2 Samuir

Saur jakamtai Tawit ujakma

1 Saur jakamia nuyá̱ Tawitcha Amarík aentsun nupetak taa Sekraknum jimiará tsawant pujusmiayi. 2 Tura menaintiú tsawantin Saur mesetan matsamtimia nuyá̱ aents chikichik kúntuts enentáimmiaja̱i̱ ni pushiri̱ já̱a̱naru tura muuknumsha nuṉká ajasu Tawitian tarí ti arantúkmaja̱i̱ tsuntsumá tikishmátramiayi. 3 Túmakui̱ Tawit tuyá̱ winiam tusa aniasmiayi. Nisha áimiuk “Israer mesetan pujuráiniamunmaya̱ pisaran winiajai” tímiayi. 4 Tutai Tawitcha “Warí itiurnáikiara waitneasam ujatkata” tímiayi. Tutai nisha ujak “Nui̱ pujuiniaka núkap mantamnawarai. Túrunamtai mesetnumia̱ pisarárai. Núnisaṉ Saur ni uchirí̱ Junatánja̱i̱ mantamnayi” tímiayi. 5 Chichaman etsermia nuna Tawit anintrak “¿Itiura nekaam Saur ni uchirí̱ Junatánja̱i̱ jákarusha?” tu iniasmiayi. 6 Tura natsasha chichaak “Kirpúa nainnium wakan íimiaj tukamán Saur ni naṉkiri̱ji̱a̱i̱ṉ ijium awajás wajan wainkiamjai. Túman ni nemasri̱sha kárurtiuk kawairi̱ntiuk amaiyástatuk peṉké shutuksarun wainkiamjai” tímiayi. 7 “Tura Saur ukunmaani̱ apajá̱s íimiaj tukamá winia waitiak untsurkamai. Tura untsurkui wisha werin ‘Ju̱i̱ pujajai’ tímiajai. 8 Nuyá̱ nisha jearim tuya̱itiam tusa anintsamai. Túrutkui ‘Amarík áentsuitjiai’ tímiajai. 9 Nuikia tarutim wárik mantutata tusa seatmiai. Peṉké jakiyatan ishí iwiaskun tájame turutmiai. 10 Warí iniant tepemia nuya̱ṉka péṉker ajaschamnia asamtai maamjai. Túran ni etseṉkrutairi̱n, kuntunam jiṉkiamátai̱ri̱ncha ámin amastaj tusan jurukmiajme uunta” tímiayi.

11 Tura Tawitcha núnisaṉ niji̱a̱i̱ pujuarmia nusha tí kuntuts enentáimiainiak pushiri̱n ja̱a̱rarmiayi. 12 Túrawar Saur ni uchirí̱ Junatánja̱i̱ jakamun núnisaṉ Israer shuaran Yus achikma armia nuna enentáimtuiniak wáitsarmiayi. Puya̱ja̱i̱ mantamnawaru ásarmatai tí kuntuts pujuinia ásar tsawant ki̱i̱miam útainiak ijiarmáwar pujusármiayi. 13 Tura nuyá̱ Tawitcha áishmaṉ natsa chichaman ujamia nuna aníak “¿Amesha tuya̱mpaitiam?” tutai “Wikia chíkich nuṉkanmaya̱ Amarík áentsuitjiai” tímiayi. 14 Tutai Tawitcha chicharuk “¿Ausha urukákmea akupin atí tusa Uunt Yus anaik asuitiji̱a̱i̱ muuknum ukatkámu mátniusha ashamchaitiam?” tímiayi. 15 Tura Tawit ni shuari̱ natsachi̱n untsuk itiá “Maatá” tutai nincha puya̱ja̱i̱ ijiú mámiayi. 16 Tawit chicharuk “Ame númpemka amiya̱k makurmarti. Warí ame chichakum Uunt Yus asuitiji̱a̱i̱ ukatkámun wi maajai tau asam ame wenumek makurmarmatai amesha jakattame” tímiayi.

Tawit Sáuran tura Junatánan e̱a̱rma

17 Tawit Sáuran uchirí̱ Junatánja̱i̱ enentáimtus kúntuts nekapeak ju̱ kúntuts enentáimkiur kantamtai̱n kantamámiayi. 18 Tura Tíshimiuk kantamprútai̱n Jutá shuari̱n unuiniararat tusa akupkámiayi. Ju̱ nekaata, Jaser papí aakma írunna nui̱ aarma awai.