2 Samuir
Apsarún aparí̱n kajerkámu
15 Nu naṉkaamasu ai̱ Apsarúnka kárun tura kawain nuyá̱ seṉkuintia áishmaṉ niní̱i̱ eem wéartinian wainkiamiayi. 2 Apsarúnka ti kashik nantaki̱ jintia pepru wá̱i̱ti̱a̱i̱ri̱ni̱ wéamunam ayaam wajá wémiayi. Tura ashí aents itiurchat takakainiak chichaman iwiartumprattsa úunt akupin pujamunam wénan Apsarún untsuk chicharainiak “Amesha ¿tu péprunmayaitiam?” tu wéarmiayi. Tutai nisha chicharainiak “Ame takartámniuka Israer shuaraiti” tu wéarmiayi. 3 Nuya̱ṉka Apsarún chicharainiak “Íimsata ame chichammeka péṉkeraiti tura nékaskete túrasha úunt akupniui̱ ámin anturtamkatniuka takaktsume” tu wémiayi. 4 Nuya̱sha Apsarúnka chichaak “Yaki winia ju̱ nuṉkanam súmamtikin anaitiuka̱ tura itiurchat takakainiak núnisaraṉ wariṉkish takurnakainiak winí̱i̱ táarmatai̱ṉkia wikia nekasa nuja̱i̱ métek péṉker iwiartiaraintji̱a̱i̱” tu wémiayi. 5 Tura yaaksha tikishmátrataj tusa weantúkmaka uwejé̱n achik mukun wémiayi. 6 Tura Israera shuari̱ chichaman iwiartumprattsa úunt akupniui̱ kauniarmia núnaka Apsarúnka ashí túriarmiayi. Nuna túrak ashí Israer shuara enentái̱nkia yapajtiak anentáwarat tusa túrimiayi.
7 Kuatru uwí naṉkaamasu ai̱ Apsarún úunt akupniun chicharuk “Eprunnum wétin tsaṉkatrukta Uunt Yusan shiir awajsattajme tímiaj nuna umikian ikiutaj” tímiayi. 8 Warí ame takartámniuka Siria nuṉkanam Jesurnum pujus “Uunt Yus Jerusaréṉnum awaṉtukmiataiṉkia Uunt Yusan shiir awajsattajai” tímiayi. 9 Takui̱ úunt akupin chicharuk “Péṉker aṉkant wetá” tutai nuya̱ṉka wajaki̱ Eprunnum wémiayi. 10 Túrasha Apsarúnka ashí Israer wea matsamármia nui̱ ú̱saṉ chichaman akupeak chichaak “Kachu umpuamu ántakrumka chichakrum ‘Apsarúnka Eprunnum akupeawai’ titiarum” tu akuprámiayi. 11 Kame Apsarúnja̱i̱ Jerusaréṉnumia̱ áishmaṉ ni ipiaamu tusiantu wéarmiayi. Túrasha Apsarún túrattsa wakerimia núnaka peṉké nékatsuk niṉkia wéarmiayi. 12 Tura nui̱ taṉkun maa áestak pujus Tawitia yaintri̱ ni pépruri̱n Jirkarnum pujá Jirut aents Ajitupír untsukrum utitiarum tusa Apsarún akuprámiayi. Tura Tawitian nakitiáiniaka ti kakaram ajasármiayi núnisaṉ aents Apsarúnan yaya̱rmia nusha nuna núkap kaweṉki̱ wéarmiayi.
Tawit ni írutramuri̱ji̱a̱i̱ Jerusaréṉnumia̱ pisamu
13 Nuyá̱ chichama etserin chikichik Tawitian tarí chicharuk “Ashí Israer shuara enentáiṉkia Apsarúnja̱i̱ wénawai.” 14 Tutai Tawit ashí takarniúri̱n Jerusaréṉnum niji̱a̱i̱ matsamármia nuna chicharainiak “Wajakiarar mashi pisarártai Apsarúnai̱ya̱ṉka úmkacharminiaitji. Wárik jíintratarum wéarmi apapétmak amaintiámka̱i̱j tura iincha wáitkiarmas tura péprunka puya̱ja̱i̱ amuká̱i̱” tímiayi. 15 Tura úunt akupniu yaintri̱ chicharainiak “Nekaata ame takarniúrmeka aya ajasár ii uuntri̱ úunt akupin chichakti tusar nákaji” tiármiayi. 16 Úunt akupin jiinkí̱ wéakui ni shuari̱sha takamtsuk ashinkiarmiayi. Antsu ni nuwe̱ya núnis armia nunak aya tiáschiniak úunt akupniu je̱e̱n wáinkiartinian ikiukiármiayi. 17 Nuyá̱ úunt akupniuka ashí aents nin nemariarmia nuja̱i̱ irunar wéar arant ajasár matsamkarmiayi. 18 Ashí ni yaintri̱ armia nuka Seret shuarsha Pirit shuarsha ashí Jit aentssha tura saisiantu áishmaṉ Káatnumia̱ pataki̱ náwek taarmia nuka niin ayamchik naṉkaamarar úunt akupin wéamunam eem wéarmiayi.
19 Nuiṉkia úunt akupin Jit aentsun Itiain chicharuk “¿Amesha urukamtai íiji̱a̱i̱sha winiam? Amekka waketkim úunt akupniuja̱i̱ juaktá. Warí, ámeka írarchakaitiam tura ame nuṉkemíya̱sha jí̱i̱kir akupkachmakaitiam. 20 Ámeka yáunchuk támame. ¿Túmamni̱ṉkik iiji̱a̱i̱ winiakum wekaikiní̱ ajatí títiatjam? Warí, wikia tui̱ wéaj nunasha nékachiatnak ántranak wéajai. Ámeka wáketkum amé shuarka awakeararta tura waitnenkartutai̱ṉkia tura nekasa nusha ámiji̱a̱i̱ atí” tímiayi. 21 Tutai Itiái úunt akupniun chicharuk “Yussha iwiaakui tura winia úuntur úunt akupniusha iwiaakui tiniu asan jákatniuitkiui̱sha núja̱i̱ṉchuka iwiaaku pujuttaknasha winia úuntur úunt akupin tui̱ pujuta nui̱ ame takartámniusha pujuttawai” tímiayi. 22 Nuya̱ṉka Tawit Itiain chicharuk “Eem winitiá túram waya̱ta” tímiayi. Núnis Jit aents Itiaikia ashí áishmaṉ niji̱a̱i̱ pujuarmia nui̱m uchirtiuk Tawitiai̱ naṉkaamakmiayi. 23 Ashí entsan katitiainiai̱ ashí aents kakantar útiarmiayi. Núnisaṉ úunt akupniuka tura ashí aents niji̱a̱i̱ yujarmia nui̱m Kitrun ashintsan katitrar kampuntin atsú jintianmaani̱ wéarmiayi.
24 Kame Satuksha nui̱ páchitkia wéakui Riwí shuar Yus Aentsja̱i̱ Chícham Najanamu Eṉketáin juarmia nusha ashí wéarmiayi. Túrasha niṉkia ashí aents péprunmaya̱ jíiniar amuumam Yus Aentsja̱i̱ Chícham Najanamu Eṉketáinkia nuiṉ apujsar pujuriarmiayi. Nuya̱ṉka ashí aents péprunmaya̱ jíintrarmatai Awiatársha wakamiayi.
Jerusaréṉnum mamikmaun Tawit akupkámu
25 Úunt akupin Satukan chicharuk “Yus Aentsja̱i̱ Chícham Najanamu Eṉketáiṉkia péprunam awaiṉkitia tura Uunt Yus waitnentrakka Niṉki awaṉtuktiatui. Núnisan Yusna Eṉketáincha tura Ni pujutái̱ri̱ncha wáinkiatniun tsaṉkatruktatui. 26 Antsu chichartak ‘Wakeratsjame’ túrutkuiṉkia ju̱ nekaata Niji̱a̱i̱ warí péṉkerait nuna túrutati tajai” tímiayi. 27 Nuya̱sha úunt akupin Yúsnan pujurin Satukan chicharuk “¿Ámeka nékachukaitiam? Péprunam péṉker aṉkant waketkitia tura jimiará uchiram Ajimiás tura Awiatára uchirí̱ Junatáncha ámiji̱a̱i̱ métek waketkiarti.* 28 Íimsata, wikia atumí chichame̱n nekaamam atsamu pakarí̱ya̱ nui̱ wajastatjai” tímiayi. 29 Nuya̱ṉka Satukka Awiatárja̱i̱ Yus Aentsja̱i̱ Chícham Najanamu Eṉketáinkia Jerusaréṉnum awaiṉkiarmiayi. Túrawar nui̱ṉ juákarmiayi.
30 Túrasha Tawitkia Uriwiu náintian warukmiayi. Wákuk muuke̱nka nukuk náwek utki̱ wakamiayi. Núnisaṉ ashí aents niji̱a̱i̱ wéarmia nuka aṉkant aṉkant muuke̱n nukukár útkiar wákarmiayi. 31 Tawitian ujak chicharainiak “Ajitupírsha ámin kajertamainia nui̱ Apsarúnai̱ páchitkiawai” tiármiayi. Tuíniakui Tawit chichaak “Maa Uunt Yusá waitneasam Ajitupíra chichame̱ṉka pachimprukta” tímiayi. 32 Tura Tawit naintia pakarí̱n Yus tikishmatái̱ya̱ nui̱ jeamtai Arkit aents Usái iṉkiuṉtaj tusa jiintiukmiayi. Kame pushiri̱ṉkia já̱a̱narun entsaru tura muuke̱ncha núṉkak ajasu iṉkiuṉmiayi. 33 Tura Tawit chicharuk “Ame wiji̱a̱i̱ winiakmeka amesháa itiurchat awajtíttiame. 34 Antsu péprunam waketkim Apsarún chicharkum ‘Úunt akupniu ame takarniúram átatjai. Kame yáunchusha ame apan takarniúri̱yajai núnisnak yamaisha ame takarniúram átatjai’ tákumka antsu nui̱ṉkia winia waitnentrakum Ajitupíra chichame̱ṉka pachimpruktatme. 35 ¿Kame Yúsnan pujurin Satukja̱i̱ Awiatárka ámiji̱a̱i̱ṉkia nui̱ṉkia pujuchartatuak? Úunt akupniu je̱e̱n antuktatmena nuka Yúsnan pujurin Satuk Awiatárja̱i̱ ashí ujakárta. 36 Ju̱ nekaata, ni jimiará uchirí̱ niji̱a̱i̱ pujuiniawai Satuka uchirí̱ Ajimiás tura Awiatára uchirí̱ Junatán. Ame chícham antuktatmena nuka niini̱ chícham akuptúrkata ujatkarat.” 37 Núnis Tawitia amikri̱ Usaikia péprunam jeamiayi. Tura Apsarúncha Jerusaréṉnum waya̱miayi.