2 Samuir

Tawit Mijipiusétan waitnentramu

9 Chíkich tsawant Tawit anintrak “Wi Junatánan aneakun waitnentramnia Saura je̱e̱n chikichik shuarkesha juaku ¿áwak?” tímiayi. 2 Kame Saura takarniu Sepa náartin Saura je̱e̱n pujumiayi. Tura úunt akupin pujamunam untsuk itiarmiayi. Támatai úunt akupin chicharuk “¿Amekaitiam Sípiamea?” Tutai “Ee, witjiai ame takartámin” tímiayi. 3 Tura úunt akupin anintrak “¿Saura uchirí̱sha chikichkisha iwiaakuash? Wisha Yusa aneṉkrattairi̱ji̱a̱i̱ waitnentakun yáiṉtaj tusan wakerajai” takui̱ Sepa Tawitian chicharuk “Junatána uchirí̱ chikichik wekasatniun tujintin pujawai” tímiayi. 4 Úunt akupniusha “¿Tui̱ pujá?” takui̱ Sepa aya̱k “Nisha Amiara uchirí̱ Makira je̱e̱n Rutepár péprunam pujawai” tímiayi. 5 Takui̱ akupin Tawit Amiara uchirí̱ Makirai̱ Rutepárnum Junatána uchirí̱ Mijipiusét nui̱ pujan utitiarum tusa akuptúkarmiayi. 6 Nuyá̱ Junatána uchirí̱n Mijipiusétan Saura tiraṉki̱n Tawitian itiarmiayi. Tura itiam tsuntsumá nijia̱i̱ji̱a̱i̱ nuṉká antiṉmiayi. Túmakui̱ Tawit chicharuk “Mijipiusétá” tutai “Wikia ámin takarniuitjiame” tímiayi. 7 Tura Tawit chicharuk “Ashamprukaip. Junatána uchirí̱ ártí. Ame apa Junatánan ti aneemiaj nuja̱i̱ métek yamaikia wiji̱a̱i̱ pujusam tuke wiji̱a̱i̱ métek yurumtiatme. Tura ame apachrum Saura nuṉke̱n mash awaṉtuktiatjame” tímiayi. 8 Tura nuya̱ṉka Mijipiusét ataksha tsuntsumá paṉkái̱ chichaak “Winia uuntru, ya̱wá̱ jaka núnisaitjiana ju̱sha ¿itiurtsuk winiasha péṉker íiram?” tímiayi.

9 Tuma asamtai úunt akupin Saura takarniúri̱n Sépan untsuk chicharuk “Saurna ashí irunmia núnaka tura ni shuari̱ncha nútiksarnak ame úuntrumi Saura uchirí̱n mash súsarjai” tímiayi. 10 Ámeka uchirmiji̱a̱i̱ tura ame takarniúrmiji̱a̱i̱ ni nuṉké̱ takarin átatme. Túram nerea nu juukam irumpram ame úuntrumi tiraṉki̱ ayurkamtiatme. Antsu ame úuntrumi tiraṉki̱ Mijipiusétka wiji̱a̱i̱ tuke yurumin átatui. Kame Sépaka kinse uchin nuyá̱ painti takarniun takakauyayi. 11 Nuna takui̱ Sepa akupniun chicharuk “Ame takarniúram asan támena tímiatrusnak umikian túrattajai” tímiayi. Tura Mijipiusétka Tawitia yurumtairi̱n akupniu uchirí̱ya tímiatrus yurummiayi. 12 Tura Mijipiusétka chikichik uchin áishmaṉkan Mikiain yajutmaruyayi. Tura Sepa je̱e̱n ashí pujuarmia nuka Mijipiuséta takarniúri̱ ármiayi. 13 Tura Mijipiusét nawe̱nam mái̱ tunamáru asa wekaichauya nuka úunt akupniuja̱i̱ tuke yurumin asa Jerusaréṉnum pujuyayi.