2 Samuir

Tawit Kapaunnumia̱n shiir enentáimtikma

21 Tawit akupin pujamunam menaintiú uwí tí tsuka ajasmiayi. Túmakui̱ Tawitkia Uunt Yusan e̱a̱kmiayi. Tura Uunt Yus chicharuk “Saur umitmakmanum jú̱niawai. Warí, ni shuarka ti maṉkartin ásar Kapaunnumia̱ aentsun amukármiayi” tímiayi. 2 Nuya̱ṉka úunt akupin Kapaunnumia̱ aentsun untsukar chichasarmiayi. Kapaunnumia̱ shuarka Israer shuarcha ármiayi. Antsu Amur aents juákaru Israer shuarja̱i̱ chichaman najanawaru ármiayi. Túrasha Israer shuar Jutá shuarja̱i̱ akasmatainiak Kapaunnumia̱ aentsun Saurka ashí amuktaj tú enentáimpramiayi. 3 Kame Tawitkia Kapaun aentsu anintrak chicharainiak “Atumniasha warí itiurkamniaitjiarum tura Uunt Yusna nu péṉkernum yumiṉkrak tusar warí akikminiaitiaj yaunchu itiurchat awajkámunmasha” tímiayi. 4 Tutai Kapaunnumia̱ aents aimiainiak “Iikia Saur shuarja̱i̱ṉkia kuítniumkesha núja̱i̱ṉchuka kurinmaṉsha mánaichuitji ántsarik Israernumia̱sha yaaksha jáka̱i̱ṉ tusar nakitiaji” tiármiayi. Tuíniakui Tawitcha chichaak “Átum warí itiurtukat tusarmea wakerarum nuna túrattajai” tímiayi. 5 Tutai nisha chichainiak “Israernumia̱ṉka ashí amukáram chikichkisha juákchat tusa aents chichaman iin najatrama emestamkamajnia 6 nu weanmaya̱ siati áishmaṉ achikiá amastarum. Túrawakrumin Uunt Yus anaikiamu Saura pépruri̱n Kawaanam Uunt Yussha íimmianum sué̱kar nenaar máwarmi” tiármiayi. Tutai úunt akupin chichaak “Núnaka nekas amastatjarme” tímiayi.

Kapaunnumia̱ aents yapajmiákarma

7 Tura úunt akupniuka Yus íimmianum Junatánja̱i̱ chichaman najanawaru ásar Saura uchirí̱ Junatána uchirí̱ Mijipiusétnaka tsaṉkuramiayi. 8 Túrasha Ayasa nawantri̱ Rispa uchirí̱n Sáurnan takusmia nuna jímiaran Armunin Mijipiusétja̱i̱ achikiármiayi. Núnisaraṉ Suara nawantri̱ Mirapa uchirí̱n Mijiur aents Parsirái uchirí̱ Atriarnan takusarmia nuna séṉkun achikiármiayi. 9 Túrawar Kapaunnumia̱ aentsun súsar iniaisarmiayi túram naint júkiar Uunt Yus íimmianun sué̱kawarmiayi túram siátikia métek jákarmiayi. Núnaka sewata júuktin tsawant juármanum máwarmiayi. 10 Tura Ayasa nawantri̱ Ríspaka suí̱r tarachi̱ achik pampanam áintkiamiayi. Sewata júuktin juármanumaṉ naṉkama yumi yutuktin tsawant jeamam nui̱ṉ pujumiayi. Túrak tsawai̱kia yaki̱ya̱ nanamtin aya̱shí̱n yuáwara̱i̱ṉ tura káshikia kampunniunmaya̱ yajasma yuáwara̱i̱ṉ tusa péṉker wáinkiarmiayi. 11 Tura Saura nuwe̱ya núnisauya nu Ayasa nawantri̱ Rispa túrimia nuna Tawitian ujakármiayi. 12 Tawit nuna nekáa Jiristíanmaya̱ aents Sáuran nupetkar Kirpúanam máwar Pitshannum nenaamun Karaatnumia̱ aents ú̱saṉ Japisnum júkiarmia nuya̱n werí Sáuran tura ni uchirí̱ Junatána ukunchí̱ncha Tawitkia júkiarmiayi. 13 Túrawar Sáuran núnisaṉ ni uchirí̱ Junatána ukunchí̱ncha nuya̱n ikiankar tura sue̱ka maamu ukunchí̱ncha júkiarmiayi. 14 Túrawar Sáuran tura ni uchirí̱ Junatána ukunchí̱ncha Piṉjiamín aentsu nuṉke̱e̱n Séranam ni aparí̱ Kish iwiarsamunam iwiarsarmiayi. Núnisan úunt akupin túratarum tímiania núnaka ashí túrawarmiayi. Nu naṉkaamasmatai Yus seamsha nu nuṉkanka waitnentramiayi.

Jiristíanmaya̱ja̱i̱ṉ mánaikir wema

15 Tura atakka Jiristíanmaya̱ Israer shuaran mesetan jurukiarmiayi. Tura Tawitkia ni takarniúri̱ji̱a̱i̱ ashintiukar Jiristíanmaya̱ aentsja̱i̱ mesetnum mánaikiarmiayi túruna Tawitkia jakamnia ajakmiayi. 16 Nuya̱ṉka Arap aents Iswipinúp ni naṉkiri̱ kijintri̱ṉkia yaṉkú jiruja̱i̱ṉkia traisiantu sikru jeauyania nu puya̱n yamarman akachumprua Tawitian mátaj tímiayi. 17 Túrasha Sarwia uchirí̱ Awishái ayamprak ijiú mámiayi. Nuya̱ṉka Tawitia aentsri̱ nekas túrattaji tusa chicharainiak “Ju̱ya̱ṉka yamaikia ámeka mesetnumka íiji̱a̱i̱ṉkia atakka peṉké jíinkishtatme, warí ame jákmeka Israer shuara shiripkiri̱ya̱ núnisaitmena nú kaji̱nkiamniaiti” tiármiayi. 18 Nuyá̱ ataksha chíkich meset Kúpnum Jiristíanmaya̱ja̱i̱ ámiayi. Nui̱ṉkia Jusanmaya̱ Sipikai Arap aentsun Sápan mámiayi. 19 Tura ataksha Jiristíanmaya̱ja̱i̱ mánaiktin ataksha Kúpnum ámiayi. Nui̱ṉkia Piriṉnumia̱ Jaripurikimia uchirí̱ Irjanan Jit aentsun Kuriatan mámiayi. Ni naṉkiri̱ṉkia ti uunt uruch kutamtai kaya tímianuyayi. 20 Tura Káatnum meset chikitcha ámiayi. Nui̱ aents ti naya chikichik uwejnumaṉ tsara uwejé̱ṉka sais sais tura nawe̱ncha núnisaṉ sais sais takaku ámiayi. Nisha Arap shuarauyayi. 21 Nisha Israer shuaran atsaṉmiayi túrasha Tawitia yachí̱ Semaiya uchirí̱ Junatán núnaka mámiayi. 22 Ju̱ kuatru aents áiniana ju̱ka Káatnumia̱ Arap aents ármiayi. Túrasha Tawitian tura ni takarniúri̱ uwejé̱e̱n jákarmiayi.