Náṉkammari̱

Jakup Ejiptunam wéamu

46 Nuyá̱ Israersha ni takakmari̱n ashí yarumak wémiayi. Tura Pirshiwia péprunam jeá ni aparí̱ Isaka Yusri̱n taṉkun maa áestuamiayi. 2 Tura kashi mesekranam Israeran Yus chicharuk “Jakupá, Jakupá” tutai “Ju̱i̱ pujajai” tímiayi. 3 Takui̱ Yus chicharuk “Wikia Yúsaitjiai, ame apa Yúsri̱ntjiai. Ejiptunam wétin ashamkaip. Nui̱sha uunt pepru mátsata awajsattajme. 4 Ame Ejiptunam wéakmincha Wikia tuke nemarsattajme. Tura ukunmasha amé shuarnaka Wiki Ejiptunmaya̱n ataksha awakeartatjai. Tura ámeka Juseja̱i̱ pujusam jakattame” tímiayi Yus.

5 Nuya̱ṉka Jakup Pirshiwianmaya̱ Ejiptunam wéenak Jakupa uchirí̱sha ni uchirí̱ncha nuyá̱ nuwe̱ncha tura aparí̱ Jakupnasha karetanam Parauṉ nin yaruaktinian akuptúrmia nuja̱i̱ eṉker júkiarmiayi. 6 Kame Jakupsha ashí ní shuaraim ni waakari̱ncha murikrí̱ncha tura ashí Kanaan nuṉkanam pujus takaruya nunasha yarumak 7 núnisaṉ ashí ni uchirí̱sha nawantri̱sha tura tiraṉki̱sha mash Ejiptu nuṉkanam jeawarmiayi.

8 Jakupja̱i̱ Ejiptunam wéarmia nu ju̱ áiniawai, Jakupa uchirí̱ iwia̱i̱ri̱ Ruwin 9 tura Ruwinkia uchirí̱sha Anuk, Parú, Esrun, tura Karmi.

10 Semiuna uchirí̱sha, Jimuir, Jamin, Ujat, Jakin, Sujar, tura Saur. Saura nukurí̱sha Kanaannumia̱ núwa̱uyayi. 11 Riwíi uchirí̱sha, Jirsun, Kujat, tura Mirari. 12 Jutá uchirí̱sha, Ir, Unan, Seera, Páres, tura Tsera. Túrasha Ir nuyá̱ Unancha Kanaannum jákarmiayi. Kame Páresa uchirí̱sha Esrun tura Aamurauyayi. 13 Isakára uchirí̱sha, Tuura, Púa, Jup tura Semprun. 14 Sapurúna uchirí̱sha, Serit, Irun, tura Jareer nu ármiayi. 15 Tura nu armia nuka Jakup Patanarámnum pujus ni nuwé̱ Riai̱ yajutmakmia nu ármiayi. Tura nawantri̱ Tiiniai̱m mash irurmaka ni shuarka nuwa̱ áishmaṉ iruram traintitráis ármiayi.

16 Tura Kaata uchirí̱ṉkia Sepiun, Akuí, Ispun, Suni, Eri, Aruti tura Ariri nu ármiayi. 17 Asera uchirí̱sha Imna, Isúa, Isuí, Piría tura nuna umái̱ Sera. Nuyá̱ Piría uchirí̱sha Jiwir tura Markir nu ármiayi. 18 Nú aentssha Sérpai̱ Jakup pampaṉmiayi. Kame Rapan Sérpana iniatairi̱ atí tusa ni nawantri̱n Rían susamiayi. Sérpanusha ashí iruram tiasisáis uchirí̱ ármiayi.

19 Jakupa nuwe̱ Rakira uchirí̱sha Jusé tura Piṉjiamín ármiayi. 20 Jusé Asenátai̱ yajutmakmia nuka ju̱i̱ti, Manasés tura Eprain. Niṉkia Ejiptunam akiiniawarmiayi. Tura Asenátka Putipiára nawantri̱yayi. Tura Putipiársha Un péprunmaya̱ yusri̱n takarniuyayi. 21 Piṉjiamínia uchirí̱sha ju̱ ármiayi, Pira, Pikir, Aspir, Jera, Naaman, Ijí, Rus, Mupim, Upim, tura Arta. 22 Nusha Jakupka Rakirja̱i̱ pampaṉmiayi. Ashí iruram katurse shuar ármiayi. 23 Nuyá̱ Tana uchirí̱ Usem. 24 Tura Neptarí uchirí̱sha ju̱ ármiayi, Jaseer, Kuni, Jiser tura Serim. 25 Nú shuarnaka Jakupa uchirí̱n Pira takusarmiayi. Pirancha ni nawantri̱ Rakira iniatairi̱ atí tusa aparí̱ Rapan susamiayi. Nú aentska ashí iruram siati ármiayi.

26 Ashí aents Jakupja̱i̱ Ejiptunam káunkarmia nuka, nú numpak, ni uchirí̱sha ántsaṉ nuwe̱sha nekapmatsuk sasaintisáis aents ármiayi. 27 Jakupa uchirí̱ Juseka Ejiptunam pujus jimiará uchin yajutmarmiayi. Nuja̱i̱ ashí iruram Jakup shuarka Ejiptunam jeawarmia nuka sataintia aents ármiayi.

28 Nuyá̱ Jakupka Jusé Kusen nuṉkanam iṉkiuṉtaiti tusa Jutan émtik akupkámiayi. 29 Kusennum táarmatai Jusé chichaak “Kareta kawainium nenakrum iwiarturatarum winia aparun iṉkiuutaj” tímiayi. Tura jearí ni aparí̱n wainiak miniakak warak tí utmiayi. 30 Nuya̱ṉka Jakup ni uchirí̱n Jusen chicharuk “Yamaikia uchiru, imia wiki iwiaaku pujamin wainkia asan jáaknasha warasan jakamniaitjiai” tímiayi.

31 Nuya̱ṉka Jusé ni yachi̱ncha nuyá̱ ni aparí̱ shuari̱ncha chicharainiak “Parauṉkan werin átum kaunkamun ujaktájai. ‘Kanaannumia̱ winia yatsursha aparsha tura ashí ni shuari̱sha wiji̱a̱i̱ pujustai tusar káunkarai. 32 Núnisaṉ murikrí̱ncha ashí waakari̱ncha takakmari̱ncha itiarai. Warí murik íistinian tura waaka tsakatmaktinian pujurchak ainia’ titiajai. 33 Nuyá̱ atumín Parauṉ untsurmak ‘Wariji̱a̱i̱ takakmawitrum’ 34 túramkurmincha aya̱krum ‘Iikia yaunchu ii uuntri̱ murikiu wáinin ásarmatai iisha núnisrik murikiuk wáinniuitji’ titiarum. Nuní̱ tákuram ju̱i̱ Kusennum pujustatrume. Warí Ejiptu aentska murikiu wáinniuṉka muí̱jin áiniawai” tiármiayi Jusé.