2 Samuir

Shiwia Tawitian kajerkámu

20 Kame chikichik áishmaṉ netse Piṉjiamín shuar Pikri uchirí̱ Shiwia nui̱ pujumiayi. Tura ní kachun umpuar chichaak “Iikia Tawitiai̱ṉkia wariṉkish takurmaktsuji ántsaṉ iiniu átincha Isái uchirí̱nkia atsawai. ¡Israerá aṉkant aṉkant atumí je̱e̱n waketratarum!” tímiayi 2 Nuna takui̱ Israer shuarka Tawitniaka ashí ikiuiniak Pikri uchirí̱ Shíwian pataatukarmiayi. Antsu Jutanmaya̱ shuarka Jurtannumia̱ juárkiaraṉ Jerusaréṉka tímianaisha nekas enentáiji̱a̱i̱ ni úunt akupniuri̱n nemarsarmiayi.

Nuwe̱ya núnis armia nuna Tawit eṉkeawarma

3 Kame úunt akupin Tawitkia úunt akupniu je̱e̱n Jerusaréṉnum taa úunt akupniu je̱e̱ wáinkiatarun tusa ní nuwe̱ya núnis armia nuna tias ikiukiarman achikiar chíkich je̱a̱nam eṉkea iniaisarmiayi. Yurumkanka súsarmiayi túrasha atakka níji̱a̱i̱ṉkia peṉké kanarcharmiayi. Antsu wáje̱a núnisar jáamam chumpíamu matsamsarmiayi.

Juap Amasan maamu

4 Nuyá̱ úunt akupin Amasan chicharuk “Jutanmaya̱ shuar ashí untsukarta menaintiú tsawantin ju̱i̱ pujuarat tura amesha tatá” tímiayi. 5 Tutai Amasaka Jutanmaya̱n untsukartaj tusa wémiayi túrasha tsawant nekapmatamunka iniaṉkakmiayi. 6 Túrunamtai Tawit Awisháin chicharuk “Yamaikia Pikri uchirí̱ Shíwiaka Apsarún itiurtámkamajⁱ nuna itiurchat awajtámkattaji. Tuma asamtai ame úuntrumi takarniúri̱ yaruakam pataatukta pepru wenuke̱ iwiartukar utúachmin awajsámun wainiak nui̱ u̱mkamtai wáinkiachaij” tímiayi. 7 Nuyá̱ Juapa aentsri̱ṉkia Pirit shuar tura Seret shuarsha núnisaraṉ ashí kakaram armia nusha Awishái wéakui nisha pataatukarmiayi. Kame Pikri uchirí̱ Shíwian pataatuktai tusar Jerusaréṉnumia̱ jíintrarmiayi. 8 Tura Kapaunnum uunt kaya pujana nui̱ jeattsar wénamunam Amasaka támiayi. Tura Juapka suntar pushiri̱n entsaruyayi. Nui̱ pátatek emenmamak emenmamamunam puyá̱ eṉkemtáiri̱n eṉkeamun puya̱n emenmamauyayi. Tura wéamunam nu iniantrámiayi. 9 Nuyá̱ Juap Amasan chicharuk “Winia yatsuru péṉkerak wekaam” tinia mukunattsa untsuríji̱a̱i̱ Amasa susuri̱n achikmiayi. 10 Kame Amasaka Juap puya̱n takaku wáiniat anearchamiayi. Tuma asamtai puya̱ja̱i̱ tantannum ijiumiayi tura ampuje̱ṉka nuṉká matsamámiayi. Atakka íjiuchmaitiat núja̱i̱ṉ jaka iniantmiayi. Tura ikiuak Juapka ni yachí̱ Awisháiji̱a̱i̱ Pikri uchirí̱ Shíwian pataatuki̱ wéarmiayi. 11 Nuyá̱ Juapa aentsri̱ chikichik Amasa tepamunam ayaam wajas chichaak “Yaaksha Juápan tura Tawitniasha péṉker enentáimtakka nui̱ṉkia Juapai̱ nemakti” tímiayi. 12 Nuna tuinia Amasaka jintiá ajapén tepes ní numpe̱ni̱ṉ pepeer ajamiayi. Tura ashí aents naṉkaamarmia nuka nuna íiniak nui̱ sétiarmiayi. Tura nu suntar nuna túmainian wainiak Amasanka jukí̱ emenán áepas tarachji̱a̱i̱ nukuk ikiukmiayi. 13 Tura jintiaya̱ṉka emenán áepsarmatai Pikri uchirí̱ Shíwian pataatuktai tusar aentska Juápan nemarkiar mash ashinkiarmiayi.

Shiwia jakamu

14 Kame Shíwiaka Israer shuar ashí weanmaya matsamármiania nuní̱ naṉkaamaki̱ Apirpitmáka tímianai jeawarmiayi túrunamtai Parimnumia̱ aentssha ashí irunturar nisha pataatukarmiayi. 15 Nuya̱ṉka Juap Apirpitmákanam suntari̱ntiuk jeariar péprun téntakar matsamtúkarmiayi. Tura pepru utuami tusar á̱a̱nini̱ átutiar waruktinian najatkarmiayi. Tura ashí aents Juapja̱i̱ matsamármia nuka pepru wenuke̱n yumpuṉtiaj tusar awatiármiayi. 16 Nuya̱ṉka nuwa̱ neka péprunam pujus untsumuk chichaak “Anturtuktarum. Anturtuktarum. Waitneasrum Juap chicharkuram ‘Ju̱i̱ weankati ámiji̱a̱i̱ áujmattsataj’ tawai titiarum” tímiayi. 17 Tura Juap weamkamtai nuwa̱ anintrak chichaak “Amekaitiam Juapmea” tutai “Ee witjiai” tímiayi. Takui̱ chicharuk “Ame takartámniu chichame̱ anturkata” tutai “Ee ántajai” tímiayi. 18 Nuyá̱ nuwa̱ ataksha chicharuk “Yáunchuka jú̱nisar tutaiyayi ‘Nekaattsa anintrakka Apirnum anintrústi’ Tura nuja̱i̱ itiurchat ákusha amuiniuyayi. 19 Wikia itiurchatan nakitín áiniana nuitjiai núnisnak tuke Israernaitjiai. Túrasha ámeka ju̱ pépruka Israera nukurí̱ya núnin wáiniatam ashí amukam aya jú̱nik ikiuktin wakerame. Uunt Yusna nusha ¿urukamtai ashí amuktincha wakeram?” tímiayi. 20 Nuyá̱ aya̱k chichaak “Amuktinniaksha núja̱i̱ṉchuka emeskatniuncha wikia peṉké peṉké enentáimtsujai. 21 Kame nuka núnischaiti antsu áishmaṉ naintiar naintiar Eprain nuṉkanmaya̱ Pikri uchirí̱ Shiwia winia úuntur úunt akupin Tawitian kajerkaiti. Tuma asamtai aya niṉki achikiá surustarum túrawakrumni̱ṉkia ju̱ péprunmaya̱ṉka wétatjai” tutai nuwa̱ chichaak “Nekaata, ni muuke̱n wenuknum á̱a̱wini̱ naṉkimpruáttajme” tímiayi. 22 Nuyá̱ nuwa̱ ni nekatairi̱ji̱a̱i̱ ashí aents nui̱ pujuinian werimiayi túram Pikri uchirí̱ Shiwia muuke̱nka ni tsupirkar Juápan naṉkíawarmiayi. Túrawarmatai kachun umpuarmiayi tura péprunka ikiuiniak aṉkant aṉkant ni je̱e̱n waketrarmiayi. Antsu Juapka Jerusaréṉnum úunt akupniui̱ waketkimiayi.

Tawitia suntari̱ uuntri̱ chíkich armia nu

23 Kame Juapka ashí Israera suntari̱ úuntri̱yayi. Tura Juyata uchirí̱ Piniayáska Seret nuyá̱ Pirit shuara suntari̱ úuntri̱yayi. 24 Aturamka ni akikmaktintri̱n takatja̱i̱ akikma armia nuna íiniuyayi. Ajirúta uchirí̱ Jusapátka naṉkaamana nuna papiniun áiniuyayi. 25 Shípiaka papi̱n aakmau tura Satukka Awiatárja̱i̱ Yúsnan pujurin ármiayi. 26 Núnisaṉ Jair shuar Irasha Yúsnan pujurin Tawitniauyayi.