2 Samuir
Tawit akatmamuk chichakma
23 Tawit chichaman akatmamuk jú̱nis chichakmiayi.
Isái uchirí̱ Tawit Yus anaikiamia nu áishmaṉkan, Jakupa Yusri̱ asuitiji̱a̱i̱ ukatkamia nu
tura Israernumia̱ ti péṉker kantamin chichaak
2 “Uunt Yusa Wakaní̱ wini̱i̱ni̱ chichasuiti
tura ni chichame̱n winia wenuruí̱ apujsaiti.
3 Israera Yusri̱ chichakuiti
tura Israernumia̱ kátsuram Kaya aentsun nekasa nuja̱i̱ métek túrawarat tusa akupeana nu chichartak
‘Yus ashamamuja̱i̱ akupeana nuka
4 esat tsawa̱a̱kui yuraṉmisha atsamunam etsa̱ jíiniuk tsáapin ajana
tura yumi yutuk naṉkaamas tsáapin ajas nuṉkaya̱ nupa̱n tsapamtikna núnisaiti’ tawai.
5 Warí nekaschaṉ ¿Wí shuarka Yus íismaka jú̱ninchakait?
Niṉkia chícham tuke átinian wiji̱a̱i̱ najanaiti
tura péṉker iwiarkamu ashí uminkiatniuiti.
Kame winia uwempratniurnasha
tura wi wakeramurnasha yámaikikia ashí umíatsui.
6 Túrasha netse ainia nuka jaṉkia núnisar niṉkia ashí ajapamu ártatui.
Warí núnaka yaaksha uwejé̱ja̱i̱ṉkia achikchamniaiti.
7 Núnaka yaaksha achikchattawai antsu achiktaj tákunka esáa amukat tusa jiruja̱i̱ nuíchuka naṉki numiri̱ji̱a̱i̱ achik jinium epeattawai” tímiayi.
Tawitia suntari̱ menaint kakaram armia nu
8 Tawit suntara kakarman takaruya nuna náari̱ṉkia jú̱ áiniawai, Takmun shuar Jusepasipít menaint armia nuna uuntri̱. Kame uchusiántu aentsja̱i̱ mánaik ni naṉkiri̱ji̱a̱i̱ nuiṉ kajeṉmiayi. 9 Nuna úkuri̱nkia Ajuj shuar Tutú uchirí̱ Iriasár pujumiayi. Kame Israer shuar Jiristíanmaya̱ aentsja̱i̱ mesetnum iṉkiuniattsa iruntrarmatai Israer shuarka pisakármatai menaintiú aents kakaram Tawitji̱a̱i̱ juárkarmia nui̱ nisha páchitkiauyayi. 10 Kame Jiristíanmaya̱ aentsja̱i̱ mánaikmiayi ni kunturi̱ yawe̱mam túruna puya̱ri̱ uwejnum pempruk juárkamiayi. Nú tsawantin Uunt Yus ti paant nupetmamtikiarmiayi. Túrunamtai aentska áyatik nupetmakmanum wari̱ṉsha yaruaktajtsar nin pataatukarmiayi. 11 Nuna úkuri̱nkia Jarar shuar Aji uchirí̱ Sama pujumiayi. Jiristíanmaya̱ aents Réjiniam iruntrarmia nui̱ ámiayi aja miik araamu. Túrasha Israer shuarka Jiristíanmaya̱n aentsun ashamainiak pisakármiayi. 12 Túrasha niṉkia ajanam ajapén wajas nuna ayamprúkmiayi tura Jiristíanmaya̱ aentsnaka nupetkamiayi. Tura nu tsawantai̱sha Uunt Yus ti paant nupetmamtikiarmiayi.
13 Tráintianmaya̱ menaintiú áishmaṉ nekas náakam armia nuka akaikiar árak júuktin tsawantin Tawit pujumia nui̱ Aturam wá̱a̱nam wéarmiayi. Kame nuna túmainiai̱ Jiristíu suntari̱nkia Repaim pakanam matsamkarmiayi. 14 Kame Tawitkia wenuke̱ iwiartukar utúachmin awajsámunam pujumiayi tura Jiristíu suntari̱ṉkia chikichik akankámuk Piriṉnum matsamiayi. 15 Nuyá̱ Tawit tí wakeruk chichaak “Wáitiniam ápatnik taurma yumirmat Piriṉnum ana nuya̱n yaki entsa umartinian surusá” tímiayi. 16 Takui̱ menaintiú áishmaṉ kakaram armia nu Jiristíu matsamkamuri̱n utsantuawar wáitiniam ápatnik taurma yumirmat Piriṉnum ana nuya̱n entsan shikikiarmiayi. Túrawar Tawit pujamunam ejetiarmiayi. Túrasha umartinniaka nakitrámiayi antsu umutai̱ Uunt Yus ukatratniua nútikias ukateak chichaak 17 “Maa Uunt Yusá nu túratniuka wini̱ya̱ṉka arant atí. Warí aents ni iwiaakmari̱n tsaṉkamakarainia nuna númpe̱ya núnischakait” tímiayi. Tusa umartinniaka nakitrámiayi. Ju̱na menaint kakaram armia nu túrawarmai.
Tawitia suntari̱ traintia kakaram armia nu
18 Kame Juapa yachí̱ Sarwia uchirí̱ Awishái niṉkia traintia armia nuna úuntri̱yayi. Niṉkia naṉkiri̱ṉ achik traisiantuja̱i̱ mánik ashí nupetkarmiayi. Menaint armia nuja̱i̱ nisha shiir awajtai̱ ajasmiayi. 19 Traintia armia núja̱i̱ṉkia níyayi nekas arantútaiṉkia tura traintia armia nuna úuntri̱yayi túrasha menaint ainia nui̱ṉkia pachikcharmiayi. 20 Kame Juyata uchirí̱ Piniayáska Kapsirnumia̱ shuar ti kakaram túrachminian túrimia nuna uchirí̱yayi. Muápnumia̱ aents jímiar kakaram nákam armia nuna mai̱ mámiayi. Tura micha kákeamu tsawantin kayá wá̱a̱nam akaikí̱ úunt ya̱wa̱n mámiayi. 21 Núnisan Ejiptunmaya̱ aents ti úuntnasha mámiayi. Kame Ejiptunmaya̱nka naṉkin takaku winimiayi túrasha Piniayáska numí takaku werimiayi. Túrasha naṉki takakman ataṉkí̱ ni naṉkiri̱ji̱a̱i̱ṉ Ejiptunmaya̱ aentsnaka mámiayi. 22 Juyata uchirí̱ Piniayáska ju̱na túramiayi tuma asa menaint armia nuja̱i̱ métek nisha náatkauyayi. 23 Traintia armia nui̱ nisha arantúkmauyayi túrasha menaint armia nui̱ṉkia páchitkiachuyayi. Tura Tawitkia úunt akupniu wáinin armia nuna uuntri̱ awajsámiayi.
24 Tráintianam nui̱ ju̱sha páchitkia ármiayi. Juapa yachí̱ Asaer, Piriṉnumia̱ Tutú uchirí̱ Irjanan, 25 Jarutnumia̱ Sama Erekja̱i̱ 26 Pirit aents Jíris, Tekuanmaya̱ Ikisa uchirí̱ Ira, 27 Anatútnumia̱ Apiasér, Jusanmaya̱ Mipunai, 28 Ajuj shuar Sarmun, Nitiujánmaya̱ Majarai, 29 Nitiujánmaya̱ Paana uchirí̱ Irip, Piṉjiamín shuar Kawaanmaya̱ Ripai uchirí̱ Itiái, 30 Piratúna uchirí̱ Piniayás, Kaas ashintsanmaya̱ Jitiai, 31 Arpanmaya̱ Apiarpun, Pajurím shuar Asmawít, 32 Sapinniumia̱ Iriapa, Jasena uchirí̱ Junatán, 33 Jarar shuar Sama, Jarar shuar Sarara uchirí̱ Ajiam, 34 Maaka shuar Ajaspái uchirí̱ Iripirít, Jirut shuar Ajitupíra uchirí̱ Iriam, 35 Karmirnumia̱ Jisrái, Arwit shuar Paarai, 36 Súupanmaya̱ Natana uchirí̱ Ikiar, Kaat shuar Pani, 37 Amun shuar Sírik, Sarwia uchirí̱ Juápan tantari̱n takurin Pirutnumia̱ Najarai, 38 Jatirnumia̱ Ira Kaarepja̱i̱, 39 Jet aents Urías. Ashí irumpramka traintisiáti ármiayi.