2 Samuir

Tawitian nekas Yus shiir awajsattajme timia

7 Tura Tawit akupin ajas ni je̱e̱n pujái̱, Uunt Yus ashí ni nemasri̱ya̱ aṉkant awajsámiayi. 2 Nuyá̱ akupin Tawit Yúsnan etserniun Natanan chicharuk “Íirsakia wikia sétur numi je̱a̱ je̱a̱manum pujatsjak, tuma ai̱ṉ Yus Aentsja̱i̱ Chícham Najanamu Eṉketáiṉkia tarach je̱a̱nam pujatsuk” tímiayi. 3 Yúsnan etserin Natan úunt akupniun chicharuk “Yus ámiji̱a̱i̱ pujá asamtai ame enentáimmena tímiatrusmek túrata” tímiayi. 4 Tura nu kashi Uunt Yus Natanan chicharuk 5 “Winia takartin Tawit werim chicharkum ‘Uunt Yus chichartamuk “Wi pujustin ¿amek je̱a̱rtitniuitiam?” tawai’ titiá” tímiayi. 6 “Tura Ejiptu nuṉkanmaya̱ Israer shuaran yaruakmiajna tímianaiya̱ṉ yamaiya̱ ju̱i̱sha péṉker je̱a̱nmaṉka pujatsjai, antsu jutai̱ je̱a̱nmaṉ ántsaṉ Yus Shiir Awajtai̱ Je̱e̱n wekaikiní̱ ajawitjiai. 7 Ame shuarumji̱a̱i̱ núkap uwí wekasamiaj nui̱sha, Wi Israer shuaran anaikian amé shuar wáinkiarta tiármajna nui̱sha chikichik weanmaya̱nkesha chicharkun ‘¿Urukamtai sétur numiji̱a̱i̱ je̱a̱rtichuitrum?’ tímiakaj.

8 Wats, winia takartin Tawit ujaakum ‘Ashí Akupin Uunt Yus chichaak “Murik wáinniuyamna nuyá̱ jusan Israer nuṉka uuntri̱ ajasái tusan anaikiamjame. 9 Ame tui̱ wekaimiam nui̱sha tuke ámiji̱a̱i̱ṉ wekasaitjiai. Ashí nemasrumji̱a̱i̱ mániakmincha nupetmatkiakuitjiame. Ju̱ nuṉkanmaya̱ akupin ainia nútiksanak páantin awajsattajme. 10 Núnisnak Winia shuarun Israeran nekas péṉker pujustintri̱n iwiarturtatjai. Nuiṉkia yaunchu yajauch shuar itit awajáiniak wáitkiarmia núniska túrachartatui. 11 Núnisnak Wi shuar Israernum sumamtikniun anaitiurarmiaj nuya̱ṉ áminkia ashí nemasrumiya̱ṉka ayamtikrattajme.

Núnisaṉ Uunt Yus áminkia chichartamuk áminkia je̱á̱ je̱a̱mtinia nútikias Uunt Yus Ame weanmaya̱nak úunt akupin awajsártatui. 12 Tura ame tsawantrum jeamtai jakakmincha ame uchirminiak úunt akupin anaikian itit awajsachmin kakaram awajsan apujsattajai. 13 Tura Winia naar shiir awajtai̱ je̱a̱nka ni je̱a̱rtittiawai. Túramtai ni akupeamuri̱ṉkia ukunma tímianaisha tuke atí tusan Wi apujsattajai. 14 Wi, ni Aparí̱ átatjai tura nisha Winia uchir átatui. Tura yajauchin túrakuiṉkia aentsun útsutkan asutmamtikiattajai. 15 Sáuran wi waitnentamun iniaisámiaj núnisnaka niṉkia túrashtatjai. Kame amesha pujamni̱ṉ Sáuran júsachmakiaj. 16 Tuma asamtai Wi íimmianum amé weaka amuutsuk akupin tuke pujusártiniaiti. Tuma asa ni pujusár akuptáiri̱ṉkia umuchkiachmin tuke átatui” tawai’ titiá” tímiayi. 17 Natancha nekas wainkiamun tura antuku asa tímiatrusaṉ Tawitian ujakmiayi.

Tawit Yusan shiir awajma

18 Nuyá̱ úunt akupin Tawitkia Uunt Yus pujamunam wayá̱ eem pujus chichaak “Maa Úuntur Uunt Yusá ¿wisha warimpiaitiaj tura winia shuarusha warí ainia iin tímiaja̱i̱ itiakratincha? 19 Túrasha Ámeka winia Uunt Yusru ju̱sha núkapcha núnisam iyame. Tuma asam ukunmasha Ame takartámniu shuari̱sha ¿urukawartata nusha chichakuitme Uunt Yusru aentssha ju̱nasha túramniakait? 20 ¿Tura Tawit Ámiji̱a̱i̱ chichaaksha nuya̱sha warinia íkiaksha tíminiait? Uunt Yusru Ame takartámniuka Ámeka nékame. 21 Warí Amek chichaku asam tura Ame enentáimmena nuja̱i̱ métek ju̱ nekaachmin ti uunt áiniana nu Ame takartámin nekamtikiataj tusam iniaktusuitme. 22 Tuma asam Ámeka ti uunt Yúsaitme Uunt Yusá. Warí, ii kuishi̱ji̱a̱i̱ antukaruitjinia nuja̱i̱ iismasha Amiiya̱ṉka chíkich Yus Ámiji̱a̱i̱ métekka peṉké atsawai. 23 ¿Tura uunt nuṉka mátsatkamu ashí nuṉkanam iisarmasha chíkitcha túa nuṉka Ame Israer shuarumji̱a̱i̱ méteksha aa? Warí Yuska atá̱i̱ aṉkant awajsar ni aentsri̱ya nútikias matsas Ni naat ajak tura Niṉkia péṉkeran túrak ti uunt nuyá̱ nekaachmin áiniana nuja̱i̱ nu nuṉkanmaya̱ aentsnaka ni yusri̱ncha Ame aneṉkrattairmiji̱a̱i̱ nisháa aentsrumiya̱ ji̱i̱ra akupénakum Amé shuarmeka Ejiptunmaya̱ ji̱i̱ram aṉkant awajsartajtsam werimiame. 24 Kame Ame Winia tuke árat tusam Israer shuarum matsasuitme túram Ámeka Uunt Yusá ni Yusri̱ ajasuitme. 25 Tura yamaikia nu tura asam Uunt Yusru Ame takartámin tura ni shuari̱ túrunawartin chichakuitmena núnaka nekas tuke túrattajai takum Ame tíniuitmena nuka tímiatrusmek túrata. 26 Kame ‘Ashí Akupin Uunt Yuska Israera Yúsri̱nti’ tunatí tusa Ame náarmeka tuke uunt awajsamu atí. Tura ame takartámniu Tawitia shuari̱sha Ame íimmianumka tímiatrusaṉ ártí. 27 Warí Ame Ashí Akupin Uunt Yus Israera Yusri̱yá Ame takartámin ántamunam chicharkum ‘Amé shuar tuke turutchakaitiam.’ Tuma asa Ame takartámniuka ni enentái̱n kakaram ajas Ámin seatmawai. 28 Tuma asamtai yamaikia Uunt Yusru Ámeka nekas Yúsaitme tura Ame chichammesha nekasaiti tuma asam ju̱ péṉker túratin Ame takartámin ujakuitme. 29 Tura yamaikia Ame takartámniu shuari̱ Amiin tuke pujusárat tusam péṉker pujutnum yumiṉkrarta. Warí Ámeka Uunt Yusru chichaku asam Ame péṉker yumiṉkrumji̱a̱i̱ Ame takartámniu shuari̱ṉkia shiir awajsamu tuke ártiniaiti” tímiayi.