Elp Unu Wan Aneda Fi ‘Gruo Chrang An Fi Biliiv Iina Gad Muor An Muor’

Aal a wi lov fi spen taim wid wi breda an sista dem, no chuu? Bot ef wi a-go riili push wi breda an sista dem fi go aan, wi afi du muor dan jos spen taim wid dem. An wi nuo dat kaa di Baibl mek wi nuo se wi fi elp wi wan aneda fi ‘gruo chrang an biliiv iina Gad muor an muor.’ (Ruo. 1:11, 12) So wa wi kyan du fi mek shuor se wi riili a du dis?

Elp wi wan aneda fi gruo chrang wid di sitn dem we wi se. Laik wen wi a gi wi ansa dem a di miitn dem, wi kyan taak bout Jeuova an im piipl dem an wa wi lorn fram di Baibl, insted-a a chat tu moch bout wiself ar ou wi fiil bout tingz. An wen wi a taak wid wi breda an sista dem, wi kyan taak bout tingz we wi nuo a-go bil dem op.

Elp wi wan aneda fi gruo chrang bai di sitn dem we wi du. Laik di breda an sista dem mait-a si se tingz iina yu laif set a wie rait ya nou, bot yu stil a yuuz muos a yu taim fi du muor fi Jeuova. An yu si wen dem si yu a du dis, dat kyan riili push dem fi gwaan tan op chrang. Ar dem mait-a si se yu aalwiez de a di miitn dem iina di wiik, aal wen yu taiyad kaa yu did av wan rof die a wok, ar se yu di de aalduo yu sik bad.

Yu a elp yu breda an sista dem fi gruo chrang bai di sitn dem we yu se an a du? An yu a tek di taim fi si wa dem a du fi elp yu tu?