Náṉkammari̱
Putipiár Jusen nin yaintri̱ awajsamu
39 Tura Ismaer shuar Jusen Ejiptunam júkiar Putipiáran súsarmiayi. Putipiárka Parauṉka yáintri̱yayi tura ni suntari̱ úuntri̱yayi. 2 Túrasha Juseka Yus pujurma asa Ejiptunam ni uuntri̱ je̱e̱n pujaksha shiir pujumiayi. 3 Ni takatrí̱sha tura ashí túrimia nui̱sha Uunt Yus yaya̱mu asa péṉker jintimia nuna ni úuntri̱sha nekamiayi. 4 Tura Putipiárka Jusé péṉker shuaraiti tu enentáimias ni yaintri̱ awajás ni je̱e̱ncha tura ashí wariri̱ iruniarmia nunasha waitrukat tusa uuntri̱ awajsámiayi. 5 Kame Putipiár ni je̱e̱ncha tura ashí niniu armia nuna Jusen íktusmia nú tsawantnumia̱ Jusé pujakui Uunt Yuska Putipiáran ti shiir ni je̱e̱ncha tura ajarí̱ncha núkap taramtikiamiayi. 6 Tura Jusesha ashí nui̱ irunmia nuna péṉker wainiu asamtai Putipiárka yuáttana núchiniak enentáimtimiayi.
Putipiára nuwé̱ Jusen tsanumprurma
Kame Juseka péṉker shuarauyayi tura shíirmachiyayi. 7 Tuma asamtai chíkich tsawantai̱ ni uuntri̱ nuwe̱ Jusen enentáimtus “Iiji̱a̱i̱ pujustai” tímiayi. 8 Túrasha Juseka nakitiak “Chuwa, amesha enentáimprakia, warí winia úuntur Putipiár niniu írunna nuna waitrukai tusa apujtusuiti. Wi wáitiam úuntruka ni warirí̱nkia páchiatsui. 9 Jú̱ je̱a̱nam wiji̱a̱i̱ naṉkamantu atsawai. Winia úuntrusha mash tsaṉkatrukuiti. Antsu ni nua̱rí̱ asakmin aya áminiak suritrawai. Warí ¿itiura wisha ámiji̱a̱i̱ imiá yajauchisha túramnaitiaj? Maa, nú yajauchin túran Yúsrun umirtsuk ti tunaan túrawaintjiai. Nusha ¿itiurak aint?” Tú timiayi.
10 Tura núwa̱ka tuke tsawant Juseja̱i̱ kanartinian tura tuke tsaníasar pujustinian ti seamaitiat Juseka peṉké pachichmiayi. 11 Kame chíkich tsawantai̱ aentssha atsuiniamunam Jusé ni takatrí̱n takastaj tusa Putipiára je̱e̱n waya̱miayi. 12 Túrunamtai nuwa̱sha Jusé awaṉkémpri̱n achirak “Iiji̱a̱i̱ pujustaiya” tímiayi. Túram nuna nakitiak jiinkí̱ tsékeak Juseka ni awaṉkémpri̱n nuwa̱nam ikiukmiayi. 13 Nuna ikiukmiatai Putipiára nuwe̱ Jusé awaṉkémpri̱n takus wajas 14 ni takarniúri̱n untsuk chicharainiak “Ju̱ íiskuana, winia áishur Ipríu aentsun iin wishikrampratniun itiartámniuitji. Nu wayá̱ achirkámtai kakantran untsumkájai. 15 Tura wi kakantran untsumkui jiinkí̱ tsékeak awaṉkémpri̱n ikiukní̱” tímiayi.
16 Tura aishri̱ támatai iniaktusmi̱j tusa Jusé awaṉkémpri̱n ikiusmiayi. 17 Nuyá̱ aishri̱ támatai ujaak “Ipríu aents itiaamam nu winia kanutairui̱ wayá̱ yajauch awajtústaj tusa tarutní̱. 18 Túrutakui wi kakantran untsumkui jiinkí̱ wéak ni awaṉkémpri̱n ikiukní̱” tímiayi.
Jusé sepunam eṉkeamu
19 Tura Jusé uuntri̱ Putipiár támatai nuwé̱ chicharuk “Ámin takartámin núnis túrutayi” tú ujakam ti kajekmiayi. 20 Tura akupin sepunam eṉken armia nui̱ ni uuntri̱ Jusen eṉkeamiayi. Túramu asa Juseka nui̱ṉ sepunmaṉ juákmiayi. 21 Túrasha Jusé sepunam pujanak Uunt Yus waitnenta asa sepú wáinniun Jusen shiir enentáimtustinian enentáimtikramiayi. 22 Túram sepú wainniusha sepunam pujuinian Jusé wainkiat tusa íktusmiayi. Túram Jusé ashí nui̱ túratniuya nuna túrimiayi. 23 Kame sepú wainkiat tusa anaitiukmauya nu íistinniaka peṉké atsumachmiayi. Warí Jusenka Uunt Yus pujurma asa ashí nui̱ túrimia nu péṉkerauyayi.