi els. Laik dem spen wol iip a taim pan di intanet a put op tingz bout demself an a chat bout we dem go an aal a di sitn dem we dem a du. Bot nof a dem naa big op Jeuova Gad. Iina da lesn ya, wi a-go taak bout wa it miin fi big op Jeuova an wa fi push wi fi du dat. Pan tap a dat, wi a-go luk pan wa an wa wi kyan du fi big op Jeuova an gi im di rispek we im fi get. An wi a-go si wa Jeuova a-go du fi big op im niem likl fram dis.

A WA IT MIIN FI BIG OP JEUOVA?

2. Wen di Izrelait dem did de a Mount Sainai, a ou Jeuova did shuo se im big an powaful? (Luk pan di picha pan di kova tu.)

² Di Baibl mek wi nuo se Jeuova a wan big an powaful Gad. An wan a di taim wen wi si dis a likl afta di Izrelait dem kom outa Iijip. Picha dis: Uol iip a Izrelait de a di batam a Mount Sainai fi ier wa Gad av fi se tu dem. Den wan daak daak kloud staat fi kova di mountn. Den aal av a sodn wan powaful ortkwiek staat fi shiek op shiek op di plies wid som volkieno a gwaan wid bie tingz. An siem taim dat a gwaan, laitnin a flash, tonda a ruol, an wan loud loud soun we komiin laik wan aan a bluo aal uova di plies. (Ek. 19:16-18; 24:17; Sa. 68:8) Jos tingk bout ou aal a wa di Izrelait piipl dem did si an ier did mek dem waahn fi big op Jeuova.

3. A wa wi kyan du fi big op Jeuova?

³ Aal a wi kyan big op Jeuova. An wan a di wie wi kyan du dat a wen wi tel piipl bout ou big an powaful im bi an bout di nais wiez dem we im av. An wi kyan du dat tu wen wi mek ada piipl nuo se a im gi wi di powa fi du di difrant difrant sitn dem we wi du. (Aiz. 26:12) King Dievid a did wan a di man dem we did riili lov fi big op Jeuova. Wan a di taim dem wen im did a prie infronta di Izrel piipl dem, im mek Jeuova nuo se im big an powaful, an kaaz a ou im ruul im a di bes ruula, an a im fi get di ana an rispek kaa evriting we de iina evn an we de pan di ort a fi’im uon. Wen Dievid did don prie aal a di piipl dem big op Jeuova.​—1 Kr. 29:11, 20.

4. A wa Jiizas did du fi big op Jeuova?

⁴ Wen Jiizas did de pan di ort, im big op Jeuova wen im mek di piipl dem nuo se a Jeuova gi im di powa fi du aal a di mirikl dem we im did a du. (Maak 5:18-20) Wan neda wie Jiizas big op Jeuova a wen im tel ada piipl bout im Faada. An wen di piipl si ou Jiizas chriit dem, it did mek dem big op Jeuova tu. Laik wan a di taim dem wen Jiizas did a tiich iina di Juu dem choch, wan uman did di de we wan diiman did kaaz ar fi kripl fi 18 ier​—ar bak did ben an shi kudn chrietn op. So Jiizas did sari fi ar kaa im si umoch shi did a sofa. So im se tu ar se: “Uman, yu beta nou.” Den im put im an pan ar an siem taim shi tan op chriet chriet an staat fi “priez Gad” kaa shi did gud agen! (Luuk 13:10-13) Di uman did av wol iip a riizn fi big op Jeuova an wi av uol iip a riizn fi du it tu.

A WA PUSH WI FI BIG OP JEUOVA?

5. Wa a som a di riizn dem we mek wi rispek Jeuova?

⁵ Wi big op Jeuova kaa wi av nof rispek fi im. Wi av nof riizn wa mek wi rispek Jeuova. Wi rispek im kaa a im av aal a di powa. (Sa. 96:4-7) An wen wi luk pan di sitn dem we im mek, wi si se im waiz bad. A im gi wi laif an im gi wi di sitn dem we mek wi kyan liv. (Rev. 4:11) An wi rispek im kaa im stik tu di wan dem we a sorv im an a du wa im se no mata wa. (2 Sam. 22:26) An evriting we Jeuova du aalwiez wok out an im aalwiez du wa im pramis se im a-go du. (Jash. 23:14) A das wai di prafit we niem Jerimaiya mek wi nuo se no mata umoch piipl de bout we fiil se dem waiz, nobadi no de bout laik Jeuova. (Jer. 10:6, 7) Dis mek wi si se wi av nof riizn fi rispek Jeuova. Bot di sitn dem we Jeuova du no onggl mek wi rispek im, dem mek wi lov im tu.

6. A wa mek wi lov Jeuova?

⁶ Wi big op Jeuova kaa wi lov im wid aal a wi aat. Jeuova av wol iip a difrant difrant wiez we mek wi lov im. Laik im gud an kain tu wi, an wen wi a sofa im du sitn fi elp wi. (Sa. 103:13; Aiz. 49:15) Wan neda ting bout Jeuova a dat wen sitn ort wi, im fiil it tu. (Zak. 2:8) An im mek it iizi fi wi fi jraa nier tu im an fi ton im fren. (Sa. 25:14; Aks 17:27) Wi lov Jeuova kaa im ombl. Di Baibl mek wi nuo se it wuda komiin laik se wi Gad we big an powaful ben dong luo fi elp wi wid wi prablem dem. (Sa. 113:6, 7) Afta wi tingk bout dem sitn ya, it wuda aad fi no waahn big op Jeuova, no chuu?​—Sa. 86:12.

7. Wa aal a wi av di chaans fi du?

⁷ Wi big op Jeuova kaa wi waahn piipl fi nuo bout im. Nof piipl no nuo di chuut bout Jeuova Gad. An dat a kaa dem biliiv di wikid lai dem we Sietan tel pan Jeuova. (2 Kor. 4:4) Sietan mek piipl biliiv se Jeuova no kier bout nobadi an im no paadn piipl wen dem du notn rang, an se aal a di bad sitn dem we apm iina di worl a Jeuova kaaz it. Bot wi nuo se notn no go so. So wi av di chaans fi big op Jeuova wen wi mek piipl nuo di chuut bout im. (Aiz. 43:10) Nou wi a-go luk pan Saam 96 we shuo wi som wie ou wi kyan big op Jeuova. Wen wi a luk pan da Saam ya, tingk bout wa an wa yu kyan du fi big op Jeuova an gi im di rispek we im fi get.

A OU WI KYAN GI JEUOVA DI BIG OP AN DI RISPEK WE IM FI GET?

8. Wa a wan wie wi kyan big op Jeuova? (Saam 96:1-3)

⁸ Riid Saam 96:1-3. Wa wi se bout Jeuova kyan big im op. Dem vors ya shuo wi som wie ou wi kyan big op Jeuova niem. Dem tel wi se Jeuova piipl dem fi “sing tu Jeuova an big op im niem,” an “fi priich di gud nyuuz bout ou im a-go mek piipl get siev,” an fi mek aal a di piipl dem we de pan di ort nuo wa mek dem fi big op Jeuova an fi gi im di rispek we im fi get. Jeuova piipl dem we yuus tu sorv im fram lang taim neehn ich fi tel ada piipl bout aal a di gud sitn dem we Jeuova du fi dem an fi mek piipl nuo di chuut bout im. (Dan. 3:16-18; Aks 4:29) A ou wi kyan du laik dem?

9-10. Wa wi kyan lorn fram wa Angelena did du? (Luk pan di picha tu.)

⁹ Tingk bout wa did apm tu wan sista we liv iina Merika we niem Angelena.a Shi did briev op arself fi taak op bout Jeuova tu di piipl dem we shi wok wid. Kaa shi jos staat wok a di plies, dem invait ar fi kom a wan miitn we dem a lou di piipl dem we nyuu a di plies fi tel evribadi bout demself. So Angelena put som picha an tingz tugeda pan di kompyuuta fi shuo dem se shi api fi bi wan Jeuova Witnis. Bot bifuo shi get fi du dat, wan man did taak bifuo ar an tel di piipl dem se im gruo op az wan Jeuova Witnis. An den im staat taak aal kain-a sitn bout we di Jeuova Witnis dem biliiv iina an a mak dem. Angelena se: “Mi aat did a biit faas faas. Bot mi se tu miself se: ‘Mi a-go riili sidong an mek sumadi tel lai pan Jeuova, ar mi a-go tan op fi’im?’”

¹⁰ Wen di man don taak, Angelena se wan kwik prieya iina ar aat. Den shi se tu di man se: “Mi did gruo op az wan Jeuova Witnis laik yu, an mi a stil wan Jeuova Witnis.” Afta shi se dat, di plies get kwaiyat bad. Bot Angelena iizi arself an shi shuo evribadi som picha pan ar kompyuuta wid shi an ar fren dem, an ou dem api a sorv Jeuova a di sorkit miitn an kanvenshan an dem plies de. An wen shi a du dis, shi taak op bout wa shi biliiv iina iina wan nais wie. (1 Pii. 3:15, NWT ) Bai di taim Angelena don taak, di man we did taak bifuo ar kaam dong an aal staat fi taak som nais tingz we did apm wen im did a gruo. Angelena se: “Wi fi tan op fi Jeuova an a wan big sitn wen wi get fi taak op fi’im.” A wan big sitn wi get fi du tu fi priez Jeuova an fi big im op aal wen piipl a disrispek im.

11. A ou Jeuova piipl dem a du wa Saam 96:8 se fram wie bak wen til nou?

¹¹ Riid Saam 96:8. Wi kyan yuuz di sitn dem we wot nof tu wi fi big op Jeuova. Jeuova piipl dem aalwiez a yuuz di sitn dem we wot nof tu dem fi big im op. (Pr. 3:9) Laik di Izrelait dem yuus tu gi moni an tingz fi elp fi bil an fi fiks op Gad ous. (2 Ki. 12:4, 5; 1 Kr. 29:3-9) An som a Jiizas falara dem wuda “yuuz wat-eva dem av fi elp sopuot” Jiizas an im apasl dem. (Luuk 8:1-3) An som a di fos taim Kristiyan dem sen moni an dem ting de fi elp out dem breda an sista dem. (Aks 11:27-29) An a siem so tide wi kyan big op Jeuova wen wi gi wi moni an dem ting de.

12. Wen wi gi wi moni an dem ting de, a ou it kyan big op Jeuova? (Luk pan di picha tu.)

¹² Luk pan wa did apm iina Zimbabwe iina 2020 we shuo wi ou wen wi gi wi moni it kyan big op Jeuova. No rien neehn a faal dong de fi wan lang taim, an kaa a dat wol iip a piipl did a ded fi onggri. An a dis did a apm tu wan sista we niem Priska. Aalduo tingz did rof wid ar, evri Wenzde an Fraide shi wuda stil go a sorvis an shi wuda du dat wen ar nieba dem gaan dig op dem grong fi get it redi fi plaant siid an so. An dem wuda laaf aafa ar an mak ar wen shi a go a sorvis insted-a fi a wok iina ar grong. An dem wuda se, “Yu a-go ded fi onggri.” Priska did nuo fi shuor se Jeuova a-go elp ar, an so shi ansa dem an se, “Jeuova naa go lef im piipl fi fen fi demself.” Likl afta dat, shi get som fuud an dem ting de fram Jeuova aaganaizieshan. Priska kuda get dem sitn de kaaz a di moni we wi gi. Wen ar nieba dem si di sitn dem we shi get, dem did shak an so dem se tu ar se: “Wi si se yu Gad neva lef yu fi chuu, wi waahn fi nuo muor bout im.” An so sevn a ar nieba dem staat fi go a di miitn dem.

13. Ou di wie ou wi liv wi laif kyan big op Jeuova? (Saam 96:9)

¹³ Riid Saam 96:9. Di wie ou wi liv wi laif kyan big op Jeuova. Di priis dem we did a wok a Jeuova ous did afi mek shuor se dem badi an dem kluoz aalwiez kliin. (Ek. 40:30-32) Bot muor dan dat dem did afi mek shuor se dem a du wa rait iina Gad yai an no du notn we im no laik. (Sa. 24:3, 4; 1 Pii. 1:15, 16) Wi afi wok aad aad fi “don [we] wid di uol taim laif.” So dat miin se wi naa go se an du notn we Gad iet. An wi a-go chrai fi du an tingk bout tingz di wie ou Gad waahn wi fi dwi’it, an dat wi mek wi komiin laik wan “nyuu sumadi.” An dat a-go elp wi fi tan laik Jeuova an av som nais nais wiez laik im. (Kol. 3:9, 10) Jeuova kyan mek di wos sumadi we a du aal kain-a seks sin an we lov fi kos an fait chienj op dem laif an ton iina wan nyuu sumadi.

14. Wa wi kyan lorn fram wa did apm tu Jack? (Luk pan di picha tu.)

¹⁴ Tingk bout wa did gwaan wid Jack. Im a did wan wikid kriminal we piipl did fried a an dem yuus tu kaal im Di Diiman. Kaaz a di wol iip a bad sitn dem we Jack du, dem sentans im fi ded. Bot wen Jack a wiet pan dem fi kil im, im staat fi stodi di Baibl wid wan breda we wuda kom a di prizn. Kaa Jack did a stodi di Baibl, im chienj op im laif an get baptaiz. So wen dem did a-go kil im, som a di gyaadi dem fi di prizn staat fi baal. Wan a di suoja man dem we wok a di prizn se: “Jack a did di wos man we kom iina da plies ya, bot nou im a di bes wan.” Di wiik afta dem kil Jack, wen di breda dem go a di prizn fi kip di miitn we dem kip a wiik taim, dem miit wan a di prizna dem we a kom a di miitn fi di fos taim. Im mek dem nuo se im de de kaa im si ou Jack chienj op im laif, an so im waahn fi nuo wa im kyan du fi worship Jeuova tu. So wi si klier klier se di wie ou wi liv wi laif kyan big op Jeuova!​—1 Pii. 2:12.

A OU JEUOVA A-GO BIG OP IM NIEM LIKL FRAM DIS?

15. A ou Jeuova a-go shuo evribadi likl fram dis se a im fi get di big op? (Saam 96:10-13)

¹⁵ Riid Saam 96:10-13. Di laas vors dem iina Saam 96 mek wi si se Jeuova a wan Joj an King we aalwiez du wa rait. Likl fram dis Jeuova a-go big op im niem wen im mek shuor se evribadi get jostis. So suun suun im a-go mash dong Powaful Babilan we a tel bie wikid lai pan im an a naasi op im niem. (Rev. 17:5, 16; 19:1, 2) Som a di piipl dem we si Powaful Babilan get mash dong mait-a waahn fi kom worship Jeuova wid wi. Den wen di Aamagedan waar a gwaan, Jeuova a-go mash dong da wikid worl ya we Sietan a kanchuol an don di wan dem we iet im an a tel lai pan im. Bot im a-go siev di wan dem we lov im an a du wa im se an we no fried fi big op im niem. (Maak 8:38; 2 Tes. 1:6-10) Wen di Touzn Ier don we Jiizas a-go ruul fa an Sietan get let go outa prizn an a chrai fi fuul op evribadi, Jeuova a-go mek evribadi si se a Im fi get di big op an aal a di rispek. (Rev. 20:7-10) An dem taim de evribadi we de pan di ort a-go nuo se a Jeuova dem fi gi di big op an di rispek.​—Aba. 2:14.

16. Wa yu mek op yu main fi du? (Luk pan di picha tu.)

¹⁶ Tingk bout ou nais it a-go bi wen evribadi we a liv pan di ort a gi Jeuova di big op an di rispek we im fi get! Bot til da taim de kom, mek wi yuuz evri chaans we wi get fi big op Jeuova. An a das wai di Govanin Badi pik Saam 96:8 fi di skripcha we fi gaid wi iina 2025 we se: “Big op Jeuova niem an gi’im di rispek we im fi get.”