2 Samuir

Tawit úunt akupin awajsamu

2 Nu naṉkaamasmatai Tawit Uunt Yusan anintrak “¿Jutá péprunam wétatjak?” tímiayi. Takui̱ Uunt Yus aya̱k “Ee wétiniaitme” tutai Tawit “¿Tui̱ wétataj?” tusa ataksha aniasmiayi. Tura Uunt Yus chicharuk “Eprunnum wetá” tímiayi. 2 Tutai Tawit wéakui ni jimiará nuwe̱ Ajinuám Apikiáirja̱i̱ nisha wéarmiayi. Ajinuámka Jisriir péprunmaya̱ tura Apikiáirka Nawara nuwe̱ wáje̱ya nuka Karmir péprunmaya̱uyi. 3 Núnisaṉ ni shuári̱ncha nua̱rtiuk uchirtiuk niji̱a̱i̱ írutka armia nunasha yaruak Eprunnum ejeniar nui̱ matsamawarmiayi. 4 Túrunamtai Jutanmaya̱ aents taar Tawitian asuitiji̱a̱i̱ muuknum ukatrar Jutá nuṉkanam úunt akupin atí tusa anaikiarmiayi.

Tawitian ujainiak Karaat nuṉkanam Japis péprunmaya̱ aents “Sáurnaka iwiarsaruiti” tu ujakármiayi. 5 Nuní̱ ujakam Tawit Karaat nuṉkanam Japis péprunmaya̱ aentsun akupeak “Atumí uuntri̱ Saur ti waitnentakrum iwiarsa asakrumin Uunt Yus shiir yaintmakarti. 6 Tura Yuska atumniaka nekas waitnentramar tsaṉkurtámprarti tajai. Núnisnak wisha atumniaka nekas péṉker enentáimtajrume, nu tura asakrumin. 7 Tura yamaikia Saur atumí uuntri̱ jaka asamtai átumka nekas kakaram ajastarum. Warí Jutá weanmaya̱ winia ni úunt akupniuri̱ atí tusa anaitiukcharaik” tawai titiá tusa akatar akupkámiayi. 8 Túrasha Saura suntari̱ uuntri̱ Nera uchirí̱ Ápnerka Saura uchirí̱ Ispushétan jukí̱ Majanáimnium wémiayi. 9 Tura Karaatnum Jisurnum Jisriirnum Eprainnium Piṉjiamínniumsha tura ashí Israernum úunt akupin awajsámiayi. 10 Kame Saura uchirí̱ Ispushét Israernum úunt akupin ajasmia nui̱ṉkia kuaraintia uwí takakuyayi tura jimiará uwí akupkámiayi. Túrasha Jutanmaya̱ shuari̱ Tawitian nemariarmiayi. 11 Kame Eprunnum pujus Jutanam úunt akupin ajasmia nui̱ṉkia Tawitkia siati uwí nuyá̱ sais nantu pujusmiayi.

Pajamtainiam nuamtak mánaikma

12 Kame Nera uchirí̱ Ápnerka tura Saura uchirí̱ Ispushéta takarniúri̱ armia nuka Majanáimniumia̱ Kapaunnum wéarmiayi. 13 Núnisaraṉ Sarwia uchirí̱ Juapsha tura Tawitia takarniúri̱ji̱a̱i̱ nisha wéarmiayi. Túrunawar Kapaunnum entsa pajamtai ayamach pujuinian wáinkiarmiayi. Tura chíkichkia entsa pajamtainiam á̱a̱wini̱ yantamén pujusármatai chíkichkia chíkich yantamén atuni̱ pujusármiayi. 14 Nuyá̱ Ápner Juapa chicharuk “Natsa wajakiar iisha íimprini̱ṉ mánaikiarti” tímiayi. Takui̱ Juap aya̱k “wajakiarti” tímiayi. 15 Nuya̱ṉka wajakiar mái̱ metek eem wajasármiayi. Tura Piṉjiamín shuara uchirí̱ Saura uchirí̱ Ispushétnasha tuse núnisaṉ Tawitia takarniúri̱sha tuse eem wajasármiayi. 16 Aṉkant aṉkant ni nemasri̱ji̱a̱i̱ muuknum achiniáikiar puya̱ja̱i̱ páenam enektunaikiar mái̱ métek ijiunai nuṉká iniantarmiayi. Túrunawaru asamtai nu nuṉka náari̱nkia Irkatjasurím anaikiarmiayi. Kame nuka Kapaunnumaiti. 17 Nu tsawantinkia mesetnum ti kakaram mánaikiarmiayi. Kame Ápnernaka tura Israera suntari̱ncha Tawitia takarniúri̱ nupetkarmiayi.

Juapa yachi̱ Ápner Asaeran maamu

18 Tura Sarwia uchirí̱ menaint armia nu Juap, Awishái tura Asaer nui̱ pujuarmiayi. Kame Asaerka japa kampunniunam wekaana timianú warik wekainiuyayi. 19 Tura Asaerka Ápneran pataatukmiayi. Kame uku wesa untsurnumaani̱ṉsha menanmaani̱ṉsha menaatsuk patatimiayi. 20 Nuya̱ṉka Ápner úkumur apajá̱s iis chicharuk “¿Amekaitiam Asaermeka?” tutai “Ee witjiai” tímiayi. 21 Takui̱ Ápner chicharuk “Untsurnumaani̱ṉsha nuíchuka menanmaani̱ṉsha menaṉtia. Túrunam natsa ainia nu achikiáram niniu ainia nu atantrarta” tímiayi. Támaitiat Asaerka patatamun iniaisatniunka peṉké nakitramiayi. 22 Nuyá̱ Ápner ataksha Asaeran chicharuk “Pataaturmena nuka iniaitiusta. ¿Urukamtaik ijiuncha nuṉkasha aji̱a̱ntatjam? ¿Tura ukunmasha itiurak ame yatsumin Juápnasha paṉkaincha íistaj?” tímiayi. 23 Tútaisha nakitra asamtai Ápnerka naṉkiri̱ náṉkatkamuri̱ji̱a̱i̱ Asaeran tantannum ijiú pana iniaṉkasmiayi. Túram nuṉká iniant jakamiayi. Kame Asaer iniant jaka tepamunmaani̱ aents naṉkaamarmia nuka, nuna íiniak sétiarmiayi.

Juap Ápneran pataatukma

24 Túrasha Juapka Awisháiji̱a̱i̱ Ápneran pataatukarmiayi. Tura Kapaun atsamunam wetai jintianmaani̱ Kíaj íṉkiuasmak Amá nainnium jeawarmanum etsa̱ akaikímiayi. 25 Nuya̱ṉka Piṉjiamín shuarka Ápnerai̱ iruntrar chikichik iruntramuk ajasár naint ámanum wajasármiayi. 26 Túrunawar Ápnerka kakantar untsumuk Juápan chicharuk “¿Puya̱ka túkek amukratkata? Maa amúamunmaṉka aya kúntuts jakamnia átatna nuka ¿ámeka peṉkek nékatsum? Atumí yachi̱ pataatuktinkia iniaisatarun títincha ¿urukamtai timiasha nákam?” timiai. 27 Takui̱ Juap chichaak “Maa Uunt Yuska nekas iwiaakui. Tura ame chichakchaakminkia aentska tsawa̱a̱mam ni yachi̱nkia apapékara̱a̱yi” tímiayi. 28 Nuya̱ṉka Juap kachun umpuarmatai aentska nui̱ṉ wajararmiayi. Túrunawarka atakka Israer shuarnaka peṉké apapékcharmiayi. Tura mánitniasha mánikcharmiayi. 29 Tura Ápnerka ní aentsri̱ji̱a̱i̱ takamtsuk kashi weká wekakua Jurtanka katitkiar Pitrunnaka ashí naṉkarar Majanáimnium jeawarmiayi. 30 Kame Juapka Ápner patatamunka ikiuak waketki̱ ni aentsri̱n ashí irurmiayi. Tura Tawitia takarniúri̱ṉkia tiasinuíwi aents nuyá̱ Asaersha táasarmiayi. 31 Antsu Tawitian takarniúri̱ṉkia Piṉjiamín shuarnak traisiantu sasaintia aentsun máwarmiayi. 32 Nuya̱ṉka Asaera aya̱shí̱nkia júkiar ni aparí̱ iwiarsamuya̱ nui̱ Piriṉnum iwiarsarmiayi. Tura Juapka ni áentsri̱ji̱a̱i̱ nú kashikia takamtsuk kashi wekasarmiayi túrunawar Eprunnum tsawa̱rarmiayi.