2 Samuir
Chícham Najanamu Eṉketai̱ Jerusaréṉnum jukitiaj tama
6 Tura Tawit Israer áishmaṉ ashí juurma armia nunak traintia míran ataksha irurmiayi. 2 Nuyá̱ Tawitkia ashí aents niji̱a̱i̱ pujuarmia nuja̱i̱ Yus Aentsja̱i̱ Chícham Najanamu Eṉketai̱ itiataj tusa Jutá nuṉká Páaranmaya̱ jiinkimiayi. Kame Ashí Akupin Uunt Yusna Eṉketai̱ ni akupkur pujutái̱ri̱ṉkia kirupíṉ matsatmanum ajapén awai. Ni naari̱ shiir awajtutai̱ Yusna Eṉketai̱ nui̱ aan jukitiai tusar ashinkiarmiayi. 3 Tura Yusna Eṉketáinkia yamaram karetanam eṉkerármiayi. Túrawar Apiniatápa je̱e̱ náintiaani̱ amia nuya̱ṉka júkiarmiayi. Kame Apiniatápa uchirí̱ Usa Ajiuja̱i̱ yamaram karetanka ewekámarmiayi. 4 Yusna Eṉketai̱ eṉkeamun túrawar Apiniatápa je̱e̱ náintiaani̱ amia nuya̱ṉka juíniakui Eṉketáinmaya̱ Ajiuka eem wémiayi. 5 Kame Tawitkia ashí Israer shuarja̱i̱ Uunt Yus íimmianum warainiak ashí tuntuitiai̱ sepris numiji̱a̱i̱ najankamu arpa shakap piṉkiúi ke̱e̱r tampur irunmia nuna túntuiniak ti wararmiayi. 6 Túmakiar Nakuna nuṉke̱e̱n trikiu júukar irumtai̱niam jeawarmiayi. Tura waaka áishmaṉ suki̱ chanuntamu tukumkarmatai Yusna Eṉketai̱ iniara̱i̱ṉ tusa Usa uwejé̱n iwiaintiuk nuna achik emetamiayi. 7 Nuna tura asamtai Uunt Yus Usan suíran ka̱e̱ kaje̱ntuk asutiámiayi. Túram Eṉketai̱ ayamach jaka inianmiayi. 8 Kame Uunt Yus Usan maa asamtai Tawitkia kajekmiayi. Tuma asa nu nuṉka náari̱nkia Paresúsa anaikiamiayi tura yamaiya̱ ju̱i̱sha núnisaṉ tuíniawai. 9 Tura nu tsawantinkia Tawitkia Uunt Yusan ashamak chichaak “¿Uunt Yusna Eṉketai̱sha winiasha itiurak tarutit?” tímiayi. 10 Kame Uunt Yusna Eṉketáin Tawitia pépruri̱n júkitniunka Tawitkia nakitrámiayi. Antsu Káatnumia̱ aents Uwit Etuma je̱e̱ pujumia nuní̱ Tawitkia jukimiayi. 11 Tura Uunt Yusna Eṉketáiṉkia Káatnumia̱ aents Uwit Etuma je̱e̱nkia menaintiú nantu pujusmiayi. Tura Uwit Etumnaka tura ashí ni shuari̱ncha shiir pujutnum Uunt Yus yumiṉkrarmiayi.
Yusna Eṉketáin Jerusaréṉnum Tawit jukimiu
12 Tura úunt akupin Tawitian ujak chicharainiak “Yusna Eṉketai̱ ni je̱e̱n pujá asamtai Uwit Etumnaka shuari̱ntiuk nuyá̱ ashí takakna núurtiuk shiir pujutnum Uunt Yus yumiṉkraiti” tu ujakármiayi. Nuya̱ṉka Tawit werí Yusna Eṉketai̱ Uwit Etuma je̱e̱n pujan waras jukí̱ Tawitia pépruri̱i̱n itiá apujsamiayi. 13 Kame Yusna Eṉketáin jukí̱ wénak sais chiki̱á̱i̱ tarimiáwarmatai waaka áishmaṉkan tura murik áishmaṉ unuerman maa Tawitkia áestuamiayi. 14 Tura Tawitkia ashí ni kakarmari̱ji̱a̱i̱ Uunt Yus íimmianum jantsemmiayi. Tawitkia awaṉkém ríniuja̱i̱ najanamun entsaruyayi. 15 Kame Tawitkia ashí Israer shuarja̱i̱ Yusna Eṉketáin jukí̱ wéenak warasar kakantar untsumainiak kachun umpuukiar wéarmiayi. 16 Uunt Yusna Eṉketáin Tawitia pépruri̱i̱n itiarmatai Saura nawantri̱ Mikiar áṉkamunam asa̱a̱s íimiaj tukamá úunt akupin Tawit Uunt Yus íimmianum nanten ájasaṉ jantsemun wainiak ni enentái̱n nakitrámiayi.
17 Túrawar Uunt Yusna Eṉketáinkia itiarmiayi. Nuya̱ṉka nuap je̱a̱ Tawit je̱a̱mmanum tui̱ apujsatniuit nui̱ awayá̱ apujsarmiayi. Tura Tawitkia taṉkun kajeṉ takamtsuk núnisaṉ Uunt Yus shiir awajkur áestuatniuncha Uunt Yus íimmianum áestuamiayi. 18 Kame Tawitkia takamtsuk áestuatniuncha tura Uunt Yus shiir awajkur áestuatniuncha áestasua umik Ashí Akupin Uunt Yusa náari̱ji̱a̱i̱ Israer shuarnaka shiir pujutnum ashí yumiṉkrarmiayi. 19 Nuya̱ṉka ashí aents Israer shuar ti untsurí armia nuna áishmaṉnasha nuwa̱ncha páṉkan nuyá̱ namaṉ tsupikman tura paṉ uwa ikiakár najankamuncha aṉkant aṉkant súsarmiayi. Túram ashí aents aṉkant aṉkant ni je̱e̱n waketrarmiayi.
Mikiar Tawitian nakitrámu
20 Nuyá̱ Tawitkia ní shuari̱n shiir pujutnum yumiṉkrattsa waketkimiayi. Túrasha Saura nawantri̱ Mikiar Tawit winiakui jiintiuki̱ iṉkiuṉ chicharuk “Ausha Israernumia̱ úunt akupniusha ¿yamaikia urutmá arantumai̱ ajaká? Antsu nétsea núnikiume. Náṉkamas aents ¿urukamniait núnis ni takarniúri̱ iniatairi̱ iimiainiamunam yamaikia iwiarmamtsuk iniakmamsachaik?” tímiayi. 21 Tutai Tawit Mikiaran aya̱k “Ame apan tura ashí ni shuari̱n iniaiyak Uunt Yus ní shuari̱n ashí Israernum úunt akupin awajtústaj tusa anaitiukmania Uunt Yus nu íimmianum wikia jantsemájai. Tuma asan Uunt Yus íimmianum wikia warastatjai. 22 Antsu yamaikia nu arant imianchach ajastatjai túmakun wiki íimiasan peṉké péejchach ajastatjai. Túrasha nuwa̱ iniatai̱ ame tuíniamna nuja̱i̱ métek wikia shiir awajsamu átatjai” tímiayi. 23 Tura Saura nawantri̱ Mikiarka iwiaaku pujumia nuiṉkia uchinkia peṉké takutsuk jakamiayi.