2 Samuir

Tawit chikicha nuwe̱ja̱i̱ tsanirmamu

11 Chíkich uwí juármanum suntar tuke mesetan najanin ásar Tawitkia Juápan nuyá̱ suntara úuntri̱n tura ashí Israernumia̱ suntaran akuprámiayi. Nu túram Amun aentsun nupetkarmiayi. Túrawar jíinkiara̱i̱ṉ tusar Rapá péprun áreṉkarmiayi. Túrasha Tawitkia Jerusaréṉnumaṉ juákmiayi. 2 Tura ki̱arai̱ Tawitcha ni kanutairi̱ya̱ jiinkí̱ akupin wekasá íimtai̱niam yakí̱ waka wekas asa̱a̱s íimiaj tukamá nuwa̱ tí shiirmach maak pujan wainkiamiayi. 3 Nuya̱ṉka Tawit ¿tuyá̱ nuwa̱kit? anintrústarum tusa akupkarmiayi. Túram ujainiak “Pitsawítiaiti Iriama nawantri̱, Jet aents Uríasa núwe̱nte” tiármiayi. 4 Tura Tawitcha ni takarniúri̱n nuwa̱ uturtitiarum tusa akupkarmiayi. Tura nuwa̱ itiarím Tawit tsaniṉ kanarmiayi. Tura mui̱jmiai̱ ajasmanumia̱ péṉker ajamam nui̱ṉ pujus núwa̱ka ni je̱e̱n waketkimiayi.

5 Tura nu nuwa̱sha ajapruk Tawit ujaktarum tusa akatmamar akuptúkmiayi. 6 Nui̱ṉkia Tawit Juápan chichaman akuptak “Jet aents Urías akuptúrkata” tutai Juap Uríasan akuptúkmiayi. 7 Tura Urías támatai aníak “¿Juapsha tura suntarsha mesetnumsha itiurnainiawa. Warí chichama aa?” tímiayi. 8 Nuyá̱ Tawit Uríasan chicharuk “Ame je̱e̱miin weme náwem nijiaram kanutá” tusa akupkámiayi. Tura Uríaska uunta je̱e̱nia̱ jíinkin wéakui akupin shiir enentáimtursati tusa ántar súsatniun akuptúrmiayi. 9 Túrasha Uríaska ni je̱e̱nkia wétsuk uunt pujutai̱ je̱a̱ wáitiri̱n ni úuntri̱niun wáinin pujuarmia nuja̱i̱ irunar kanarmiayi. 10 Túrunamtai Tawitian “Uríaska ni je̱e̱nkia wéchaiti” tú ujakáram Tawit Uríasan chicharuk “¿Urukamtai ame je̱e̱miinkia wéchamam. Ámeka arant pujaaka táchamkám?” tímiayi. 11 Tutai Uríassha aya̱k “Israernumia̱sha tura Jutanmaya̱ suntarsha nuyá̱ timiá Yusna Eṉketai̱sha tura kapitián Juapsha ántsaṉ áishmaṉ akuprarmamna nusha kampunniunam matsatáiniai̱sha ¿wisha urukamtaik winia je̱a̱rui̱ wenasha yurumuusha umuusha tura winia nua̱rja̱i̱ tsaniṉnasha kanuttaj?” tímiayi. 12 Takui̱ Tawit Uríasan chicharuk “Yamaisha ju̱i̱ṉ juaktá. Kashin akupkátjame” tutai Uríassha Jerusaréṉnum nu tsawantin tura kashincha juákmiayi. 13 Tura kashin Tawit Uríasan ayura áartaj tusa ipiaamiayi. Tura Uríassha nampek kíntiamuk ni je̱e̱nkia wétsuk ni úuntri̱niun wáinin pujuarmia nui̱ ni kanutairi̱n kanarmiayi.

Tawit yajauch enentái̱ takaku asa Uríasan mámtikiamu

14 Nuyá̱ kashin káshik Tawit Juápan papin áatar Uríasan atakas akupkámiayi. 15 Tura papiniumka jú̱nis áaruyayi. “Uríaska mesetnum wárik máwarminnium émtikiata. Tura átumka uku juaktarum nin máwarat” tu áarmiayi. 16 Nu papin wainiak Juap mesetnum Israer suntar Rapá péprun áreṉkar pujursar Amun aents ti kajen pujuarmia nuní̱ Uríasan akupkámiayi. 17 Nuya̱i̱k péprunmaya̱ jíinkiar Juapa suntari̱ji̱a̱i̱sha mánaikiarmiayi. Nui̱ Tawitia suntarí̱sha jákarmiayi, núnisaṉ Jet aents Uríasnasha máwarmiayi. 18 Mesetnum itiurnáiya nuna Tawit mash nekaat tusa Juap akatmamar akuptúkmiayi. 19 Tura chichaman akatar akupeak ju̱ní̱ ujakta tusa jintintiak “Meset chicham tímiatrusam úunt akupin ujakta. 20 Nisha kajertamak chichartamuk ‘¿Urukamtai péprunam timiá weantúkrumsha mesetcha juárkimiarum? Niṉkia pepru wenuke̱ya̱ yakiya̱ṉ mantamamniaka ¿nékachmakuram? 21 ¿Kame Jirupáara uchirí̱ Awimiríkian ya mamia? ¿Núwa̱chuk wenuknum wajasaṉ neketai̱ kayan akaṉkétak Tépesnum mamia nuka nékachmakuram? ¿Warí urukamtai pepru wenuke̱ncha timiá tíjiu̱chisha weantúkmarum?’ tákui̱sha ayakum ‘Uuntá, ame suntarumi uuntri̱ Urías Jet aents jakayi’ tu ujakta” tusa akupkámiayi. 22 Tura chícham akatrámusha wémiayi. Tura Tawit pujamunam jeá Juap timia núnaka tímiatrusaṉ ujakmiayi. 23 Nuyá̱ chichama etserin chichaak “Suntar iiji̱a̱i̱ mániktai tusa jatetmakakrin íi kakanteakur nupetkir pepru wáitiri̱ya̱ tímianai ejeji. 24 Tura nui̱ pepru wenuke̱ya̱ṉ tíshimkiuja̱i̱ naṉkin ekentan unuimiátka ainia nu, uunta, ame suntarumin eketkar máwarai. Nui̱ Jet aents Uríassha mantamnayi.” 25 Tura nuna takui̱ Tawitcha chichaman etserniun chicharuk “Juap ujakum ‘Warí mesetnumka jákarusha tura iwiaakusha ártiniaiti. Tuma asamtai Juap nuja̱i̱ ántar itiurchat enentáimpra̱i̱ṉ. Tura nekaska ju̱ke kakantsarmek pepru emeskatarum túramui’ titiá. Nuyá̱ amesha ikiaká̱rta” tímiayi.

26 Nuyá̱ Uríasa nuwe̱sha ni aishri̱ jakamun nekáa kúntuts pujusmiayi. 27 Tura ni kúntuts pujamuri̱ naṉkaamasai̱ Tawitcha ni pujamuri̱n nu nuwa̱ itiartitiarum tusa akupkarmiayi. Túrawarmatai Tawitcha nu nuwa̱n nuatkamiayi. Nuyá̱ nuwa̱sha uchin takusmiayi. Antsu Tawit túramia nuna Uunt Yuska peṉké yajauch íismiayi.