2 Samuir
Tawit nupetmak Uunt Yus kantampramu
(YKan. 18)
22 Kame ashí nemasri̱ tura Saura uwejé̱ya̱ncha Uunt Yus Tawitian aṉkant awajsámia nu tsawantin jú̱ kantan Uunt Yusan kantampruámai. Nisha chichaak
2 “Uunt Yuska winia uunt kátsuram kayaruiti.
Winia kakarmaruiti tura winia aṉkant awajtiniaiti.
3 Yuska winia kayaruiti. Niní̱i̱ ejamkattajai.
Kame winia tantaruka tura winia aṉkant awajtin kakarmarka,
winia ayamprútniuka, wi ejamtai̱ṉkia tura winia uwemtikrinkia Níṉkiti.
Itiurchatnumia̱sha Amek uwemtikrame.
4 Uunt Yusan untsuktatjai warí Niṉkia shiir awajú ajamainti.
Tura winia nemasrui̱ya̱sha aṉkant awajsamu átatjai.
5 Ti nekas jákatniusha tampaya núnis amutáwarmai.
Núnisaṉ ti yajauch netse túrutai̱sha entsá kakarmari̱ya̱ núnisar ashamtikrukarmai.
6 Jakaa matsamtai̱ penuntratai tusar téntatkarmai.
Núnisaṉ jákatniu naeke̱sha jiṉkiattramai.
7 Winia kúntutsrui̱ jakamnia nekapeakun Uunt Yusan untsukmajai winia Yúsruncha seamjai.
Túram Ni pujamunmaya̱ṉ winia chichamprunka anturtukmai tura wi seamusha Ni kuishi̱i̱n jeamai.
8 Nuṉkasha purushnir kuraṉmayi túram nayaimpi tépakmari̱ áchitramuri̱sha muchitrarmai.
Ni kajeku asamtai kurainiarmai.
9 Ni nuji̱ya̱ mukuint jiinkimiai tura Ni wene̱ya̱ṉka amukratin ji kapa̱i̱miai tura Níya̱ṉka jinia kaí̱ri̱ kapá̱a̱ peer peer ajarmai. *
10 Nayaimpisha tsuntsumá akaikímiai
tura Ni nawe̱n nuṉkani̱ṉkia kirit tee ajasmai.
11 Kirupínnium ekemak nanakmiai. Nasé̱ nanape̱n ekemkamai.
12 Ni ú̱mtairi̱nkia kiritniunam najanamai.
Ni ú̱mkar pujutai̱ je̱a̱ núniniauyi.
Ni nukurke̱nka yuraṉkim téeyayi.
13 Pujá asa ní winchari̱ji̱a̱i̱ jinia kaí̱ri̱ kéekarmai.
14 Uunt Yuska ipiamta tímiatrus nayaimpiniam téter ajamai.
Ashí Naṉkamantu chichame̱sha antuukamai.
15 Yus naṉkincha akuptur winia nemasruncha tsakiṉmakmai.
Péemniasha naṉkimiar imiamtikrarmai.
16 Uunt Yus chicharkam tura Ni nuji̱ya̱ mayai̱ji̱a̱i̱ umpuim nayantsa tépakmari̱sha íismin ajasármai.
Tura nuṉka nájankur aeprukmari̱sha paant ajasármai.
17 Yákiya̱n akuptúrak achirkámai.
Túruta tí kakaram entsa áma̱a̱numia̱ jurusmai.
18 Tura winia nemasur ti kakaram núnisaṉ nakitruinia nuya̱sha aṉkant awajtúsmai.
Warí niṉkia wíji̱a̱i̱ṉkia naṉkaamas kakaram armai.
19 Wi wáitsan pujumaj nu tsawantinkia wiji̱a̱i̱ iṉkiunaiyawarmai.
Túrasha Uunt Yusaiti winia atu̱ruka.
20 Nuṉka tí apunam ji̱i̱rkimiai tura winia wakeruta asa aṉkant awajtúsmai.
21 Uunt Yuska wi nekasa nuja̱i̱ métek túrutairja̱i̱ métek akirkaiti.
Winia uwejruka umitmákcha péṉker asamtai warinkish surusuiti.
22 Warí Uunt Yusa jinti̱n wekasaitjiai.
Túran Yusa umircha núnisnaka winia Yúsrui̱ya̱ṉka kanakchaitjiai.
23 Wi pujamunmaṉka ashí nekasa nuja̱i̱ métek sumamtiktairmeka wini̱n pujuiniawai.
Ame akupkámurmeka wini̱ya̱ṉka kanakchaiti.
24 Níji̱a̱i̱ṉkia esetran wekainiuyajai.
Túran yajauch wakeruktinniasha túrachmiajai.
25 Ni íimmiaja̱i̱ métek winia uwejrunka japiru asamtai nekasa nuja̱i̱ métek túrutairja̱i̱ Uunt Yus wíniaka akirkaiti.
26 Waitnenkartinji̱a̱i̱ waitnenkartutai̱ iniakturme.
Núnismek esetar wekain áishmaṉja̱i̱ esetra wekainiaitme.
27 Wapikchaja̱i̱ wapikcha iniakmame.
Tura tí yajauch ainia núja̱i̱sha imiá neka núnin enentáimtikiainiame.
28 Aents péejchach ainia nuka uwemtikiainiame.
Ame antsu waantu enentáimtumainiana nuka natsanmai̱ péejchach awajáiniame.
29 Maa Uunt Yusá ámeka ti nekasam winia shiripkiruitme.
Winia Yusur wini̱n kirit ana nuna tsáapin awajturui.
30 Ámiji̱a̱i̱ṉkia untsurí suntarnasha emeskartatjai.
Tura winia Yúsruja̱i̱ṉkia nant ajakin wenuknasha naṉkaikiniaitjiai.
31 Yusa jinti̱ṉkia tuke imiatkinchaiti.
Tura Uunt Yusa chichame̱ṉka nekapsamuiti.
Niin ejamainia nuna Niṉkia tantari̱nti.
32 Kame Uunt Yuska Níṉkichukait.
Wari, chíkich kátsuram kaya tímianu ii Yusri̱ji̱a̱i̱ méteksha áwak.
33 Kakarman surana nuka Yúsaiti.
Tura winia jintiarun ti péṉker naka awajturui.
34 Japa nawe̱ya̱ imianú kakaram winia nawernaka awajturui.
Tura yakisha nekas tímiatrusaṉ naka ewekátui.
35 Mesetnum mánaiktinian winia uwejrun iwiarturui.
Túramu asa winia kuntursha tíshimiuk yaṉkú jiruja̱i̱ najanamuncha té nenakminiaiti.
36 Uwemtikkiartin tantarum surusuitme.
Tura Ame yaintkiakmin páantin uunt ajajai.
37 Wakenmarui̱ṉkia winia jintiarka Ame iwiaṉkátrame.
Túramu asamtai winia nawerka atajkintrachartatui.
38 Winia nemasruncha apapékarmajai.
Túran amayá̱ṉkan amuka ikiuakun waketkimjiai.
39 Awatiármaja̱i̱ tura nantaktinian tujintkiarmai.
Winia nawerui̱ nuṉká iniararmai.
40 Mesetnumsha ikiakátramame.
Túram winia nemasruka nupetkaram wakenmarui̱ iniantarmai.
41 Winia nemasruka tuntupmamtikruam ikiurmamtikrukmiame.
Antsu nakitriarma núnaka emeskarmajai.
42 Untsumiármayi túrasha nuna uwemtikrartinkia yaaksha atsumai.
Úunt Yusnasha untsúarmai túrasha Nisha ái̱kcharmai.
43 Nuṉká ju̱yu̱ri̱ya̱ nútikiwarmajai.
Túran kucha páasanam ana nútikiawaran amutúrarmajai.
44 Wi shuar kajertuiniamunmaya̱sha Amek uwemtikrurmame.
Túram uunt nuṉka mátsatkamu úuntri̱ya apujtusmame.
Túrutawakmin aents wisha nékashtai̱ áiniayataṉ winia takartusarmai.
45 Winia anturainiak wárichik umirtuiniawai.
Yajaya̱ aents winí̱ naka wajainiak kurainiawai.
46 Yajaya̱ aents aya sapijmiainiawai.
Túrunawariataṉ ni ú̱mkamuri̱ya̱ṉka kuraṉkiar jíiniarmai.
47 Uunt Yus iwiaaku atí. Winia kátsuram Kayarka* ti shiir awajsamu atí.
Winia uwemtikrin kaya Yuska uunt awajsamu atí.
48 Winia yapajmiátrana nuka Yúsaiti.
Tura ashí nuṉkanmaya̱n umimtikin awajtúsuiti.
49 Winia nemasrui̱ya̱ aṉkant awajtana nuka Yúskete.
Tura yajauch shuar ainia nuyá̱ ayamprutak Uunt awajtana nuka Níṉkiti.
Winia nemasur arantúrkarat tusam anaitiam nuka Yusru Ameketme.
Tura tí warik kajen ainia nuya̱sha Amek uwemtikrame.
50 Tuma asamtai Uunt Yusru ame náarmin ashí nuṉkanam shiir awajtámainiak matsatna tímianaisha ame náarmin pachisan kantamprittiajme.
51 Ni Úunt akupniuri̱n ashí nupetmaktinian suawai.
Tura ni anaikiamuri̱n Tawitniaka ni tiraṉki̱ncha tuke waitnentrattawai” timiai.