Náṉkammari̱

Isak Jirarnum wéamu

26 Kame Aprajám pujái̱ tsuka amia núnis ataksha nú nuṉkanam tsuka ajasmiayi. Tuma asamtai Jirar péprunam Awimirík Jiristíu aentsu úunt akupniuri̱ pujumia nui̱ Isakka pujustaj tusa wémiayi. 2 Tura nui̱ Jiristía nuṉkanam Uunt Yus Isakan wantintiuk chicharuk “Ejiptunam weep antsu tui̱ pujustatam nuna títiatjame. 3 Yamaikia ju̱i̱ṉ pujusta. Wisha ámiji̱a̱i̱ pujustatjai túran amincha ame shuarumnia̱sha métek shiir awajsattajrume. Tura atumíin shiir awajeakun jú̱ nuṉkan takamtsuk amastatjarme. Nuna túrakun atumí aparí̱n Aprajáman anajmatramiaj nuna umiktatjai. 4 26:​4-5 Warí winia takartin Aprajámka winia chichampruncha akupkámurnasha jintíamurnasha kame ashí Wi tímiajna núnaka umirtiniuyayi. Tuma asamtai nayaimpiniam yaa írunna imianú untsurí ame shuarumnia̱ka awajsattajai. Túran jú̱ nuṉkan takamtsuk súsartatjai. Túran ame shuarumin shiir awajsan nuyá̱ ashí nuṉkanmaya̱ aentsnasha nútiksanak shiir awajsartatjai” tímiayi Uunt Yus.

6 Kame Isakka Jirar péprunam pujusmiayi. 7 Tura nú peprunmaya̱ aents Isakan aniniak “¿Riwikia nuwemkait?” tiármiayi. Tutai Isak Riwikia tí shiirmach asamtai “nua̱ruiti” tákuinkia jú̱ nuṉkanmaya̱ aents mantuawara̱i̱ṉ tu enentáimias “Riwikiaka umaruiti” tímiayi.

8 Tura Isak nú peprunam núkap tsawant pujumiayi. Tura chíkich tsawantin akupin Awimirík je̱á̱ áaṉkamuri̱n íimiaj tukamá Isak nuwe̱n Riwikian miniakak wasurun wainkiamiayi. 9 Nuyá̱ Awimirík Isakan untsuk itiá chicharuk “Riwikia nekas nua̱rmete. ¿Urukamtai nua̱rmesha ‘Umaruiti’ tímiam?” tutai chichaak “Ju̱yá̱ aents ‘Winia nua̱ruiti’ tákuiṉkia mantuawara̱i̱ṉ tusan ‘umaruiti’ timiajai” tímiayi. 10 Takui̱ Awimirík chicharuk “¿Urukamtia ántramsha tímiam? Ame tusakmin ju̱yá̱ aents ame nua̱rminkia nuatrutmamai ajaka̱a̱rai. Túramtai ame nua̱rmi itiurchatri̱ji̱a̱i̱ iin Yusai̱ makukratia̱a̱me” tímiayi.

11 Nuya̱ṉka Awimirík ashí ni shuari̱n irur chicharainiak “Náṉkamas aents Isakan tura ni nua̱ri̱nkisha yajauch awajuka nekas mantamnattawai” tímiayi.

12 Kame nú nuṉkanam pujus Isaksha arakmamiayi. Tura Uunt Yus shiir yaya̱mu asa júuktin jeamtai ni araamu sian patasman juwak tí nukap taramkamiayi. 13 26:​13-14 Túruna murikrí̱sha waakari̱sha tura iniatairi̱sha ti untsurí ajasármiayi. Núnisaṉ kuítniasha ikiauṉki̱ wéak tí kuitrintin ajas naṉkamaku ajasmiayi. Nuna ashí takusmatai Jiristíu aents Isakan suir enentáimtiarmiayi. 15 Kame Isaka aparí̱ Aprajám yaunchu pujumia nú tsawantin Aprajáma takarniúri̱ táurar yumirmatnaka najanawarmiayi. Tura Isakan suir enentáimtuiniak nú yumirmatnaka Jiristíu aents nuṉkaja̱i̱ ashí yuturarmiayi. 16 Nuyá̱ Awimirík Isakan chicharuk “Yamaikia ju̱ya̱ṉka jiinkim wetá. Warí ámeka iiji̱a̱i̱ naṉkaamas tí kuitrintin ajasume” tímiayi.

17 Nu tutai Isakka nuyá̱ jiinkí̱ Jirara pakarí̱i̱n pujustaj tusa Jirar ashintsanam jeá nuap je̱a̱ je̱a̱mak pujusmiayi. 18 Aprajám nui̱ yaunchu pujus yumirmatan taurmia nuna Jiristíu aentssha Aprajám jakamtai ukunam nú yumirmatan yutuawarmiayi. Tura Isak nú yumirmatan ataksha táurar aparí̱ anaikiamunak nisha anairamiayi. 19 Tura chíkich tsawant Isaka takarniúri̱ wa̱a̱n tau matsamsar entsa aan wáinkiarmiayi. 20 Tura Jirara pakarí̱n murikiu wáinin pujuarmia nu, yumirmatka íiniuiti tusar Isakan murikrí̱n wáinniuja̱i̱ yumirmatan suritniaikiar mánaitkiarmiayi. Tuma asamtai Isakka suritniaikiamu tusa nú yumirmata náari̱nkia Esek anaikiamiayi. 21 Tura ukunam Isaka takarniúri̱sha chíkich yumirmatan táurarmiayi. Núnisaṉ nú yumirmatnasha mánaitkiarmiayi tuma asamtai Isak nú yumirmatan Setna anaikiamiayi.

22 Tura tíitram núnaka ikiukí̱ chíkich yumirmatan táurmiayi. Tura nú yumirmatnaka mánaitkiacharmiayi. Kame yamaikia jú̱ nuṉkanam takakmasar péṉker pujusárat tusa Uunt Yus aṉkant apujtamsachjik tu enentáimias Isak nú yumirmata náari̱n Rijupút anaikiamiayi.

23 Nuya̱ṉka Pirshiwianam Isakka waketkimiayi. 24 Nui̱ jeamtai ataksha Uunt Yus nú kashi wantintiuk chicharuk

25 Tura Isak kayan irumar Yus áestutai̱n najanamiayi. Tura Uunt Yusa náari̱n shiir awajsámiayi. Nuyá̱ jutai̱ je̱a̱ncha je̱a̱m nui̱ pujusmiayi. Nuya̱ṉka Isaka takarniúri̱ chíkich wa̱a̱n táurar yumirmatan najanawarmiayi.

Isak Awimiríkji̱a̱i̱ chícham najanamu

26 Tura chíkich tsawant Awimirík Jirar péprunmaya̱ jiinkí̱ Isak pujamunam tarimiayi. Tura Awimirík Jirarnumia̱ winiakui ni amikri̱ Ausat tura suntara uuntri̱ Jikiur nemarkarmiayi. 27 Táarmatai Isak chicharainiak “Átum winia nakitrakrum atumí nuṉke̱ya̱ ji̱i̱ki̱ akuptúkiatrumsha ¿urukamtia íirsatai tusarmesha tarutniuram?” tímiayi. 28 Nu tutai aimiainiak “Yus ámiji̱a̱i̱ pujana nu nékaji. Tuma asar ámiji̱a̱i̱ péṉker áujmattsar chícham najanatai tusar taji. Tura ámiji̱a̱i̱ chícham najanatai tájinia nuka jú̱nis áminiaiti, 29 iikia áminkia yajauchikia awajsachmiaji. Amesha núnismek yajauch awajkartusaip. Warí iikia ámiji̱a̱i̱ṉkia tuke shiir awajnáiniuitji tura winiakmincha péṉker áujsar akupkámiaji. Tura yamaikia Uunt Yus amincha tuke shiir enentáimturmana nu nékaji” tiármiayi. 30 Nuna tuíniakui anturak Isak namperan najanamiayi. Tura irunar yurumáwarmiayi. 31 Tura kashin tsawa̱rar péṉker áujnaisar chichaman najanawarmiayi. Nuna túrawar Isaksha tura irarsha wajarar shiir áujmatsar ikiuiniak waketrarmiayi.

32 Kame nú tsawantini̱ṉ Isaka takarniúri̱ nuṉkan tau pujursar initian entsan wáinkiar Isakan ujaktai tusar tariarmiayi. 33 Tura Isak nú yumirmata náari̱n Shiwia tú anaikiamiayi. Nú yumirmata naari̱ “chícham najanamu” tawai. Tuma asamtai nú peprunka yamaiya̱ ju̱i̱sha Pirshiwia tuíniawai.

34 Kame Esauka kuaraintia uwí takaku Jutitji̱a̱i̱ṉkia nuatnaikiamiayi. Tura Jutitkia Jet aents Pirí nawantri̱yayi. Esauka Jutitji̱a̱i̱ tura Pasemátja̱i̱ apatkauyayi. Pasemátka Jet aents Iruna nawantri̱yayi. 35 Nú jimiará nuwa̱ armia nu Esaú aparí̱ Isaknasha tura nukurí̱ Riwikiancha ti itiurchat enentáimtikiarmiayi.