2 Samuir

Tawit nupetmaki̱ wéamu

8 Nu naṉkaamasu ai̱ Tawit Jiristíu aentsja̱i̱ mánaik nupetak pépruri̱ naṉkamantuya nuna ata̱i̱miayi. Nu túramuja̱i̱ Tawit Jiristíu aentsnumia̱n Metekáma ata̱i̱miayi. 2 Núnisaṉ Muap aentsnasha nupetkamiayi. Tura nuṉká pekak áeprar chapikji̱a̱i̱ nekapma menaintiú tesamiayi. Nuyá̱ jimiará tesamua núnaka mash máwar antsu chíkich tesamunka mácharmiayi. Túrunawar Tawitia iniatairi̱ ajasár kuit akikmaktinniasha akikmá pujuarmiayi.

3 Tura Tawit Súupanmaya̱ akupin Rejupa uchirí̱n Atatesérnasha Yúpratis entsa tímianai akupkáttsa pujan nupetkamiayi. 4 Nuyá̱ Tawit kawainium mánaiktinian unuimiátka armia nuna mir siatisiántu suntaran achikiar núnisaṉ nuṉkak mánaitian unuimiátka armia núnaka painti mir achirmiayi. Nuna tura mesetnum mánaitiai̱ kawái úkuri̱ nawé̱ ya̱a̱pe̱n tsupiramiayi. Tura sian karu jukimnia jea kawain ya̱a̱pe̱nka tsupirachmiayi. 5 Tura Siria nuṉka Tamasku péprunmaya̱ suntar armia nu Súupanmaya̱ úunt akupniun Atateséran meset yaiṉtai tusar ashintiukarmiayi. Túmanak Tawitkia Sírianmaya̱ṉka paintitús mir suntar áinianak nupetkamiayi. 6 Nuyá̱ ukunam Tawit Tamaskunam suntar matsamtai̱n najankamiayi. Nuka Siria nuṉkanmauyayi. Nuní̱ turuna Síriaka Tawitia takarniúri̱ ajas kuítian akimiayi. Tura Tawit tuí̱ṉkish wemia nui̱ṉkia Uunt Yus nupetmaktinian tuke súmiayi. 7 Tura Atateséra suntari̱ kurí tantaran takaruya nunasha Tawit nérentin ajas Jerusaréṉnum yaruak ikiankamiayi. 8 Kame nu arantcha akupin Tawitkia Wita tura Wirutai péprunmaya̱ncha akupin Atat Atateséra pépruri̱ya̱n yaṉkú jirun tí nukap yaruakmiayi.

9 Nuyá̱ Amat nuṉkanmaya̱ úunt akupin Tuii Atateséra suntari̱n Tawit ashí nupetkayi táman antuk 10 mesetnum mánaik Atateséran nupetka asamtai amikmam shiir awajúta tusa ni uchirí̱n Juraman úunt akupin Tawitiai̱ akupkámiayi. Warí Tuiisha Atatesérja̱i̱ mesetan pujurin asa túramiayi. Tura nui̱ wéak Juramka kuitji̱a̱i̱ kuriji̱a̱i̱ yaṉkú jiruja̱i̱ ashí najankamu armia nuna yaruak werimiayi. 11 Tura úunt akupin Tawitkia nunasha núnisaṉ mesetnum nupetmak kurin tura kuítian chikichan atantrarmia nuja̱i̱ ashí irur Yúsnan akantúkmiayi. Kame Tawitkia 12 Etumnumia̱n, Muápnumia̱n, Amun aentsnan Jiristíu aentsnancha Amarík aentsnancha tura Súupanmaya̱ úunt akupniu Rejupa uchirí̱ Atatesér atantrarmancha Yusna ártí tusa akantúkmiayi.

13 Tawitia Siria aentsun nupetak waketas Wee paka tutaiya̱ nui̱ tiasiúchu mir aents Etumnumia̱n nupetka asa páantin ajasmiayi. 14 Nuya̱ṉka Tawit suntar matsamtai̱n Etumnum najankamiayi, kame ashí Etum nuṉkanam suntar matsamtai̱n najankamiayi. Tura Etum aents armia nuka ashí Tawitia iniatairi̱ ajasármiayi. Tura Tawit tuí̱ṉkish wemia nui̱ṉkia nupetmaktiniaka Uunt Yus tsaṉkatmiayi.

Tawitia suntari̱ uuntri̱ armia nu

15 Tura Tawit ashí Israer shuarnum akupeak nekasa nuja̱i̱ métek ashí ni shuari̱ncha péṉker akupkámiayi. 16 Ántsaṉ Sarwia uchirí̱ suntara úuntri̱ṉkia Juápauyayi. Tura Ajirúta uchirí̱ Jusapátka úunt akupniun papin áatniuyayi. 17 Ajitúpa uchirí̱ Satuk nuyá̱ Awiatára uchirí̱ṉkia Ajimirík nuka Yúsnan pujurin ármiayi. Antsu Serayáska papin áakmauyayi. 18 Juyata uchirí̱ Piniayáska Seret shuaran tura Pirit shuaran akupniuyayi. Tura Tawitia uchirí̱nkia Yúsnan pujurin ármiayi.