2 Samuir
Natan Tawitian chichareamu
12 Uunt Yuska níniun etserin Natanan akupin Tawit iyuta tusa akupkámiayi. Tura Natan Tawitian jearí chicharuk “Chíkich péprunam jimiará aishmaṉ armai, chíkichkia kuítrintin tura chíkichkia kuítri̱ncha. 2 Tura kuitri̱nniuka murikiun tura waakancha ti untsurí yarumkauyi. 3 Kuítrinchaka chikichik murik sumakar tsakatmarmauya nunak aya̱kuyayi. Nu murikchincha ni uchirí̱ji̱a̱i̱ irumar wainiak tsakatmararmiayi. Nuyá̱ yurumáiniaksha úmuiniaksha tura kánuiniaksha nui̱ṉ íkianeak ni nawantri̱ji̱a̱i̱ métek wáinmiayi. 4 Túman chíkich tsawantai̱ shuar kuítrinniun íistaj tusa tarimiayi. Túram nu kuítrinniusha níniunak maa ayurtsuk antsu kuítrincha murikchiri̱n chikichkiya̱ nuna mantuá iwiartur ni irari̱n ayuramiayi. ¿Waritia enentáimiam, péṉkerashit?” tímiayi Natan Tawitian.
5 Nuna antuk Tawit nu aishmaṉkan ti kajerak Natanan chicharuk “Yus íimmianum nuna tura asa nekas mantamnatniuiti. 6 Warí nisha kuítrinchan waitnentsuk murikchiri̱n mantuachukait. Tuma asa maamua nuna kuitri̱ kuatru patakam jean akikmaktiniaiti” tímiayi.
7 Nuna takui̱ Natan Tawitian chicharuk “Ámetme nu áishmaṉmeka. Israernumia̱ Uunt Yus ámin chichartamuk ‘Wiki Israer shuara úunt akupniúri̱ awajsámjai tura Sáurai̱ya̱sha uwemtikraitjiai. 8 Túran Saur ame úuntrumnia̱ nunasha tura ni nuwe̱ncha amasármajai. Núnisnak Israer shuarnum tura Jutá shuarnumsha akupkatniun amasan tátramsamtaisha nuna naṉkaamas amastiniujai. 9 ¿Urukamtai Uunt Yusa chichame̱ṉka timiá nakitrayatmesha Ni íimmianumsha peṉké yajauchisha túraitiam? Warí, Jet aents Urías puya̱ja̱i̱ maam ni nuwe̱ṉka nuatrukchamek. Kame Amun aentsu puya̱ri̱ji̱a̱i̱ mámtikiachumek. 10 Warí Wíniaka nakitruram Jet aents Uríasa nuwé̱ ataṉkím nuatruku asakmin amé shuarka tuke mánais pujú ártatui.’ 11 Ántsaṉ Uunt Yus chichartamuk ‘Ame shuarumji̱a̱i̱ṉ ti yajauch awajmamtiksattajme. Nuwemnia̱sha ata̱a̱ran Ame írutramurminiak súsartatjai. Túram ashí iimiainiamunam nisha tsanirmawartatui. 12 Ámeka ú̱mkam tsanirmaitme túrasha Wikia ashí Israer shuar iimiainiamunam tsawái̱ túrumtikiawartatjai’ túramui” tímiayi. 13 Nuna tinia umikmatai Tawit Natanan aya̱k “Uunt Yusruí̱ nekas tunaan túraitjiai.” Takui̱ Natan chicharuk “Uunt Yuska áminkia tsaṉkurtámprayi. Tuma asam ámeka jákashtatme. 14 Antsu nu tura asam Yusa nemasri̱ Uunt Yusan yajauch áujmatin awajsámuitme. Ame uchiram yamái akiintiurma nuka nekas jarutramkattawai” tusa ujakmiayi.
15 Nuna tinia Natan je̱e̱n waketkimtai Tawit Uríasa nuwe̱n uchin yajutmarmia nuna Uunt Yuska tsuárchamnia suṉkurmamtikiamiayi. 16 Nuikia Tawit uchirí̱ jakui Yusan áujtak siati tsawant ijiarmá nuṉká tepée wémiayi. 17 Tawitia takarniúri̱ uuntri̱ pujuarmia nu, nuṉká tepá wáinkiar nantaktia tamasha peṉké antichmiayi. Tura níji̱a̱i̱sha irunar yurumchamiayi. 18 Siati tsawantin uchisha jakamiayi. Túrunamtai Tawitia takarniúri̱sha ujaktinian ashamkarmiayi. “Warí uchi iwiaakuya nui̱ áujeamsha peṉké anturtamchamji. Itiurak uchi jakasha ujaktaji. Ii ujakmaka ti yajauchin túrashtimpiash” tú enentáimsarmiayi. 19 Tura Tawitkia ni takarniúri̱ nuamtak chichainian anturak “Úchikia jakayapi” tu enentáimpramiayi. Tuma asa anintrakui̱ “Ee, úchikia ti nekas jakayi” tu ujakármiayi.
20 Nui̱ṉkia Tawitcha nuṉká tepemia nuyá̱ nantaki̱ maai̱ chíkich pushin entsar tura kuṉkuinian ukatmamak Yusa Je̱e̱n wayá̱ Yusan shiir awajsámiayi. Nuyá̱ ni je̱e̱n waketki̱ yurumáttsa seamkui susam yurumámiayi. 21 Nuyá̱ ni takarniúri̱sha anintruiniak “Uuntá, ame uchiram iwiaakai̱sha ijiarmám aya útmiame tura yamaikia uchiram jakamtaiṉkia yurumtsumek. Ausha ¿urukamtai ániam?” tiármiayi. 22 Tutai Tawit áimiuk “Winia uchir iwiaakai̱ ijiarmán útmiaj nuka ya neka Uunt Yus waitnentrurmatai uchir péṉker ajatrúsainti tusan túmamjai. 23 Tura yamaikia urukamtaik uchir jaka ai̱sha ántrancha ijiarmáncha úttiaj. Kame wikia niṉkia iniantkin itiachminiaitjiai. Antsu íksanak wikia ni pujamunam jeattajai tura niṉkia wini̱ṉkia táchamniaiti” tímiayi.
Saramúṉ akiiniamu
24 Tawitcha ni uchirí̱ jakamtai ni nuwe̱n Pitsawítia atsaṉkar shiir enentáimtikrataj tusa werimiayi. Nui̱ ni nuwe̱ja̱i̱ tsaniṉ ajaprumtikiamiayi. Tura ataksha uchi áishmaṉchin takusmatai Saramúṉ anaikiamiayi. Kame nu uchinkia Uunt Yus ti anemiayi. 25 Tuma asa Natanai̱ni̱ nu uchin Yus anaiyak Jatitías* anaikiamiayi.
Tawit Rapan achikma
26 Juapka Amuna aentsri̱ Rapaja̱i̱ mánimiayi tura úunt akupin pujutai̱ pepru Rapan akinkiamiayi. 27 Nuya̱ṉka Juap akatmamar Tawitian chichaman akuptak chichaak “Rapaja̱i̱ mesetnum iṉkiuniajai túran entsa pajamtairi̱ya̱ nuna ata̱i̱jiai 28 tura yamaikia aents juákaru pujuinia nuna irur péprun matsamtuk utsantua nérentin ajasti núja̱i̱ṉchuka wi nérentin ajasan winia naarja̱i̱ anaikiaj” tawai titiarum tusa aentsun akuprámiayi. 29 Tawitkia ashí aentsun irur Rapanmaani̱ wémiayi tura mesetnum maania péprun nérentin ajasmiayi. 30 Nuna tura úunt akupniu tawaspari̱ kuriji̱a̱i̱ najanamu kijintri̱ṉkia chikichik tarentu jea tura shíirmach kaya ti kuit áiniana nuja̱i̱ tí péṉker iwiaramuya nuna úunt akupniu muuke̱ya̱n jurusmiayi. Túrawar Tawitian etseṉkrumtikiarmiayi. Tura péprunmaya̱ ata̱a̱rmancha tí nukap yaruakmiayi. 31 Nui̱ aents matsamin armia núnaka ji̱i̱rar numi tsupitiai̱ jiruja̱i̱ tura neré pakatai̱ jiruja̱i̱ núnisaṉ jachaja̱i̱sha takamtikiarmiayi. Túruiniak nuwe̱ jikiar iniartainmasha takamtiksarmiayi. Tura Amun aentsri̱ nuṉke̱n pepru irunmia nui̱sha núnisaraṉ ashí túramiayi. Nuna tura Tawitkia ni aentsri̱ji̱a̱i̱ Jerusaréṉnum waketkimiayi.