1925​—Onjrid Ier Ago

DEM DID AFI GWAAN WIET

Nof a di breda an sista dem did fiil se di ort wuda ton iina wan Paradais agen iina 1925. Breda Albert Schroeder, we go pan di Govanin Badi wol iip a ier afta dat, mek wi nuo wa mek som a di breda an sista dem did tingk so. Im se: “Iina 1925, di breda an sista dem did fiil se dem wuda go a evn, an se Iebriyam an Dievid, an di wan dem we did du wa rait, wuda kom bak alaiv fi tek di liid pan di ort.” Bot wen dem si se di ier did out fi don an dem neehn go a evn, som a di breda an sista dem did fiil a wie.​—Pr. 13:12.

Bot aalduo nof a di sitn dem we di breda dem did a luk fi si apm neehn apm, dem did stil a wok aad iina di priichin wok. An muor an muor a dem get fi si se fi bi wan Witnis fi Jeuova, a dat fi bi di big ting iina dem laif. Mek wi luk pan ou dem did yuuz di riediyo fi priich tu wol iip a piipl.

DEM MEK SOM MUOR RIEDIYO STIESHAN

Iina 1924, nof piipl did a lisn tu wi riediyo stieshan we did niem WBBR. So iina 1925, di breda dem did mek wan neda riediyo stieshan we did niem WORD. Da riediyo stieshan de did de nier Chikaago we de iina Ilanai. Wan breda we niem Ralph Leffler, we did elp fi mek da riediyo stieshan de, se: “Nof piipl we liv iina som faar faar plies did a lisn tu WORD, speshali pan di nait dem we did daak an kuol.” Laik yu did av wan fambili we did liv a Pailat Stieshan iina Alaska, dat a bout 3,000 mail fram we di riediyo stieshan did de. Da fambili de did chuun iin di fos taim wan pruogram did gwaan pan da riediyo stieshan de. An wen dem did don lisn, dem did rait wan leta tu di breda dem we did wok a di riediyo stieshan fi tel dem tangks fi da nais pruogram de we did elp dem fi lorn muor bout Gad an di Baibl.

The Watch Tower fi Disemba 1, 1925, mek wi nuo wa mek so moch piipl kuda ier wa did a gwaan pan di riediyo stieshan. It se: “WORD a wan a di riediyo stieshan dem iina Merika we powaful bad kaa di signal kyan riich faar faar. An piipl kyan ier da riediyo stieshan ya klier klier aal uova Merika, an iina Kyuuba, an aal a di faar faar plies dem we de iina Alaska tu. An nof nof piipl we neva ier di chuut yet waahn fi lorn muor nou kaa dem lisn tu da riediyo stieshan ya.”

Di siem taim dis did a gwaan, di breda an sista dem iina Kyanada did waahn fi yuuz di riediyo fi priich di gud nyuuz tu. So iina 1924, dem mek wan riediyo stieshan we niem CHUC iina Saskatuun, we de iina Saskyachuwan. Da riediyo stieshan ya a did di fos wan iina Kyanada we wuda kyari pruogram bout Gad an di Baibl. Bot iina 1925, dem did afi fain wan biga plies fi put di riediyo stieshan. So di aaganaizieshan tek uova di riediyo stieshan an dem did muuv it go a di Regent Building, we did de iina Saskatuun. Da bildin ya a did wan plies we piipl yuus tu go wach plie an dem ting de. Bot di breda dem did bai it an fiks it op so das it kuda yuuz fi di riediyo stieshan.

Kaaz a da riediyo stieshan de, nof piipl we liv iina di konchri paat dem a Saskyachuwan kuda ier di gud nyuuz fi di fos taim. Laik wan uman we did niem Mis Graham did rait tu di breda dem an aks dem fi sen som buk an pamplet fi ar afta shi lisn tu di riediyo stieshan. Breda George Naish did memba wa did apm wen im se: “Wen shi rait an se, ‘Du, tiich wi!’ wi did nuo se wi afi du sopm fi elp ar. So wi did sen ar di wol a di buk dem we niem Studies in the Scriptures.” An likl afta dat, Mis Graham staat fi priich di gud nyuuz tu wol iip a piipl iina fi ar ieriya an aal faar fram we shi liv tu.

WI LORN WAN IMPUOTANT BAIBL CHUUT

The Watch Tower fi Maach 1, 1925 did av wan impuotant lesn iina it we niem “Birth of the Nation.” An dis a sitn we di breda dem did niid fi nuo, kaa dem did nuo aredi se Sietan av wan aaganaizieshan we im kanchuol di diiman dem an di faalz rilijan dem, an di govament dem, an ou tingz set op iina di worl wen it kom aan tu moni an bizniz an dem ting de. Bot di “waiz sorvant” did yuuz da lesn ya fi shuo di breda an sista dem se Jeuova av wan aaganaizieshan tu we na’av notn fi du wid Sietan an da wikid worl ya, an di tuu aaganaizieshan dem naa go grii. (Mat. 24:45) Pan tap a dat, da lesn de did mek it klier klier se Gad govament did staat fi ruul iina 1914, an dat iina da sed ier de waar did brok out iina evn an Sietan an im diiman dem get fling dong a ort an dem kyaahn go baka evn.​—Rev. 12:7-9.

Som a di breda an sista dem neehn tuu grii wid da tiichin ya. So di lesn did se: “Ef enibadi we a riid da Watch Tower ya no grii wid da tiichin ya, den wi a beg unu du, gwaan chos iina Jeuova an wiet pan im, an no tap sorv im.”

Bot wan breda we niem Tom Eyre, we kom fram Britn, we did a wan kolpuota (we wi kaal paiyanier nou), tel wi ou nof a di breda an sista dem did fiil bout wa da lesn de did se. Im se: “Di breda dem did api so til se dem get fi andastan wa Revilieshan 12 did riili a se. Wen wi get fi si se Gad govament did staat fi ruul iina evn, wi did wel api fi tel ada piipl da gud nyuuz ya. An it did mek wi waahn fi priich muor an muor, an it did elp wi fi si se Jeuova did a-go du som wol iip a nais sitn fi im aaganaizieshan iina di fyuucha.”

WI A WITNIS FI JEUOVA

Nowadiez, aal a di Jeuova Witnis dem nuo wa Aizaiya 43:10 se gud gud, wen it se: “Jeuova se: ‘Unu a mi witnis; a unu mi pik fi kom sorv mi.’” Bot iina di ier dem bifuo 1925, wi neehn taak bout da skripcha ya wol iip iina wi buk an pamplet dem. Bot dat did chienj iina 1925. Kaa iina da ier de, The Watch Tower taak bout Aizaiya 43:10 an 12 iina 11 a di Wachtowa dem we did kom out da ier de.

Di breda dem did av wan kanvenshan iina di laas paat a Aagos iina 1925, we dem did kip iina Indiyanapalis, we de iina Indiyana iina Merika. Pan di pruogram fi di kanvenshan, Breda Joseph F. Rutherford did rait wan likl mesij fi welkom di breda dem we kom. It did se: “Wi kom a da kanvenshan ya fi Jeuova gi wi di chrent so das wi wel waahn fi go bak go priich tu piipl an tel dem bout im.” Yu si fi di iet die dem a da kanvenshan de, di taak dem did inkorij di breda an sista dem fi yuuz evri chaans we dem get fi tel ada piipl bout Jeuova.

Pan Satde Aagos 29, Breda Rutherford gi wan taak we niem “Mi Waahn Unu Fi Du Sitn.” Iina di taak, im mek di breda an sista dem nuo se it did impuotant fi dem witnis bout Jeuova. Im se: “Jeuova se tu di piipl dem se: ‘Unu a fi mi witnis an mi a Gad.’ Den im tel im piipl dem wa dem fi du wen im se: ‘Uol op wan sain fi di piipl dem.’ An di onggl set a piipl dem we kyan du dis an tel piipl bout Jeuova a di wan dem we a fi im piipl kaa im pik unu fi bi im witnis dem, an a unu im a yuuz im spirit fi gaid.”​—Aiz. 43:12; 62:10.

Afta Breda Rutherford don im taak, im riid wan pamplet we niem “Message of Hope.” It did mek dem nuo se Gad govament a di onggl govament we kyan elp “piipl fi liv iina piis, an fi aati an aarait, an frii dem fram aal a di prablem an badarieshan we dem av nou, an fi liv fi eva, an api kyaahn don.” Wen Breda Rutherford don riid da pamplet de, evribadi we did di de get op an staat klap fi shuo se dem grii wid evriting we did iina it. An yu waahn nuo se dem did put da pamplet ya iina wol iip a difrant difrant langwij, an dem print it so di breda an sista dem kuda yuuz it iina fiil sorvis. A bout 40 miliyan a dem pamplet de dem gi out.

A neehn til kopl ier afta dat bifuo di breda an sista dem tek aan di niem Jeuova Witnis. Bot fram dem de taim de, dem staat fi andastan se it impuotant fi dem priich an mek piipl nuo bout Jeuova.

DEM GO BAK GO TAAK TU DI PIIPL DEM WE DID WAAHN FI LORN MUOR

Kaa muor an muor piipl did a lorn di chuut, di breda dem we did a tek di liid did inkorij di breda an sista dem se dem no fi jos lef buk an pamplet wid di piipl dem, bot dem fi go bak tu di wan dem we waahn fi nuo muor. So afta dem don di kyampien fi gi out di pamplet we niem Message of Hope, di Bulletina did se: “Wi waahn unu fi saat out tingz so das di breda an sista dem kyan go bak tu di piipl dem we dem neehn lef no buk wid, bot we dem did lef wan a di Message of Hope pamplet wid.”

Iina di Bulletin fi Janiweri 1925, wan breda did tel wa apm iina Plieno we de iina Teksas. Im se: “Wi fain se wen wi go baka di plies dem we wi priich aredi, wi get muor piipl fi taak tu dan wen wi priich somwe fi di fos taim. Wi av wan likl toun iina wi ieriya we wi go faiv taim nou fi go priich iina di laas ten ier. . . . An wa die ya, Sista Hendrix an mi mada go bak de an dem gi out muor buk dan dem eva gi out bifuo.”

Wan kolpuota iina Panamaa did rait an se: “Nof a di piipl dem we did ron wi fram dem ous diil wid mi difrant wen mi go bak di sekan ar di tord taim. So muos a di piipl dem we mi priich tu iina da ier ya a piipl we mi taak tu aredi. An mi fain se mi av wan gud taim a taak tu som a dem.”

DI BREDA AN SISTA DEM DID API FI DU MUOR WOK

Iina di leta we Breda Rutherford wuda rait tu di kolpuota dem a ier taim, im did taak bout wa did gwaan iina di priichin wok iina 1925 an wa dem did a luk faawod fi du iina 1926. Im se: “Da ier ya wi get di chaans fi osh wol iip a piipl we did sad. An dat did mek wi api bad. . . . An neks ier wi a get wol iip a chaans fi priich tu piipl bout Gad an im govament, an fi shuo dem uu riili a worship Gad di rait wie. . . . So mek wi gwaan yuuz wi mout an priez Jeuova wi Gad an King.”

Wen 1925 out fi don, di breda dem did a plan fi mek di Betel iina Bruklin biga, an dis wuda staat iina 1926. An da bildin wok ya wuda bi di bigis wan we di aaganaizieshan eva du.