Jeuova Kyan Elp Wi ‘Fi Bi Riili Api’

1-2. (a) Ou nof piipl fiil nowadiez? (b) Wa wi a-go taak bout iina da lesn ya?

PIIPL nowadiez wi du eniting fi bi api, bot no mata wa dem du dem stil no api. An kaaz a dat, nof piipl get sad an fiil se tingz naa go get beta fi dem. An som a wi we a sorv Jeuova mait-a fiil da wie de tu. Wi a liv iina “di laas die dem” an so tingz mait-a ‘get rof wid wi,’ an wen dat apm wi mait-a wori wori op wiself ar get sad.​—2 Tim. 3:1.

² Iina da lesn ya, wi a-go luk pan som sitn we kyan mek wi sad, an wi a-go si wa kyan elp wi fi fiil api agen. Bot fos, mek wi si uu kyan elp wi fi bi riili api.

A UU KYAN MEK WI RIILI API?

3. Wa wi lorn bout Jeuova fram di sitn dem we im mek? (Luk pan di picha dem tu.)

³ Jeuova aalwiez api an im waahn wi fi bi api tu. An a das wai im mek so moch sitn we mek wi api, laik di nais nais ort we wi liv pan, di wol iip a priti kola dem we wi kyan si, wi lov fi si di animal dem a ramp roun wid dem wan aneda, an wen wi nyam som nais fuud, it mek wi fiil gud. Jeuova riili lov wi an im waahn wi fi enjai wi laif.

Biebi elifant: Image © Romi Gamit/Shutterstock; biebi pingwing: Vladimir Seliverstov/500px via Getty Images; guot kid: Rita Kochmarjova/stock.adobe.com; tuu dalfin: georgeclerk/E+ via Getty Images

4. (a) Wa mek Jeuova stil api iivn duo im si piipl a sofa? (b) Wa a wan ting we Jeuova du fi wi? (Saam 16:11)

⁴ Iivn duo Jeuova a “di Gad we api,” im si se a nof sofarieshan a gwaan iina di worl. (1 Tim. 1:11) So ou kom Jeuova kyan stil api iivn duo im nuo wa a gwaan iina di worl? Dat a kaaz im nuo se wa a gwaan naa go laas fi eva, an im suun du sitn bout it. Bot iina di miin taim, Jeuova nuo wa wi a go chuu an im waahn fi elp wi. Bot a ou im elp wi duo? Fi wan ting, im elp wi fi bi api. (Riid Saam 16:11.) Jiizas did api kaaz im nuo Jeuova. Bot wa mek wi kyan se so?

5-6. Wa mek Jiizas aalwiez api?

⁵ Outa aal a di sumadi dem we Jeuova mek, Jiizas a di wan we api di muos. Wa mek? Si tuu riizn ya: (1) ‘Im stie jos laik im Faada’ an dat a wa mek im so api. (Kol. 1:15; 1 Timoti 6:15.) (2) A Jeuova mek evribadi api an Jiizas spen muor taim wid im dan enibadi els.

⁶ Jiizas api kaa im aalwiez du wa im Faada waahn im fi du. (Pr. 8:30, 31; Jan 8:29) An kaaz a dat Jeuova proud a im.​—Mat. 3:17.

7. Wa an wa kyan mek wi fiil api?

⁷ Jos laik Jiizas, wi kyan bi riili api tu. Wen wi spen taim a lorn ou Jeuova tingk bout tingz, dat wi elp wi fi du laik im, an dat mek wi api. Pan tap a dat, wen wi du di sitn dem we Jeuova se wi fi du an wi nuo se im api wid wi, dat wi mek wi api tu.a (Sa. 33:12) Bot wa ef som a di taim wi no fiil api, yu tingk dat miin se Jeuova no api wid wi? Nuo sa! Non a wi no porfek, so som a di taim wi a-go fiil pien, an wi a-go sad bad, an Jeuova nuo dis. (Sa. 103:14) Mek wi luk pan som a di sitn dem we kyan mek wi sad an wa wi kyan du fi fiil api agen.

NO MEK NOTN TAP YU FRAM BI API

8. Wa kyan apm tu wi wen wi av wol iip a prablem?

⁸ Sitn we kyan mek yu fiil sad. 1: Wen prablem a lik wi. Yu op iina iej, yu a av moni prablem, yu sik bad, piipl a chriit yu bad kaaz a wa yu biliiv iina, ar orikien an dem ting de a mek tingz aad fi yu? Aal a dem sitn de kyan mek wi sad, speshali ef wi kyaahn du notn bout dem. Di Baibl mek wi nuo se wi mait-a fiil so sad dat wi fiil laik se wi kyaahn api agen. (Pr. 15:13) An a siem wie so wan elda we niem Babis did fiil. Iina jos fuor ier im mada, im faada, an im breda ded. Im se: “Mi did fiil laik mi de pan mi uon an mi fiil laik nobadi neva di de fi elp mi. Som a di taim mi did fiil schres out, kaa mi did waahn fi spen muor taim wid mi mada an faada an mi breda bifuo dem ded, bot mi neehn get fi dwi’it.” Som a di taim, di wol iip a prablem dem we wi afi a diil wid mek wi fiil taiyad an mek wi fiil laik se wi waahn gi op.

9. Wa kyan elp wi fi bi api agen? (Jerimaiya 29:4-7, 10)

⁹ Wa kyan elp wi fi bi api agen? Wi kyan api agen ef wi tap wori wori wiself bout tingz we wi kyaahn chienj, an gi tangks fi di ting dem we wi av. Wol iip a piipl waahn wi fi tingk se evriting iina wi laif afi nais fi wi kyan bi api, bot notn no go so. Laik Jeuova did tel di Juu piipl dem we dem did kyapcha an kya go a Babilan se dem fi chrai dem bes fi enjai dem laif dong de. (Riid Jerimaiya 29:4-7, 10.) Wa wi lorn fram dis? Chrai fi tingk bout di gud ting dem we a gwaan iina yu laif an gi tangks fi dat. An memba se Jeuova a-go aalwiez di de fi elp yu. (Sa. 63:7; 146:5) Effie, we did de iina wan aksident an kyaahn waak ya nou, se: “Jeuova, mi fambili, an mi breda an sista dem iina di kanggrigieshan did elp mi iina wol iip a wie. An dem elp mi fi gwaan eng aan an no gi op tu. Mi waahn dem fi nuo se mi tangk dem fi wa dem du fi mi, so mi chrai mi bes fi stie api.”

10. Wa mek wi kyan bi api iivn wen wi av prablem a diil wid?

¹⁰ Iivn ef evriting no so nais iina wi laif ya nou an wol iip a bad tingz a apm tu wi ar wi fambili, wi kyan stil bi api.b (Sa. 126:5) Wa mek wi se so? Kaaz a no ou wi laif set mek wi api. Wan paiyanier we niem Maria se: “Wen wi a go chuu wi prablem dem, wi kyan stil api kaaz wi memba di sitn dem we Jeuova pramis fi gi wi iina di fyuucha. Dis no miin se di prablem dem naa go mek wi baal som a di taim an wi naa go taak bout ou wi fiil. Bot wi Faada Jeuova kyan elp wi fi stie api no mata wa wi a go chuu.” No mata ou tingz rof wid wi ya nou, memba se di prablem dem naa go laas fi eva. Jos laik wen yu go a sii-said an yu fut print out iina di san an likl afta dat waata wash it we, a siem wie so Jeuova a-go get rid a aal a wi prablem dem an notn naa go lef bak.

11. Ou wa di apasl Paal did go chuu kyan elp wi?

¹¹ Wa ef yu a wori wori op yuself a tingk se Jeuova no api wid yu agen kaa a di wol iip a prablem dem we yu a go chuu. Ef a so yu fiil, it wuda gud ef yu kyan tingk bout som piipl iina di Baibl we did go chuu som wol iip a prablem bot did stil stik tu Jeuova. Laik luk pan wa did gwaan wid di apasl Paal. Jiizas did pik im fi priich “[tu] piipl we a no Juu, di king dem an di Izrel piipl dem tu.” (Aks 9:15) An dat did a wan big ting! Bot iivn duo Paal did get da speshal wok de fi du, im did stil av wol iip a prablem a diil wid. (2 Kor. 11:23-27) Kaa Paal did a go chuu wol iip a prablem, yu tingk dat did miin se Jeuova neehn api wid im agen? Nuo sa! Kaa ef a neehn fi Jeuova, Paal kudn eng aan an no gi op wid aal a di prablem dem we im did afi go chuu. (Ruo. 5:3-5) Nou tingk bout wa a gwaan wid yu, yu a eng aan an naa gi op iivn duo yu a go chuu wol iip a prablem? Ef a dat yu a du, yu kyan nuo fi shuor se Jeuova api wid yu.

12. Ou wi mait-a fiil ef wi no get fi du di ting dem we wi waahn fi du fi Jeuova?

¹² Sitn we kyan mek yu fiil sad. 2: Ef wi no get fi du wa wi did waahn fi du fi Jeuova. (Pr. 13:12) Wi lov Jeuova an wi api fi aal a wa im du fi wi. So wi aalwiez a chrai fi tingk bout tingz we wi kyan du fi mek im si se wi tangk im. Bot som a di taim di ting dem we wi waahn fi du, wi no get fi du dem an dat kyan mek wi fiil sad. (Pr. 17:22) Dis a wa wan paiyanier sista we niem Holly se: “Mi did waahn fi go a di School for Kingdom Evangelizers, go a wan neda konchri go priich, ar fi elp out wid di kanschrokshan wok we a gwaan a Ramapo. Bot tingz chienj op iina mi laif an mi kudn get fi du non a dem sitn de, an kaaz a dat mi did fiil sad bad.” Nof a Jeuova piipl dem fiil da wie de kaa dem no get fi du wa dem wuda waahn fi du fi im.

13. Wa wi kyan du ef wi kyaahn get fi du wa wi waahn fi du fi Jeuova nou?

¹³ Wa kyan elp wi fi bi api agen? Memba se Jeuova naa aks wi fi du wa wi kyaahn du, an a no di ting dem we wi du fi im mek wi wot nof tu im. Jeuova waahn wi fi chos iina im wid aal a wi aat, an nuo wa wi kyan du fram wa wi kyaahn du. (Mai. 6:8; 1 Kor. 4:2) Wa Jeuova riili kier bout a wen wi lisn tu im an du wa im se, muor dan di sitn dem we wi du fi im. So wi no fi ekspek se wi fi du muor dan wa wi kyan du.c So ef yu kyaahn du di sitn dem we yu wuda waahn fi du fi Jeuova, tingk bout di ting dem we yu kyan du rait ya nou. Yu kuda elp fi chrien di yong piipl dem iina yu kanggrigieshan, ar elp fi bil op di breda an sista dem we op iina iej? Ar miebi yu kuda go luk fi wan a di breda an sista dem, ar kaal dem pan di fuon, ar sen dem wan teks mesij fi bil dem op. Ef yu du di ting dem we yu kyan du, Jeuova a-go api an yu a-go api tu. An memba se suun suun wi a-go get wol iip a chaans fi du wol iip a tingz fi Jeuova iina di nyuu worl, aal tingz we wi neehn nuo wi kuda du. Holly we wi taak bout aredi se: “Wen mi fiil laik mi waahn gi op, mi tap an memba se mi a-go av fi eva fi du aal a wa mi waahn fi du fi Jeuova.”

14. Wa a sitn els we kyan mek wi fiil sad?

¹⁴ Sitn we kyan mek yu fiil sad. 3: Tingz we wi tingk wuda mek wi api. Wen wi luk pan di intanet, wi mait-a si piipl we luk laik dem api kaa dem luk laik dem aalwiez a enjai demself. Wi mait-a staat fi biliiv se ef wi aalwiez du di ting dem we wi laik, bai di sitn dem we wi waahn, an chravl go a difrant difrant plies, a dat a-go mek wi api. An notn no rang wid dem sitn de ino, kaa Jeuova mek wi iina wan wie fi enjai di nais sitn dem we im mek fi wi. Bot nof piipl we chrai fi du evriting we dem waahn fi du get fi si se dem sitn de no riili mek dem api. Wan paiyanier sista we niem Eva se: “Wen aal yu kyan tingk bout a fi enjai yuself, yu naa go eva satisfai wid notn an yu a-go jos fiil sad.”

15. Wa wi kyan lorn fram King Salaman?

¹⁵ King Salaman did chrai difrant difrant tingz fi si ef dem ting de kuda mek im api. Laik im chrai difrant difrant kain-a fuud, lisn nais myuuzik, an bai wol iip a dier tingz. Bot non a dem sitn de neehn mek im api. (Iik. 1:8; 2:1-11) Som piipl fiil se ef dem av wol iip a moni an kyan du wa dem waahn fi du, dat a-go mek dem api, bot notn no go so. Dem sitn de kyaahn mek wi riili api.

16. Wa mek wi a-go api wen wi du tingz fi ada piipl? (Luk pan di picha dem tu.)

¹⁶ Wa kyan elp wi fi bi api agen? Jiizas tiich wi se “ef yu gi sumadi sopm, it mek yu muo api dan ef sumadi gi yu sopm.” (Aks 20:35) Wan elda we niem Alekos se: “Mi chrai fi du likl likl tingz fi elp ada piipl. Wen mi du dat, mi no jos tingk bout wa mi waahn, an dat mek mi api.” Wa yu kyan du fi elp ada piipl? Ef yu si se sumadi luk laik dem sad, yu kyan taak tu dem fi mek dem fiil beta. Yu mait-a kyaahn get rid a dem prablem dem, bot yu kyan tek di taim an lisn tu dem an chrai fi andastan wa dem a go chuu. An dat mait-a mek dem fiil beta. Yu kuda tel dem tu se dem fi tel Jeuova ou dem fiil kaa Jeuova kier bout dem. (Sa. 55:22; 68:19) An elp im fi memba se Jeuova naa go lef im pan im uon. (Sa. 37:28; Aiz. 59:1) An yu kuda du som likl tingz fi im laik yu kuda kuk som fuud fi im, ar unu kuda jos sidong an uol a riizn. Yu kyan invait im fi kom a sorvis wid yu an dat wi mek im fiil beta. Mek Jeuova yuuz yu fi elp ada piipl. Wen wi no jos a tingk bout wiself wan an wi tek di taim fi elp ada piipl, dat a-go mek wi riili api.​—Pr. 11:25.

17. Ef wi waahn fi bi riili api, wa wi fi du? (Saam 43:4)

¹⁷ Wi kyan bi riili api ef wi gwaan kip kluos tu wi Faada we de iina evn. Di Baibl mek wi nuo se Jeuova a di Wan we mek wi “api bad.” (Riid Saam 43:4.) So aal wen wi a go chuu wi prablem dem, wi no afi wori wori op wiself an fiil fried. Aalwiez memba se ef Jeuova a wi bes fren, im a-go elp wi fi bi api fi eva.​—Sa. 144:15.