Náṉkammari̱

Jutá Tamarja̱i̱

38 Nu tsawantai̱ Jutá ni yachi̱ji̱a̱i̱ kanakí̱ Jiira je̱e̱n pujustaj tusa wémiayi. Jiirasha Aturam nuṉkanmaya̱uyayi. 2 Tura nui̱ pujus Kanaannumia̱ aents Suwáa nawantri̱n wainiak nuatkamiayi. 3 Tura nuatak nua̱rí̱ uchin takusmatai Ir anaikiamiayi. 4 Nuyá̱ ataksha ajapruk uchin takus Unan anaikiamiayi. 5 Tura ataksha takus Seera anaikiamiayi. Seera akiiniamia nui̱ṉkia Kisep nuṉkanam pujuarmiayi.

6 Ukunam Jutá ni uchirí̱ iwia̱i̱ri̱n nuwa̱ Tamar náartinji̱a̱i̱ nuatmamtikiamiayi. 7 Túrasha Jutá uchirí̱ iwia̱i̱ri̱ Irsha Yus íimmianum yajauchin tuke túrin asamtai Uunt Yus wárik ajakramiayi. 8 Jakamtai Jutá ni uchirí̱ Unanan chicharuk “Waje̱ akintkiata. Ame yátsum ni pampaṉkua áintsaṉ atí tusam niji̱a̱i̱ tsaniṉta” tímiayi.

9 Túrasha Unanka uchi akiiniakuisha yachí̱ jakáa náari̱n anaikiatniun nakitiak yatsuru pampaṉmári̱ atsutí tusa waje̱ja̱i̱ tsaníaksha ajaprumtiki̱a̱i̱j tusa nuṉká ajapmiayi. 10 Tura Unan nuna túrakui Uunt Yussha nin ti kajerkámiayi. Tura nunasha nútiksaṉ wárik ajakramiayi. 11 Jutaka Tamaran ni chíkich uchirí̱ Séeran nuatkatniun nékayat Tamaran nuatkaṉka ni yachi̱ jákarua núnisaṉ jaka̱i̱ tu enentáimias ni najati̱n chicharuk “Apáa je̱e̱n weme winia uchir Seera tsakamam nui̱ pujusta” tímiayi. Takui̱ Tamarka ni aparí̱ je̱e̱n pujustaj tusa wémiayi.

12 Tura núkap tsawant naṉkaamasmatai Suwáa nawantri̱ Jutá nuwe̱ jakamiayi. Nuya̱ṉka Jutá kúntuts pujamun iniaṉkas Tímnat nuṉkanam ni murikrí̱n ure̱n tsupirin pujuarmia nuna íistaj tusa wémiayi. Núnisaṉ Aturam péprunmaya̱ ni amikri̱ Jiirasha niji̱a̱i̱ wémiayi. 13 Nuyá̱ Tamar ni we̱a̱rí̱ Tímnatnum murikrí̱ ure̱n tsupirataj tusa weman nekáa 14 tura Seera uunt ajasuítiat niji̱a̱i̱ nuatmamtikiachma nekáa waje̱mar entsatái̱ pushin ái̱kmiayi. Tura aents nekarawara̱i̱ṉ tusa tarachji̱a̱i̱ nukumákmiayi. Tura Tímnat jintianam Enaim nuṉkanam wetainmaani̱ pujumiayi.

15 Tura Jutaka naṉkaamak yapi̱n nukuk pujan wainiak tsanirmatai núwa̱chuashit tu enentáimtusmiayi. 16 Nuya̱i̱k áujsataj tusa menantúnmiayi. Tura ni najati̱niak peṉké nekaachmiayi. Tuma asa chicharuk “Ámiji̱a̱i̱ kanartinian wakerajai” tutai nuwa̱sha chicharuk “¿Warí surustatam ámiji̱a̱i̱ kanarmataisha?” tímiayi. 17 Tutai Jutasha chichaak “Murik matsamtainmaya̱n chikichik chípiuchin jusan akuptúktajme” tutai “Péṉkeraiti túrasha warí ame takakam nu ikiuktia, túrutmena nu akuptúrkakmin awaṉtukmijiam” tímiayi. 18 Nuya̱ṉka Jutá chichaak “¿Warinia ikiurtukit tusamea wakeram?” tutai “Ame náaram ánair nuṉkutairi̱ji̱a̱i̱ tura ushukrutairmesha ikiuktia” tímiayi. Tura nuna susa Jutá niji̱a̱i̱ tsaniṉmiayi. Tuma asa níniunak ajaprukmiayi. 19 Tamarsha waketki̱ ni tarach nukumákmari̱n jusa waje̱ entsatái̱ pushiniak ataksha entsarmiayi.

20 Nuyá̱ ukunam Jutaka Aturamnumia̱ amikri̱ji̱a̱i̱ chípiun akuptúkmiayi nuwa̱n sukimiaj nuna awaṉturati tusa. Tura ni amikri̱ werisha wáinkiachmiayi. 21 Nuya̱ṉka nui̱ matsamármia nú aentsun anintrúsmiayi. “Enaimnumia̱ tsanirmatai nuwa̱ jintiá pujumia nusha ¿tui̱ pujá?” tímiayi. Tutai “Ju̱i̱ṉkia tsanirmatai núwa̱ka pujuchuiti” tú ai̱kiarmiayi.

22 Tuíniam nisha Jutá pujamunam waketkimiayi. Tura chicharuk “Nú nuwa̱ncha wáinkiachjai. Tura nui̱ pujuinia nú shuarsha ‘Ju̱i̱ṉkia tsanirmatai núwa̱ka atsuwiti’ turutiarmai” tímiayi. 23 Tutai Jutá chichaak “Kame ánkisha ikiurkímiaj núnaka jukiti. Warí ataksha werir e̱a̱krinkia wishikramprachartatjik. Iistá chípiuchin akuptúkmaj nusha nuwa̱ wáinkiachu asam súsachuitme. Nunasha paant nekaawarti” tímiayi.

24 Nuyá̱ menaintiú nantu naṉkaamasmatai Jutan ujainiak “Ame najatim Tamar chíkich áishmaṉja̱i̱ tsanirmaiti. Tura asa ajaprukai” tú ujak ikiuwarmiayi. Tura nuna antuk Jutaka kajek chichaak “A̱a̱ jí̱i̱krum ekemáktarum” tímiayi. 25 Tura Tamarsha a̱a̱ ekemáktai tusar ji̱i̱yam nisha ni we̱a̱rí̱n jú̱ chichaman akuptak “Ju̱na surusua nú aishmaṉnan ajamtiniaitjiai. Wats ¿jú̱ nuṉkutai̱sha tura ushukrutai̱sha yánakit?” tímiayi. 26 Nuya̱ṉka Jutá ni susamun wainiak nekaamiayi. Tura chichaak “Uchirja̱i̱ nuatmamtikiachu asan niji̱a̱i̱ naṉkaamas nekas yajauch túraitjiai” tímiayi. Tura atakka níji̱a̱i̱ṉkia kanarchamiayi.

27 Nuya̱ṉka Tamarsha uchi takustintri̱ jeamtai jímiampramiayi. 28 Kame uchi akiiniuk chikichík uchik ni uwejé̱n jí̱i̱miayi. Túrunamtai uchin takumtikin ni uwejé̱n jiu kapa̱a̱kuja̱i̱ jiṉkiá “Ju̱ka iwia̱i̱ri̱nti” tímiayi. 29 Tura nuya̱i̱k nu úchikia ni uwejé̱n awaiṉkimiayi. Túrasha íksaṉ chíkich eem akiiniamiayi. Tuma asamtai uchi takumtikin “¡Ausha eem akiiniachaik!” tusa Páres anaikiamiayi. 30 Nuyá̱ árusaṉ chíkich uchisha jiu kapa̱a̱kuja̱i̱ uwejnum jiṉkiamia nusha akiiniamiayi. Tura ni naari̱ Tsera anaikiamiayi.