1 Akupin

Awisák akupniun wainma

1 1:1-4 Akupin Tawit ti úuntach ajaska untsurí pushí áentsramash peṉké tsue̱r ajachmiayi. Tuma asamtai ni yaintri̱ armia nu chichainiak nuwa̱ch áishmaṉja̱i̱sha tsaniṉcha e̱a̱ka wáinkiatarum ii úuntri̱n wáiniuk niji̱a̱i̱ tsaniṉ kának tsue̱r awajit tusar aentsun akupkarmiayi. Tutai ashí Israer nuṉkanam nuwa̱ch shíirmachin e̱a̱karmiayi. Tura Súnemnumia̱ nuwa̱n Awisákan wáinkiar akupniun itiariármiayi. Nisha tí shiirmachiyayi. Tura nisha akupniun wáiniuk niji̱a̱i̱ kanimiayi túrasha akupniúka Awisákja̱i̱ṉkia tsanichmiayi.

Atunías akupin ajastaj tama

5 1:5-6 Nuya̱ṉka Tawitia nuwé̱ Akitia uchirí̱ Atunías waantu enentáiji̱a̱i̱ akupin ajastaj tusa karetan achik aents kawainium ekemta unuimiátkaruncha tura seṉkuintia áishmaṉkan yaruak wémiayi. Nú uchinkia ni aparí̱sha warinkish túramtaisha peṉké páchichuyayi. Kame Atuníaska peṉker íirkauyayi. Nuka Apsarúna patai̱yayi.

7 1:7-10 Atuníaska Sarwia uchirí̱ Juapja̱i̱ tura Yúsnan pujurin Awiatárja̱i̱ chichaman najana ármiayi. Túrasha Yúsnan pujurin Satuk tura Juyata uchirí̱ Piniayás núnisaṉ Yúsnan etserin Natan nuyá̱ chíkich suntar kakaram armia nuka Atuníasnaka némartsuk Tawitji̱a̱i̱ṉ pujuarmiayi. Atuníaska Intrujírnum tíjiu̱ch Sujirítnium murikiun waakancha tura waaka nuérmancha kajeṉ ni yachi̱n akupniu uchirí̱ armia nuna tura akupniu yaintri̱ armia nunasha ashí ipiaawarmiayi. Túrasha Yúsnan etserin Natannaka Piniayásnasha tura suntar kakaram armia nunasha núnisaṉ ni yachí̱ Saramúṉnasha ipiacharmiayi.

Tawit Saramúṉkan akupin awajsamu

11 1:11-14 Nuya̱ṉka Natan Saramúṉka nukurí̱ Pitsawín chichareak “Ámeka Akitia uchirí̱ Atunías ii uuntri̱ Tawitkia nékachmanumaṉ akupin ajasái támaka antukchamek. Tuma asamtai ame tura uchirmesha jáka̱i̱rum yamaikia ámin tura ame uchirminiun akupin Tawit tiniua nu uminkiat tusa títiatjamna nu antukta. Akupin Tawit werim chicharkum ‘Uuntá, ame takartámin chicharkum wi jakamtaisha ame uchiram Saramúṉ akupin ajas wí pujutai̱nmaṉka pujustatui tíchamkum. Tuma ai̱sha uuntá ¿urukamtai Atuníassha akupin ajasa?’ titiá. Tura tu aujúu pujamin wi jean nuka nekasaiti títiatjai” tímiayi.

15 1:15-16 Tutai Pitsawísha akupin Tawit pujamunam wayá̱ tikishmátramiayi. Nuyá̱ akupin anintrak “¿Warí wakeram?” tímiayi.

17 1:17-21 Tutai nisha aya̱k “Uuntru nekas túrattajai tusam ame Uunt Yusrum pachisam wi jakamtaisha ame uchiram Saramúṉ akupin ajas wi pujutai̱nmaṉka ekemsattawai tíchamkum. Túrasha uuntru ámeka nékatsmini̱ṉ yamaikia Atunías akupin ajasái. Tura untsurí waakan tura waaka unuermancha núnisaṉ muriknasha kajeṉ akupniu ashí uchirí̱n tura Yúsnan takarniun Awiatáran núnisaṉ suntara úuntri̱n Juápan ipiaawarai. Túrasha Saramúṉnaka ipiachai. Tuma asamtai uuntru, yamaikia jakakmincha akupniúsha ¿ya átata? Ame titiá tusa ashí Israer shuarka ámin nákarmainiawai. Nu tíchakminkia winia uuntru, ame jakakminkia wikia winia uchir Saramúṉja̱i̱ métek sumamtikiamu átatji” tímiayi.

22 1:22-28 Nuna tu pujurai̱ Yúsnan etserin Natan tayi tusa akupniun ujakármiayi. Túram wayá̱ akupniun tikishmátar tsuntsumpruámiayi.

Nuyá̱ chichareak “Winia uuntru, ame chichaakum wi jakamtaikia Atunías akupin ajasti ¿tíniukaitiam? Warí yamái untsurí waakan tura waaka unuermancha tura muriknasha kajeṉkai. Tura akupniu ashí uchirí̱nkia tura suntara uuntri̱ núnisaṉ Yúsnan takarniun Awiatáran ipiaawar yurumáiniak tura úmuiniak ‘Akupin Atuníaska tuke iwiaaku atí’ tuíniawai. Túrasha wíniaka tura Yúsnan pujurin Satuk tura Piniayásnasha núnisaṉ Saramúṉnasha ipiatmácharji. Túrasha uuntá, ámeka ame takartámin akupin ajasti tíniuitmena nuka ujatskek túrata tame” tímiayi. Tutai akupin Tawit chichaak “Pitsawí untsuktarum” tímiayi. Tutai nisha wayá̱ akupin pujamunam naka wajasmiayi.

29 Tura akupin núnaka nekas umiktatjai tusa chichaak “Winia ashí nemasrui̱ya̱ uwemtikrurmia nú Yusak nekas iwiaakui. 30 Kame nekas tajai tákun Israer shuara Uunt Yusri̱ náari̱ji̱a̱i̱ tímiajmena núnaka tímiatrusnak yamái umiktatjai. Kame chicharkun ‘Ame uchiram Saramúṉ wini̱ya̱ṉka úunt akupin ajastatui. Tura winia pujutái̱run akintiak úunt akupin ajas pujustatui’ tímiajme” tímiayi. 31 Tutai Pitsawí tikishmátar nuṉká tsuntsumá chicharuk “Winia úuntur akupin Tawitiá, tuke iwiaaku pujúu atá” tímiayi. 32 Nuyá̱ úunt akupin Tawit chichaak “Yúsnan pujurin Satuk nuyá̱ Yúsnan etserin Natan tura Juyata uchirí̱n Piniayássha untsurtuktarum” tutai untsukam tariarmiayi. 33 Nui̱ úunt akupin chicharainiak “Winia takartin ainia nuja̱i̱ winia umpururui̱ Saramúṉ ekenkarum Kijiunumaani̱ akaktiarum. 34 Nui̱ Yúsnan etserin Natan tura Yúsnan pujurin Satuk asuitiji̱a̱i̱ muuknum nakitiá Israer shuara úunt akupniuri̱ awajsattawai. Túramtai kachu umpuakrum ‘¡Yamaikia úunt akupniuka Saramúṉkaiti!’ titiarum. 35 Tura iruntrarum umikrum wáketkuram nemarkirum wi akupku pujutái̱rui̱ awayá̱tarum. Tura wini̱ya̱ṉka ni akiniak pujus Israernum tura Jutanam akupin átinian anaikiaitjiai” tímiayi. 36 Nuna takui̱ Juyata uchirí̱ Piniayás úunt akupniun aya̱k “Ame támena núnisaṉ atí tura ame Uunt Yusrum núnis akupkati. 37 Tura winia úuntrun Tawitian Yus wainkiamia núnisaṉ Uunt Yus Saramúṉnasha pujursati. Túrak nuna páantin awajsati” tímiayi.

38 Nuyá̱ Uunt Yúsnan pujurin Satuk tura Yúsnan etserin Natan núnisaṉ Juyata uchirí̱ Piniayás nuyá̱ Seret tura Pirit shuaraim iruntrar weriar Saramúṉkan Tawitia umpururi̱n ekenkar Kijiun púkuniniam júkiarmiayi. 39 Tura Yus Shiir Awajtai̱ Je̱a̱nmaya̱n asuiti kachunam yaramun jukí̱ Uunt Yúsnan pujurin Satuk Saramúṉkan muuknum nakitiámiayi. Túramtai kachun umpuiniakui ashí shuar warainiak kakantar charaatum ajainiak “Yamaikia úunt akupniuka Saramúṉkaiti” tiármiayi. 40 Nuyá̱ ashí shuar nin nemariarmiayi. Tura ti warasar piṉkiuin umpuiniai̱ kantamáiniak charaatum ajarmiayi. Tímiatmainiak úreawatska tumai̱ awajiármiayi.

Atunías mantamnatniun Saramúṉ tsaṉkuramu

41 Tura yurumá amukar Atuníassha nuyá̱ ipiaamu armia nusha charaatum ajamun antukarmiayi. Tura Juapka kachu umpuamun antuk chichaak “¿Urukamtai péprunmasha charaatum ajainia?” tímiayi.

42 Tura nisha chicháa pujai̱ṉ Yúsnan pujurniu Awiatára uchirí̱ Junatán támiayi. Túrunamtai Atunías chicharuk “Kakaram áishmaṉka waya̱ta péṉker chicham inimtsumeash” tímiayi.

43 1:43-48 Tutai Junatán Atuníasan chicharuk “Péṉker chichamnaka inimtsujai antsu ii uuntri̱ Tawit Saramúṉkan akupin awajsáyi. Tura Yúsnan pujurniun Satukan nuyá̱ Yúsnan etserniun Natanan núnisaṉ Juyata uchirí̱ Piniayásnasha tura Seret shuarja̱i̱ nuyá̱ Pirit shuarja̱i̱sha akupin Tawit akupraram Saramúṉkan akupin ekemtai̱ umpurunam ekenkarai. Nuya̱ṉka Kijiunnum Satuk Natanja̱i̱ asuitin muuknum ukatar akupin awajsarai. Nuyá̱ wininiak charaatum ajainiana nu antukurme. Núnisaṉ Saramúṉka akupin pujutai̱niam ekemsayi. Tura takarin ainia nusha ii úuntri̱n akupin Tawitian weriar chicharainiak ‘Ame Yúsrum Saramúṉka náari̱nkia ame náarmiji̱a̱i̱ naṉkaaka awajsati. Tura akupeamuri̱ncha ame akupeamurmiji̱a̱i̱ naṉkaamas uunt awajtusti’ tuíniawai. Ímia akupniusha tepesam shiir enentáimtusai. Tura chichaak ‘Winia pujutái̱rui̱ pujustinian núnisaṉ wáinkiatniuncha tsaṉkatruku asa Uunt Yus Israera Yusri̱ shiir awajnásti’ tawai” tímiayi.

49 1:49-50 Nuya̱ṉka Atunías ipiaamu armia nuka sapijmiakar tsakiṉmakar aṉkant aṉkant wéarmiayi. Túrasha Atuníaska Saramúṉkan ashamak Yus áestutai̱ kachuri̱n achimkiáttsa wémiayi.

51 Nuya̱ṉka Saramúṉkan ujainiak “Atuníaska akupin Saramúṉkan ashamak Yus áestutai̱ kachuri̱n achimkiáyi tura chichaak ‘Akupin Saramúṉ nekas umiktatjai taku “inia takarniúrnaka puya̱ja̱i̱ṉkia máshtatjai” turúttí’ tawai” tiármiayi.

52 Tutai Saramúṉ chichaak “Nekas péṉker áishmaṉkaitkiuṉka ni intiashí̱ṉsha antinnakchattawai antsu ju̱yá̱ netse túrutai̱n túrakka mantamnattawai” tímiayi.

53 Nuya̱ṉka Yus áestutai̱nmaya̱ṉka ji̱i̱ktiarum tusa akupin Saramúṉ akupkámiayi. Túram akupin Saramúṉkan tarí tikishmátramiayi. Túram Saramúṉ chicharuk “Je̱e̱min wetá” tímiayi.