2 Samuir

Sepa Tawitian ánaṉma

16 Tawit naintia tsakarí̱n waka ishichik náṉkamasu ai̱ṉ Sepa Mijipiuséta takarniúri̱ nui̱ pujá jimiará kawain ekemtai̱ ikiursar iwiaramuja̱i̱ tura tusiantu páṉkan núnisaṉ sian paṉ uwa ikiarámuja̱i̱ najanamun ántsaṉ sian yuraṉken nuyá̱ wíniun chikichik muítsnum jukí̱ iṉkiuṉtaj tusa jiintiukmiayi. 2 Nuya̱ṉka úunt akupin Sépan chicharuk ¿urukamtai ju̱sha itiam? tímiayi. Tutai Sepa aya̱k “Úunt akupniu shuari̱ ekemkarat tusan kawainkia itiarjai antsu páṉnaka tura yuraṉnasha natsa yuáwarat tusan itiajai nuyá̱ wíniunka pimpikiartatna nu umararmi tusan itiajai” tímiayi. 3 Takui̱ úunt akupin anintrak “¿Ame úuntrumi uchirí̱sha tui̱ pujá?” tímiayi. Tutai Sepa úunt akupniun aya̱k “Nekaata. ‘Yamái Israer shuar winia aparu akupeamuri̱n awaṉturkiartatui’ tusa niṉkia Jerusaréṉnumaṉ juakmai” tímiayi. 4 Nuya̱ṉka úunt akupin Sépan chicharuk “Ju̱ nekaata, Mijipiusétna ainia nuka ashí áminiuiti.” Tutai Sepa aya̱k “Ámin tsuntsumpruán tikishmátjame ántsanak winia úuntur úunt akupniu, ame waitnenkartutairmin wisha wainkiatjai” tímiayi.

Semái Tawitian yumiṉkramu

5 Kame úunt akupin Tawit Pajurímnium jeamtai chikichik áishmaṉ nui̱ pujá Saura shuari̱ Jera uchirí̱ Semái náartin jiintiuki̱ yumiṉki̱ wémiayi. 6 Tura Tawitian nuyá̱ ashí úunt akupniu yaintri̱ armia nunasha kayan naṉkikí̱ wémiayi. Túrasha ashí aents núnisaṉ áishmaṉ kakaram armia nuka untsuurí̱ni̱ tura menaarí̱ni̱ wajatiármiayi. 7 Túrasha Semaikia yumiṉkiak chicharuk “Maṉkartin aentsu, netsé, ju̱ya̱ṉka jiinkitia jiinkitia” awajmiayi. 8 “Saura pujutái̱ri̱ akintrukam úunt akupin ajasu asakmin ashí Saura shuari̱ numpe̱e̱n Uunt Yus aminiak yapajtiámkai. Tura Uunt Yusak ame akupeamurminkia ame uchirmin Apsarúnan uwejé̱e̱n íktus iniaitiúrmasai. Tura ju̱sha nekaata, maṉkartin aents asam yamaikia amesha itiurchat wainkiame” tímiayi. 9 Nuna takui̱ Sarwia uchirí̱ Awishái úunt akupniun aníak “¿Ju̱ ya̱wá̱ jakaasha urukamtai winia úuntur úunt akupniuncha yumiṉkratniuit? Weritiaj waitneasam initiúsai werin muuke̱n tsupirkartaj” tímiayi. 10 Takui̱ úunt akupin aya̱k “¿Sarwia uchiri̱yá wisha atumji̱a̱i̱sha warinia íistiniaitiaj? Yumiṉkrak yumiṉkrurti. Warí, Uunt Yus Tawit nuní̱ yumiṉkrata tímiaitkiuiṉkia yaki nunasha ¿urukamtai nusha tame titi?” tímiayi. 11 Nuya̱ṉka Tawit Awisháin tura ashí ni takarniúri̱n chicharainiak “Ju̱ nekaatarum, winia uchir wini̱i̱ya̱ akiiniaitiak mantuataj tawai. Kame nekaska Piṉjiamín shuarka urutmatsuk yamaikia mantuatniun wakerutainia. Tuma asamtai iniaisatarum yumiṉkrak yumiṉkrurti. Warí, Uunt Yusak túrunati tíchakait. 12 Kame wi wáitiamun Uunt Yus íirtuschanpiash. Tura ju̱ tsawant yamái yumiṉnarja̱i̱. Maa Uunt Yus yapajtiura péṉker pujustinian surusáinti” tímiayi. 13 Kame Tawitkia níniuri̱ji̱a̱i̱ jintiak wenai̱ Semaikia náintiak ayantánmanumaani̱ ni wénamunam naka wesa yumiṉki̱ kayá naṉkimkí̱ tura nuṉka ju̱yu̱ri̱n naṉkiki̱ wémiayi. 14 Kame úunt akupniuka tura ashí shuar niji̱a̱i̱ pujuarmia nusha ti pimpiki̱ jeawaru ásar nui̱ ayamprarmiayi.

Apsarún Jerusaréṉnum akupeawai

15 Tura Apsarúnka ashí Israer shuarja̱i̱ Jerusaréṉnum waya̱warmiayi tura Ajitupírsha nui̱ páchitkiauyayi. 16 Nuyá̱ Tawitia amikri̱ Arkit aents Usái Apsarún pujamunam jearí chicharuk “¡Úunt akupniuka iwiaaku atí! ¡Úunt akupniuka iwiaaku atí!” tímiayi. 17 Takui̱ Apsarún Usain chicharuk “¿Ame amikrum asamtai péṉker enentáimtakmek tu chicharam? Enta ¿urukamtai ame amikrúmji̱a̱i̱ṉkia wéchamam?” tímiayi. 18 Nuyá̱ Usái Apsarúnan aya̱k “Atsá. Wikia Uunt Yus yana anaikiatta tura ju̱ aentssha núnisaṉ ashí Israernumia̱ áishmaṉ yana anaikiartata wikia nuna átatjai tura niji̱a̱i̱ pujustatjai. 19 Nuya̱sha ¿yana takarniúri̱ átataj wisha? ¿Nuka ní uchirí̱ṉchukait? Ame apan itiur takarniuitiaj tímiatrusnak amincha takarsattajme” tímiayi.

20 Nuya̱ṉka Apsarún Ajitupíran chicharuk “Yamaisha warí túratniuitiaj nu ame turuttia” tímiayi. 21 Tura Ajitupír Apsarúna aya̱k “Ame apá úunt akupniu je̱e̱n wáinkiartinian ni nuwe̱a núnis áinian ikiukiarma nuja̱i̱ yamaikia kanuuta. Tura ame apa íismasha mui̱jmiai̱ ajasumna núnaka Israer shuarsha ashí antukartatui. Tura aents nuna nekaawarka nuna naṉkaamas kakaram ajasártatui” tímiayi. 22 Nuya̱ṉka je̱a̱ taṉkiri̱n jutai̱ je̱a̱n Apsarúnan najatawarmiayi tura Israer shuarsha ashí iimiainiamunam ni aparí̱ nuwe̱a núnis armia nuja̱i̱ tsaniṉ kanarmiayi. 23 Kame nu tsawantinkia Ajitupíra chichame̱ṉka Yusa chichame̱a núnisauyayi. Tawitcha tura Apsarúncha Ajitupíra chichame̱nka Yusa chichame̱a tímiatrus enentáimtiarmiayi.