Náṉkammari̱
47 Nuyá̱ Jusé Parauṉkan chichaman ujaktajtsa werimiayi. Tura ujaak “Winia aparsha ashí winia yatsurja̱i̱ Kanaannumia̱ káunkarai tura Kusennum pujuiniawai. Tura murikri̱ntiuk waakartiuk ashí takarmari̱n yarumakar káunkarai” tímiayi. 2 Tura ni yachi̱ séṉkuchiniak Parauṉkan nékamtikiattsa aya̱rmiayi. 3 Jeawarmatai Parauṉsha Jusé yachi̱n chicharainiak “Warí atumsha takakmawitrum” tiármiayi. Tutai aimiainiak “Uuntá, iikia ii úuntri̱ji̱a̱i̱ métek murik wáinniuitji. 4 Ii nuṉke̱n Kanaannum ti tsukamnamtai ii murikrí̱ yurumkari̱sha atsá asamtai iisha jú̱ nuṉkanam pujustai tusar taji. Tuma asamtai uunta, waitneasam Kusen nuṉkanam iisha pujusártai tsaṉkamkata” tiármiayi. 5 Tuíniakui Parauṉ Jusen chicharuk “Apasha tura yatsumsha ámin tarutmacharaik. 6 Warí Ejiptunam akupea asam apasha tura yatsumsha nuṉka tui̱ péṉkerait nui̱ apujsarta. Kame Kusennum pujusárti. Tura waakan péṉker wáinin áiniakuiṉkia winia waakarnasha waitrukarat tusam apujsarta” tímiayi.
7 Tura Jusé ni aparí̱ Jakupnasha Parauṉkai̱ jukimiayi. Tura Jakupsha Parauṉkan amikmá péṉkernum yumiṉkramiayi. 8 Kame Jakup jeamtai Parauṉ chicharuk “¿Urutmá uwiya takakam?” 9 tutai Jakup aya̱k “Wékataik siantu traintia uwí ejenaitjiai. Wisha ishichik wekasayatan ti itiurchatan wáinkiaruitjiai. Tura winia úuntur wékataik núkap uwí pujusármia núnikchajai” tímiayi.
10 Nuna tinia Jakup Parauṉkan áujas umik ataksha péṉkernum yumiṉkiar ikiukmiayi. 11 Tura Parauṉ timia tímiatrusaṉ Juseka Ejiptunam ti péṉker nuṉka Ramisésnum aparí̱n tura yachi̱ncha apujsarmiayi. 12 Tura Jusesha aparí̱n nuyá̱ yachi̱ncha ashí uchirí̱miak ni yurumátniuri̱ncha súsarmiayi.
Jusé yurumka kuítri̱ji̱a̱i̱ túramu
13 Kame ashí nuṉkanam yurumak atsuarmiayi tura nú nukap tsukamnaki̱ wémiayi. Kanaannumsha tura Ejiptunmasha untsurí aents tsukaja̱i̱ tí waitiarmiayi. 14 Tura Juseka yurumkan súmainiakui súrak Kanaannumia̱ tura Ejiptunmaya̱ kuítniasha ashí irurmiayi. Nuna tura Parauṉka je̱e̱n nú kuitniaka itiá ikiusmiayi. 15 Kame Kanaannumia̱ tura Ejiptunmaya̱ aentssha kuítri̱n mash amukar Jusen weriar chicharainiak “Waitneasam yurumak amasta. Warí urukamtai ame pujamnisha ii kuitri̱ amukrisha tsukaisha kajiṉtataji” tiármiayi. 16 Tutai Jusé aya̱k “Kuit peṉké takakchakrumka atumí taṉkuri̱ itiatárum. Yurumkanka nuja̱i̱ yapaji̱áttajai” tímiayi.
17 Nuyá̱ Ejiptunmaya̱ aentska kawairi̱ncha murikrí̱ncha waakari̱ncha umpururi̱ncha Jusen itiar wéarmiayi. Nuja̱i̱ yapaji̱á yurumsaraṉ uwí ejeniarmiayi. 18 Tura chíkich uwitin mash amukar ataksha Jusen weriar chicharainiak “Uuntá, anaṉkachminiaitji, ii kuítri̱sha peṉké amukji, ii taṉkuri̱sha ámin mash amaschajik, yamaikia peṉké takaktsuji. Tuma asamtai warí urukatjik. Aya ii nuṉke̱ja̱i̱ṉ jú̱nisrik juákarji. 19 Warí urukamtaik ántrasha tsukaisha kajiṉtaji. Sumakratkata. Túram ii nuṉke̱sha sumakarta. Nuja̱i̱ yurumátniusha tura arakmatniusha amasta. Warí tú turukratawakmincha ame amasákmin iik ii nuṉke̱n takarsashtatjik. Túrakur Parauṉka iniatairi̱ ajastai. Túram ii nuṉke̱sha arakmashtaiṉkia áchattawai” tiármiayi. 20 Warí ti tsuka ajasmatai ashí Ejiptunmaya̱ aents nuṉke̱n súruiniakui Jusé ashí Ejiptu nuṉkan Parauṉkan sumarkamiayi. 21 Túrunawar ashí Ejiptunam Parauṉka iniatairi̱ juákarmiayi. 22 Antsu ní yusri̱niunak takarniu nuṉke̱nka Juseka sumakchamiayi. Nuka Parauṉ yurumak suíniam yurumáinia ásar nuṉke̱nka surukcharmiayi.
23 Tura Jusé nu aentsun irur chicharainiak “Yamaikia atumsha tura atumí nuṉke̱sha Parauṉnaitrume. Parauṉkan wi sumarkaruitjiai. Pai, atumí nuṉke̱ni̱ṉ arakmatarum tusan arakan amaajrume. 24 Tura káakmatai júakrum séṉkunmaya̱ chikichík nakakrum Parauṉ sútatrume tura chíkich kuátruka atumí shuari̱ji̱a̱i̱ yúakrum arakmattarme” tímiayi. 25 Tutai nisha aimiainiak “Maa, ámeka iinkia tí peṉker awajkartiniaitme iisiá, tsukanmaya̱ uwemtikkiarturume. Iisha yamaikia Parauṉkan iniatairi̱ ártái” tiármiayi. 26 Kame Jusé chichaak “Ashí Ejiptunmaya̱ aents yurumkan séṉkunmaya̱n chikichkiniak akanák Parauṉkan suartí” tusa chichaman najanamiayi. Nú chichamsha yamaisha tuke awai. Antsu najanamu yúsnan takarin armia nuka Parauṉkan ni nuṉke̱n súsacharu ásar yurumak akankámunka súcharmiayi.
Jakup Jusen seamu
27 Tura Israer shuarka Ejiptu nuṉkanam Kusennum matsamsarmiayi. Tura nui̱ matsamsar ti untsurí pampaṉkarmiayi. 28 Tura Jakupka tiasisiáti uwí Ejiptunam pujus siantu kuaraintisiáti uwí ejemiayi. 29 Nuyá̱ chíkich tsawantai̱ Jakup jákatniuri̱ jeamtai Jusen chichaman akuptuk támatai chichareak “Winia shiir enentáimturkum wáitnenmai íirkumka makurui̱ wakenmaani̱ uwejém ikiusam seatmena nuna nekas umirkatjame turuttia. Kame ju̱na seajme waitneasam peṉké nekas Ejiptunmaṉka iwiartusaip. 30 Antsu wi jáakuisha Ejiptunmaya̱ṉka jurukím wí shuar iwiarsamunmaṉ iwiartusta” tutai “Támena núnisnak túrattajme” tú ái̱kmiayi Jusé. 31 Nuyá̱ ni aparí̱ ataksha chicharuk “Túrasha nekas tájame turuttia” tutai Jusesha “ti nekasan tájame” takui̱ nuya̱ṉka Jakup ni muukmasar tepetainmaani̱ piniakum tepesmiayi.