A Ou Di Ozban Dem Kyan Shuo Se Dem Lov An Rispek Dem Waif?

1. Wa a wan riizn we mek Jeuova mek wan man an uman kyan marid tu dem wan aneda?

JEUOVA a “di Gad we api” an im waahn wi fi api tu. (1 Tim. 1:11, NWT ) An im gi wi wol iip a gud sitn fi mek wi enjai wi laif. (Jmz. 1:17) Wan a dem gud sitn de we im gi wi a fi kyan get marid. Wen wan man an wan uman get marid, dem pramis se dem a-go lov an rispek dem wan aneda. An wen dem chrai dem bes fi du dat, it kyan mek dem riili api.​—Pr. 5:18.

2. A ou nof ozban chriit dem waif?

² Bot nof marid piipl no api kaa dem no memba wa dem did pramis dem wan aneda pan di die wen dem marid. Di World Health Organization mek wi nuo se nof ozban biit an bata bruuz dem waif an se tingz fi ort dem. An som a dem ozban ya mait-a tuu-fies​—dem diil wid dem waif gud wen dem de infronta piipl, bot wen dem de a yaad dem chriit dem bad. An wan neda ting we mek nof marid piipl no api a dat di ozban dem a wach bluu muuvi an dem ting de.

3. A wa mek som man chriit uman bad?

³ Som a di ozban dem chriit dem waif bad kaa a so dem faada did chriit dem mada, an dem fiil se a jos so man stie. An som ada man du it kaaz a ou di man dem we de roun dem chriit uman, dem fiil se ef man a man dem fi mek uman nuo se a dem a di baas. An yu av som ada man we iizi fi get beks kaa nobadi neehn chrien dem fi kanchuol ou dem fiil. An yu av som ada man we chriit uman bad kaa dem wach bluu muuvi an dem ting de we mek dem fiil se a onggl seks uman gud fa. Pan tap a dat, wen KUOVID-19 did a go roun an piipl did afi tan a dem yaad, nof a dem ting ya get wos. Bot non a dem sitn ya no mek it rait fi wan man chriit uman eni an eni wie.

4. A wa di ozban dem we a sorv Jeuova fi mek shuor se dem naa du, an wa mek?

⁴ Di ozban dem we a sorv Jeuova niid fi mek shuor se dem no tingk bout uman di wie ou som piipl iina di worl tingk bout uman.a Kaa muor wail di sitn dem we wi tingk bout a dat wi en op du. An a di siem ting di apasl Paal did mek di breda dem iina Ruom nuo wen im did rait an tel dem se dem fi “no mek di piipl we de iina di worl tel [dem] ou fi liv.” (Ruo. 12:1, 2) An wen Paal did a rait dis tu di breda dem iina Ruom, dem did a sorv Jeuova fi wan gud taim aredi. Bot Paal did a mek dem nuo se som a dem stil did a mek di piipl dem iina di worl tel dem ou fi liv. So im did waan dem se dem fi chienj ou dem tingk an chienj di ting dem we dem did a du. An a di siem ting fi di ozban dem iina di kanggrigieshan tide. Sad fi se som a di ozban dem iina di kanggrigieshan a fala di piipl dem iina di worl an a chriit dem waif bad.b Iina di mien skripcha fi da lesn ya wi a-go fain out ou Jeuova ekspek wan ozban fi chriit im waif.

5. Azkaadn tu 1 Piita 3:7, a ou wan ozban fi chriit im waif?

⁵ Riid 1 Piita 3:7. Jeuova tel di ozban dem se dem fi rispek dem waif. Dat miin se dem fi du tingz fi shuo se dem lov dem waif an chriit dem iina wan kain wie. Iina da lesn ya, wi a-go taak bout ou wan ozban kyan shuo se dem rispek dem waif. Bot fos wi a-go luk pan som tingz we som ozban du we shuo se dem no rispek dem waif.

NO DU TINGZ WE A-GO DISRISPEK YU WAIF

6. A ou Jeuova fiil bout di ozban dem we a biit an bata bruuz dem waif? (Koloshan 3:19)

⁶ Wan ozban no fi a biit an bata bruuz im waif. Jeuova no iina notn wid di wan dem we lov fi fait an redi fi kil. (Sa. 11:5) Bot a no onggl dat, im iet wen wan man lov fi rof op im waif an aal waahn biit ar tu. (Mal. 2:16; riid Koloshan 3:19.) Azkaadn tu 1 Piita 3:7, di mien skripcha fi da lesn ya, wan man kyaahn tan gud fren wid Gad ef im a chriit im waif bad. Im mait-a aal fain se im a prie an Jeuova naa lisn tu im prieya dem niida.

7. Azkaadn tu Ifiijan 4:31, 32, wa mek wan ozban no fi se tingz fi ort im waif? (Luk pan di paat we niem “Dis Miin Se.”)

⁷ Wan ozban no fi se tingz fi ort im waif. Som ozban lov fi se tingz fi ort dem waif an mek dem fiil bad. Bot Jeuova iet wen piipl get beks bad an “kos out an tier dong [dem] wan aneda.”c (Riid Ifiijan 4:31, 32.) Jeuova ier evriting, iivn di wie ou wan ozban taak tu im waif wen dem de a dem yaad, an dis a sitn we Jeuova tek siiros. Wan ozban we se tingz fi ort im waif no onggl a mash op im marid laif bot im an Jeuova naa go kluos agen.​—Jmz. 1:26.

8. Ou Jeuova fiil bout bluu muuvi an dem ting de, an wa mek?

⁸ Wan ozban no fi a wach bluu muuvi an dem ting de. Jeuova iet bluu muuvi an dem ting de. So wen wan ozban tek iin dem ting de, Jeuova naa go waahn fi av notn fi du wid im an a disrispek im a disrispek im waif.d Jeuova waahn di ozban dem fi aalwiez a stik tu dem waif no onggl iina di ting dem we dem du, bot dem fi a du dis iivn wid di sitn dem we dem a tingk bout. Jiizas did se ef wan man a ‘luk pan wan uman we im no marid tu laik se im waahn fi sliip wid ar, it wuda komiin laik se im don sliip wid ar aredi iina im main.’e​—Mat. 5:28, 29, NWT.

9. Wa mek Jeuova iet it wen wan ozban a presha im waif fi du sitn wen dem a av seks?

⁹ Wan ozban no fi a presha im waif fi du sitn we shi no waahn fi du wen dem a av seks. Wen dem a av seks, som ozban presha dem waif fi du som sitn we mait-a mek shi fiil a wie an we mek ar fiil laik se im no lov ar. Bot Jeuova no laik dem sitn de, im waahn di ozban dem fi shuo se dem lov an rispek dem waif. Dat miin tu se dem naa go du notn we a-go mek dem waif kanchens bada dem. (Ifii. 5:28, 29) Bot supuoz wan ozban a du dem sitn ya we wi taak bout aredi. Wa im kyan du fi chienj op im wiez dem an di wie ou im a tingk?

WA KYAN ELP WAN OZBAN FI TAP DU TINGZ WE SHUO SE IM A DISRISPEK IM WAIF?

10. Wa di ozban dem kyan lorn fram Jiizas?

¹⁰ Wen wan ozban du laik Jiizas, dat wi elp im fi tap du di sitn dem we a disrispek im waif. Aalduo Jiizas neva marid, di wie ou im chriit im falara dem kyan elp wan ozban fi si ou im fi chriit im waif. (Ifii. 5:25) Wi a-go luk pan wa di ozban dem kyan lorn fram di wie ou Jiizas did chriit im apasl dem an ou im did taak tu dem.

11. A ou Jiizas did chriit im apasl dem?

¹¹ Jiizas did aalwiez chriit im apasl dem iina wan kain wie an shuo se im rispek dem. Im neva rof dem op ar baas dem roun. Aalduo Jiizas did a dem Laad an Tiicha, im neehn fiil laik se im niid fi du notn fi shuo dem se a im ron tingz. Insted-a dat, im du tingz fi dem we shuo se im ombl. (Jan 13:12-17) Im tel im falara dem se: “Tek iin wa mi a tiich, kaa mi wi tek taim wid unu, an mi riili ombl, an unu wi get fi res unu suol.” (Mat. 11:28-30) Di skripcha se Jiizas tek im taim wid piipl. Sumadi we tek dem taim wid piipl a no sumadi we wiik, bot a sumadi we chrang kaa im nuo ou fi kanchuol imself. So wen sitn apm we mek im get beks, im naa go du notn fi mek tingz get wosa, im a-go jos iizi imself.

12. A ou Jiizas taak tu piipl wen im a taak tu dem?

¹² Jiizas wuda se tingz fi osh piipl an mek dem fiil gud. Wen im did a taak tu im falara dem, im neva rof dem op. (Luuk 8:47, 48) Aal wen piipl chrai fi mek im get beks an tel im at-wod, “im neva tel dem bak non.” (1 Pii. 2:21-23) An som a di taim, Jiizas neva iivn bada ansa dem. (Mat. 27:12-14) Di ozban dem kyan lorn nof fram Jiizas, no chuu?

13. Azkaadn tu wa Matyu 19:4-6 se, ou wan ozban kyan shuo se im a-go aalwiez “jain op wid im waif”? (Luk pan di picha tu.)

¹³ Jiizas tel di ozban dem se dem fi aalwiez stik tu dem waif. Im mek wi nuo se im Faada se wan ozban fi “jain op wid im waif.” (Riid Matyu 19:4-6.) Di wod we dem yuuz iina da skripcha ya we se fi “jain op” kom fram wan Griik wod we miin “fi gluu tugeda.” So dat wuda miin se di lov we wan ozban an waif av fi dem wan aneda fi wel chrang dat it wuda komiin laik se a gluu dem gluu tugeda. So ef wan a dem du sitn fi ort dem wan aneda, a di tuu a dem wuda sofa. Wen wan ozban av chrang lov fi im waif, im naa go luk pan no bluu muuvi an dem ting de. So wen dem sitn de kom op pan im fuon an dem ting de, im naa go ich fi ton we im fies so dat im no “luk pan notn we a-go mek [im] tingk bout tingz we a-go doti op [im] main.” (Sa. 119:37) So it wuda komiin laik im pramis imself se im naa go luk pan no ada uman laik se im waahn dem.​—Juob 31:1.

14. Wa a som a di sitn dem we wan ozban we a biit an bata bruuz im waif fi du so dat im an Jeuova an im waif kyan gud agen?

¹⁴ Wan ozban we a biit an bata bruuz im waif an a se tingz fi ort ar niid fi chienj im wiez so dat im an Jeuova an im an im waif kyan gud agen. Di fos ting a dat im niid fi si se sitn riili rang wid im an nuo se im kyaahn aid notn fram Jeuova niida. (Sa. 44:21; Iik. 12:14; Iib. 4:13) Di sekan ting im niid fi du a tap biit op biit op im waif an chienj im wiez dem. (Pr. 28:13) Di tord ting a se im fi tel im waif an Jeuova se im sari an beg dem fi paadn im. (Aks 3:19) An im fi beg Jeuova fi elp im fi waahn fi chienj im wiez dem an fi elp im fi tingk bout tingz, taak bout tingz, an du di tingz we Im waahn im fi du. (Sa. 51:10-12; 2 Kor. 10:5; Fil. 2:13) Di fuot ting im waahn fi du a chrai fi du di ting dem we im prie tu Jeuova bout, an chrai fi iet eniting we av fi du wid faitin an kilin, an no fi waahn se tingz fi ort ada piipl. (Sa. 97:10) Di fif ting a dat im no fi ich fi go tu di elda dem so das dem kyan elp im. (Jmz. 5:14-16) An di siks ting we im fi du a kom op wid wan plan we a-go elp im fi no du dem bad sitn ya agen. An a dem siem ting ya wan ozban we a wach bluu muuvi an dem ting de niid fi du. Wen dem chrai fi du dem bes fi chienj dem wiez, dem kyan nuo fi shuor se Jeuova a-go bles dem. (Sa. 37:5) Bot a no jos se wan ozban no fi chriit im waif bad, bot im fi nuo ou fi du tingz fi mek ar si se im lov an rispek ar. Mek wi si ou im kyan du dat.

WA YU FI DU FI MEK YU WAIF SI SE YU LOV AN RISPEK AR?

15. A ou wan ozban kyan shuo im waif se im lov ar?

¹⁵ Shuo yu waif se yu lov ar. Som a di breda dem we marid an api du tingz evridie fi mek dem waif si se dem lov ar. (1 Jan 3:18) Dem kyan du som likl likl sopm fi mek dem waif si se dem lov dem, laik dem kyan uol dem waif an an og ar op. An im kuda sen ar wan teks iina di die we se “Mi mis yu bad” ar “Wa apm biebz, yu aarait?” An som a di taim im kyan bai wan likl kyaad an rait sitn nais iina it gi ar. Wen taim wan ozban du dem sitn ya, im a shuo im waif se im lov an rispek ar an dat a-go elp dem fi api bad.

16. Wa mek wan ozban fi big op im waif?

¹⁶ Mek yu waif nuo se yu api fi aal a we shi du. Wan ozban we lov an rispek im waif big ar op an mek shi fiil gud bout arself. Im kyan du dat wen im memba fi tangk ar fi aal a di sitn dem we shi du fi elp im. (Kol. 3:15) Wen wan ozban big op im waif it mek ar nuo se im lov ar an rispek ar, an it mek ar nuo se im a-go di de fi ar no mata wa.​—Pr. 31:28.

17. A ou wan ozban kyan shuo im waif se im rispek ar?

¹⁷ Yu fi rispek yu waif an kain tu ar. Wan ozban we lov im waif mek ar nuo se shi miin nof tu im an se shi a wan gif we Jeuova gi im. (Pr. 18:22; 31:10) Wen wan ozban fiil dem wie ya bout im waif, im a-go rispek ar an kain tu ar aal wen it kom aan tu tingz laik seks. Im naa go presha ar fi du tingz we shi no waahn fi du we kuda mek ar kanchens bada ar ar we mek shi fiil laik se shi no wot notn.f An im a-go mek shuor se im no du notn we mek fi im kanchens bada im niida.​—Aks 24:16.

18. A wa di ozban dem fi mek op dem main fi du? (Luk pan di paat we niem “Fuor Tingz We Wan Ozban Kyan Du Fi Mek Im Waif Si Se Im Rispek Ar” tu.)

¹⁸ Yu kyan nuo fi shuor se Jeuova si an nuo aal a wa di ozban dem a du fi shuo dem waif se dem lov an rispek dem. So mek op yu main fi aalwiez du tingz fi chriit yu waif gud, laik yu fi kain tu ar, an du tingz fi mek ar si se yu lov an rispek ar. An dat a-go mek ar nuo se shi wot nof tu yu. So gwaan du tingz fi mek yu waif si se yu lov an rispek ar, an dat a-go mek Jeuova yu gud gud fren.​—Sa. 25:14.