Náṉkammari̱
50 Túrunamtai Jusé utki̱ ni aparí̱ aya̱shi̱n páket miniakak yapiniam mukunámiayi. 2 Nuyá̱ ni takarniúri̱ tsuákratin armia nuna untsukarmiayi. Tura táarmatai chicharainiak “Winia aparu aya̱shi̱ iwiararum penuartarum” tutai tsuákratniusha Israera aya̱shi̱n iwiarar penuarmiayi. 3 Kame tuke túrin ásar jaká aya̱shi̱ iwiarainiak kuaraintia tsawant pujursarmiayi. Nuna túrawar Ejiptunmaya̱sha Israer jakamtai sataintia tsawant kúntuts pujusármiayi. 4 Ni kúntuts pujamun iniaṉkas Jusesha Parauṉka je̱e̱n pujuarmia nuna irur chicharainiak “Átum winia waitnentrakrumka wait aneasrum Parauṉ jú̱nisrum ujatruktarum. 5 Winia apar játsuk chichartak ‘Iisiá, wikia jasattuk ajasjai tura jakamtaisha Kanaan nuṉkanam wi wa̱a̱ táurmanumaṉ iwiartustarum tájamna nu nekas umirtukta’ túrutkui ‘Ayu, nekas umirkattajme’ timiajai. Tuma asan seajai, winia aparun iwiarsa ikiurmaun tátaj waitneas tsaṉkatrukti túramui titiarum.” Tú akatmampramiayi.
6 Tura nu tutai Parauṉ chichaak “Nui̱ṉkia ame apa turammia tímiatrusmek iwiarsa ikiuuta” tímiayi. 7 Tura nú tutai Jusesha ni aparí̱n iwiaras ikiutaj tusa wéakui ashí Parauṉka takarniúri̱sha tura ni je̱e̱n uunt anaikiamu armia nusha nuyá̱ Ejiptu nuṉkanam péṉkeri̱ armia nusha nemariarmiayi. 8 Núnisaṉ Jakupa shuari̱sha tura Jusé shuari̱sha tura ni yachi̱sha ashí Jusen atampriarmiayi. Antsu Kusen nuṉkanmaṉka aya úchiniak tura taṉku armia nunak ikiukiarmiayi. 9 Kame karetaja̱i̱ tura kawaiji̱a̱i̱ wéenasha ti untsurí Jusenka atampriarmiayi. 10 Tura Jurtan entsa amaini̱ trikiu irumtai̱ Atatnum jeawar Jusé aparí̱ jakamun enentáimtusar tí utainiak siati tsawant nui̱ irunturar pujursarmiayi.
11 Tura Kanaannumia̱ aentssha trikiu irumtai̱ Atatnum útainiamun wáinkiar chichainiak “Ejiptunmaya̱ aentska ni shuari̱ jakamtai̱ṉkia tí utkiarpapi ikiuma áiniawa” tiármiayi. Tuma asamtai nú nuṉkanka Apirmisarím anaikiarmiayi. Nuka Jurtan entsa amaini̱nti. 12 50:12-13 Jakupa uchirí̱ ni aparí̱n Kanaannum júkiarmiayi. Tura nui̱ Makpiranam ní shuari̱n iwiartai̱ wa̱a̱n Aprajám yaunchu Jet aentsun kuitji̱a̱i̱ sumarkamia nui̱ iwiarsarmiayi. Nuna túrawar ni aparí̱ timia nuna tímiatrusaṉ umirkarmiayi. Kame nú nuṉkasha tura wa̱a̱sha Mampri numi wajamunam etsa̱ jintiainmaani̱ awai. 14 Tura Jusé ni aparí̱n iwiaras ikiuak ni yachi̱ji̱a̱i̱ wéakui atampriarmia nuja̱i̱ ataksha Ejiptunam waketkiarmiayi.
Jusé jakamu
15 Jakup jaka asamtai Jusé yachi̱sha chichainiak “Ii yachi̱ yaunchu yajauch awajsachmakiaji. Tuma asakrin kajertamak iincha íksaṉ yapajtiámkashtajiash” tiármiayi. 16 Tura Jusen chichaman akuptuiniak “Ame apa játsuk chichaak ‘Jusé jú̱nis titiarum. 17 “Ame yátsum yajauch awajtámsarmia nu tura ni tunaarí̱sha waitneasam tsaṉkurarta turaamai” titiarum’ turammiaji. Tuma asamtai ame apá Yusri̱ takarniúri̱ asakrin tsaṉkurkarturta” tiármiayi. Tura chichaman iniaṉkatin nuní̱ ujainiam Jusesha útmiayi. 18 Tura ukunam Jusé yachi̱ jeariar tikishmarar nuṉká piniakumprar chicharainiak “Ame iniatai̱ram ártái tusar taarji” tiármiayi. 19 Tutai Jusé aya̱k “Ashamprukairap antsu wi ¿Yúskaitiaj? 20 Kame átumka yajauch awajtustin wakerutmiarme túrasha Yuska yamái wáinjinia ju̱na péṉker túrakur untsurí aents uwemtikratniun jú̱ nuṉkanam akuptúkuiti. 21 Tuma asamtai winia ashamprukairap. Atumniasha tura atumí uchirí̱ncha ayurattajrume” tímiayi. Kame Juseka aneṉkratmaja̱i̱ nuna ti yachi̱n shiir enentáimtikrarmiayi.
22 Tura Jusesha ni aparí̱ shuari̱ji̱a̱i̱ Ejiptunam matsamiarmiayi. Kame Juseka siantu tias uwí jeá asa 23 Jusesha uchirí̱ Eprainkia ni uchirí̱ tiraṉki̱ncha wainkiamiayi. Tura chíkich uchirí̱ Manasésa tiraṉki̱n Makira uchirí̱ armia nunasha wainiak ní shuarak armia nuna nekaamiayi.
24 Kame chíkich tsawant Jusé ni yachi̱n irur chicharainiak “Winia jákatniursha yamaikia ishichik ajasái. Túrasha Yus atumín yaintmaktatrume. Túrutma jú̱ nuṉkanmaya̱ṉka juramkiar ii úuntri̱n Aprajáman nuyá̱ Isakan tura Jakupnasha anajmatramia nú nuṉkanam apujtamsattarme” tímiayi. 25 Kame Jusé Israera uchirí̱ armia nuna ni yachi̱n tuke chicharki̱ wénak “Yus íimmianum támena nu umiktatji turuttiarum. Kame Yus nekas atumín yaintmaktatrume tura wi jakamtaisha átum wéakrumka winia ukunchruka ju̱ya̱ṉka júkitin atarum” tímiayi.
26 Tura Jusesha Ejiptu nuṉkanam siantu tias uwí takaku jakamiayi. Túrunamtai ni aya̱shi̱ncha péṉker iwiarar penuarar jáka eṉketai̱ najanamunam eṉkeawarmiayi.