Yu Kyan Jraa Picha Fi Elp Yu Memba Wa Yu Stodi

Wen yu a stodi, som a di taim it mait-a aad fi yu memba wa yu a stodi. Bot wen yu tingk bout di tuori dem we Jiizas did yuuz fi tiich wen im did de pan di ort, no chuu se dem iizi fi memba? An dat a kaa it did mek piipl picha wa im a se iina dem main. A siem so yu kyan memba di sitn dem we yu stodi wen yu jraa wan likl picha bout wa yu a lorn.

Dem fain out se wen piipl jraa wan likl picha bout sitn nyuu we dem lorn, it elp dem fi memba it muor. An dem fain se dis no onggl elp dem fi memba di wod dem we dem a stodi bout, bot it elp dem fi memba di mien sitn dem we dem a stodi bout tu. Dis no miin tu se yu afi kyan jraa gud, bot aal yu afi du a jos jraa wan likl sitn we a-go elp yu fi memba wa yu a lorn. Yu kuda aal jraa stik man tu. An dis kyan aal elp di piipl dem we op iina iej fi memba di ting dem we dem stodi.

So di neks taim yu a du yu uona Baibl stodi chrai jraa wan likl picha bout wa yu a lorn. Yu mait-a shak fi si umoch yu memba fram wa yu stodi!